បក្សប្រឆាំងផ្តើមកែទម្រង់ផ្ទៃក្នុងត្រៀមប្រកួតប្រជែងការបោះឆ្នោតអាណត្តិក្រោយ
គណបក្សសង្គ្រោះជាតិ មូលនិធិខុនរ៉ាដអាដិនណៅអ៊ែរ មូលនិធិហ្វេដេរិកណោម៉ាន់ បានរៀបចំសិក្ខាសាលាមួយស្តីអំពីការអភិវឌ្ឍកម្មវិធីនយោបាយរយៈពេលពីរថ្ងៃចាប់ពីថ្ងៃទី០១ វិច្ឆិកា និង បានបញ្ចប់នៅរសៀលថ្ងៃអាទិត្យនេះ នៅសណ្ឋាគារ Raffles Hotel Le Royal។ សិក្ខាសាលានេះ គឺនិយាយពីការកែទម្រង់ផ្ទៃក្នុងរបស់គណបក្សសង្គ្រោះជាតិ ដើម្បីត្រៀមប្រកួតប្រជែងការបោះឆ្នោតនៅអាណត្តិក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
គណបក្សសង្គ្រោះជាតិកំពុងចាប់ផ្តើមរៀបចំក្រុមការងារមួយដើម្បីកែទម្រង់ផ្ទៃក្នុងរបស់គណបក្ស។ ជាការកែទម្រង់លើរចនាសម្ព័ន្ធ និង កម្មវិធីនយោបាយ ដើម្បីឲ្យមានភាពកាន់តែប្រសើរឡើង។
លោកយឹម សុវណ្ណ អ្នកនាំពាក្យគណបក្សសង្គ្រោះជាតិបានឲ្យដឹងក្រោយបញ្ចប់សិក្ខាសាលារយៈពេលពីរថ្ងៃនោះថា ការរកែទម្រង់លើរចនាសម្ព័ន្ធ គឺគណបក្សសង្គ្រោះជាតិគោរពតាមគោលការណ៍ប្រជាធិបតេយ្យ ចង់ឲ្យសិទ្ធសម្រេចស្ថិតទៅលើសកម្មជនថ្នាក់ដឹកនាំគណបក្សសង្គ្រោះជាតិនៅថ្នាក់មូលដ្ឋាន។ ចំណែកការកែទម្រង់កម្មវិធីនយោបាយវិញ គឺ គណបក្សសង្គ្រោះជាតិកែលម្អលើកម្មវិធីនយោបាយចាស់របស់ខ្លួន។ គណបក្សសង្គ្រោះជាតិ នឹងបន្ថែមគោលនយោបាយថ្មីចំនួនដូចជា ការកែទម្រង់ការដឹកនាំរដ្ឋ ការទប់ស្កាត់អំពើពុករលួយ និង ការកាត់បន្ថយរយៈពេលនៃផ្តល់ដីសម្បទានសេដ្ឋកិច្ចជាដើមនៅក្នុងកម្មវិធីនយោបាយថ្មី។
អ្នកនាំពាក្យរូបនេះ បានបន្ថែមថា ការចាប់ផ្តើមកែទម្រង់ផ្ទៃក្នុងរបស់គណបក្សនៅពេលនេះ គឺមានភាពចាំបាច់ណាស់ក្នុងការត្រៀមខ្លួនប្រកួតប្រជែងការបោះឆ្នោតនៅអាណត្តិក្រោយដែលនឹងធ្វើឡើងនៅក្នុងឆ្នាំ ២០១៨។
យ៉ាងណាក៏ដោយ លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីមកពីគណបក្សប្រជាជនកម្ពុជា បានថ្លែងប្រាប់វិទ្យុបារាំងអន្តរជាតិថា គណបក្សកាន់អំណាចមិនព្រួយបារម្ភនឹងការកែទម្រង់របស់គណបក្សប្រឆាំងនោះទេ។ ប៉ុន្តែអ្វីដែលគណបក្សប្រជាជនកម្ពុជាត្រូវគិតនោះ គឺការធ្វើកំណែទម្រង់គណបក្សដើម្បីធ្វើយ៉ាងណាឲ្យរដ្ឋាភិបាលចូលកាន់តែកៀក និងបម្រើប្រជាពលរដ្ឋឲ្យបានកាន់តែល្អ។
បើតាមលោកយឹម សុវណ្ណ កម្មវិធីនយោបាយថ្មីរបស់គណបក្សសង្គ្រោះជាតិដែលកំពុងរៀបចំធ្វើនេះ នឹងលេចចេញរូបរាងយ៉ាងយូរបំផុតនៅពាក់កណ្តាលឆ្នាំ ២០១៥ខាងមុខនេះ។ ជាមួយគ្នានេះដែរ គណបក្សសង្គ្រោះជាតិក៏បានសម្តែងភាពមិនព្រួយបារម្ភចំពោះដំណឹងលេចឮថា មានគណបក្សថ្មីនឹងចូលរួមប្រកួតប្រជែងការបោះឆ្នោតដែលអាចធ្វើឲ្យប្រប្រិយភាពគណបក្សប្រឆាំងធ្លាក់ចុះនោះទេ។ ដោយមិនខ្វល់នឹងគណបក្សថ្មីនោះ លោកយឹម សុវណ្ណ បានសម្តែងសុទិដ្ឋិនិយមថា គណបក្សសង្គ្រោះជាតិនឹងឈ្នះការបោះឆ្នោតនៅអាណត្តិក្រោយ ប្រសិនគណបក្សមានប្រព័ន្ធផ្សព្វផ្សាយ ហើយគណៈកម្មាធិការជាតិរៀបចំការបោះឆ្នោតមានឯករាជ្យភាពនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ