មន្រ្តីអតីតបក្សសង្រ្គោះជាតិនៅតែចាត់ទុកខ្លួនឯងថាជាតំណាងរាស្ត្រស្របច្បាប់
គណបក្សសង្រ្គោះជាតិដែលត្រូវបានតុលាការកំពូលរំលាយចោលនោះ បានប្រកាសខ្លួនឯងថា អ្នកតំណាងរាស្ត្ររបស់គណបក្សនេះ នៅតែជាតំណាងស្របច្បាប់ និងជាតំណាងរបស់ប្រជាពលរដ្ឋខ្មែរជាម្ចាស់ឆ្នោត ដែលទទួលស្គាល់ ដោយសហភាពអន្តរសភា(IPU) តំណាងឲ្យប្រទេសចំនួន១៧៣។ នេះបើតាមសេចក្តីថ្លែងការណ៍របស់អតីតគណបក្សសង្រ្គោះជាតិចេញថ្ងៃទី២៤វិច្ឆិកាម្សិលមិញនេះ។ ប៉ុន្តែគជប និងគណបក្សកាន់អំណាច បានទាត់ចោលនូវការអះអាងនេះ។
ចុះផ្សាយនៅថ្ងៃ៖
ស្តាប់ - ០១:៣៩
នៅក្នុងសេចក្តីថ្លែងការណ៍ពីក្រៅប្រទេស អតីតគណបក្សប្រឆាំងដ៏ធំជាងគេនេះ បានថ្កោលទោសចំពោះគណៈកម្មាធិការជាតិរៀបចំការបោះឆ្នោត ដែលរឹបអូសអាសនៈរបស់គណបក្សសង្រ្គោះជាតិទៅចែកឲ្យបក្សដទៃតាមច្បាប់ដែលតំណាងរាស្ត្រគណបក្សប្រជជនកម្ពុជាធ្វើឡើង។ គឺជាច្បាប់ដែលគណបក្សសង្រ្គោះជាតិ ចាត់ទុកថា ធ្វើឡើងដោយរំលោភរដ្ឋធម្មនុញ្ញនិងគោលការណ៏ប្រជាធិបតេយ្យ។
បើតាមអតីតគណបក្សប្រឆាំងនេះ ការដែលគជប រឹបអូសអាសនៈរបស់គណបក្សសង្រ្គោះជាតិទៅចែកឲ្យចែកគណបក្សដទៃ ដែលពុំទទួលបានការគាំទ្រពីប្រជាពលរដ្ឋម្ចាស់ឆ្នោត បង្ហាញច្បាស់ថា គជប បានសមគំនិតជាមួយគណបក្សប្រជាជនកម្ពុជា និងតុលាការកំពូល”ប្លន់ឆន្ទះប្រជាពលរដ្ឋខ្មែរ” ដែលតំណាងរាស្ត្រគណបក្សសង្រ្គោះជាតិទាំង៥៥រូបមិនអាចទទួលយកបាន។
ឆ្លើយតបនឹងការលើកឡើងនេះ អគ្គលេខាធិការរង គជប លោក សោម សូរីដា អះអាងថា អ្វីដែលគជប ធ្វើគឺធ្វើទៅតាមច្បាប់របស់កម្ពុជានិងរដ្ឋធម្មនុញ្ញ។
យ៉ាងណាក៏ដោយ ក្នុងសេចក្តីថ្លែងការណ៍ដដែល អតីតគណបក្សសង្រ្គោះជាតិ បានអំពាវនាវឲ្យមេដឹកនាំគណបក្សប្រជាជនកម្ពុជា និងស្ថាប័នពាក់ព័ន្ធ លុបចោលសេចក្តីសម្រេចនៃការយាយីគណបក្សសង្រ្គោះជាតិ ដោយដោះលែង លោក កឹម សុខា និងអ្នកទោសមនសិកាទាំងអស់ ហើយទម្លាក់ចោលការចោទប្រកាន់ អ្នកនយោបាយ សកម្មជនសិទ្ធិមនុស្ស សកម្មជនបរិស្ថាន និងអ្នកសារព័ត៌មាន ដើម្បីកុំឲ្យកម្ពុជារងទណ្ឌកម្ម និងស្ថិតនៅឯកោពីសហគមន៍អន្តរជាតិ។
ចំពោះការអំពាវនាវនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកថាវាគ្មានប្រសិទ្ធិភាពនោះទេ ដោយថាប្រសិនបើរដ្ឋាភិបាលកម្ពុជាធ្វើតាម នោះមានន័យថា កម្ពុជាបាត់បង់ឯរាជ្យភាពនិងបាត់បង់ប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ