លោក អេង ឆៃអ៊ាង៖ ករណីមិនពេញចិត្តការជ្រើសតាំងបេក្ខភាពក្រុមប្រឹក្សាឃុំនៅតាកែវបានដោះស្រាយចប់
សកម្មជនគណបក្សសង្គ្រោះជាតិនៅស្រុកត្រាំកក ខេត្តតាកែវ បានសសេរពាក្យអយុត្តិធម៌និងលាហើយ លើស្លាកគណបក្ស ព្រោះមិនពេញចិត្តការជ្រើសតាំងបេក្ខភាពក្រុមប្រឹក្សាឃុំ ជាអ្វីដែលពួកគេយល់ថា មិនមានតម្លាភាព។ ប្រឈមបញ្ហានេះ មន្ត្រីជាន់ខ្ពស់គណបក្សសង្គ្រោះជាតិលោក អេង ឆៃអ៊ាង បានចេញមុខបកស្រាយថា រឿងរ៉ាវនេះកើតឡើងពីរបីថ្ងៃមកហើយនិងបានដោះស្រាយចប់សព្វគ្រប់។
ចុះផ្សាយនៅថ្ងៃ៖
ស្តាប់ - ០១:២០
លោក ផុក ទី សកម្មជនគណបក្សសង្គ្រោះជាតិប្រចាំស្រុកត្រាំកកបានប្រាប់សារព័ត៌ មានក្នុងស្រុកនៅថ្ងៃទី២៦ ខែកុម្ភៈនេះថា ការដើរគូសស្លាកសញ្ញាពាក្យថា អយុត្តិធម៌និងព្រមានដើរចេញនេះ ដោយសារតែពួកគាត់ ខឹងសម្បារនិងថ្នាក់ដឹកនាំគណបក្សសង្រ្គោះជាតិ ជ្រើស តាំង និងកំណត់លេខរៀងបេក្ខភាពក្រុមប្រឹក្សាឃុំត្រាំកក់ ដោយមិនតម្លាភាព និងមិនយុត្តិធម៌។
លោក ផុក ទី បានទាមទារឲ្យមានការធ្វើប្រជាមតិឡើងចំពោះការជ្រើសតាំងបេក្ខភាពក្រុមប្រឹក្សាឃុំសង្កាត់នេះ។ បើមិនព្រមធ្វើប្រជាមតិទេនោះ រូបលោក និងសកម្មជនក្នុងឃុំត្រាំកក់ជាច្រើនទៀត នឹងដើរចេញពីបក្ស។
លោក អេង ឆៃអ៊ាង បានគូសបញ្ជាក់ថា ករណីសកម្មជននៅ ឃុំត្រាំកក់ ដែលនាំគ្នាសរសេរពាក្យ «អយុត្តិធម៌» លើស្លាកបក្ស និងគំរាមដើរចេញនោះ ពួកគេបានយល់ព្រមទទួលយកការសម្របសម្រួលបញ្ចប់បញ្ហាចប់សព្វគ្រប់អស់ហើយ។
ហើយមកដល់ពេលនេះគណបក្សសង្គ្រោះជាតិកំពុងតែរៀបចំបញ្ចីឈ្មោះក្រុមប្រឹក្សាឃុំសង្កាត់ទៅដាក់គណៈកម្មាធិការជាតិរៀបចំការបោះឆ្នោតនៅថ្ងៃខាងមុខ។ លោក អេង ឆៃអ៊ាង ក៏បានទទួលស្គាល់ថា នៅសល់បញ្ហាមួយចំនួនទៀតដែលគណបក្សសង្គ្រោះជាតិបន្តដោះស្រាយទាក់ទងការរៀបចំបញ្ជីឈ្មោះបេក្ខភាពក្រុមប្រឹក្សាឃុំសង្កាត់នេះ។
អ្វីជាការកត់សម្គាល់បញ្ហានេះបានកើតឡើង ស្របពេលដែលគណបក្សសង្គ្រោះជាតិកំពុងត្រៀមរៀបចំជ្រើសរើសក្បាលម៉ាស៊ីនដឹកនាំថ្មីនៅថ្ងៃទី២មីនាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ