កម្ពុជានិងម៉ាលេស៊ី ឯកភាពបញ្ជូនពលករខ្មែរទៅធ្វើការនៅប្រទេសម៉ាលេស៊ីឡើងវិញ
ក្រោយពីបានអាក់ខានបញ្ជូនពលករខ្មែរទៅធ្វើការតាមផ្ទះនៅប្រទេសម៉ាលេស៊ីមួយរយៈ រដ្ឋាភិបាលកម្ពុជានិងម៉ាលេស៊ី បានឯកភាពក្នុងការបញ្ជូនពលករខ្មែរទៅធ្វើការនៅតាមផ្ទះនៅម៉ាលេស៊ីឡើងវិញ នាពេលដ៏ខ្លីខាងមុខនេះ។ សង្គមស៊ីវិលដែលធ្វើការជុំវិញបញ្ហានេះ មិនជំទាស់ចំពោះការសម្រេចនេះទេ ក៏ប៉ុន្តែស្នើឲ្យរដ្ឋាភិបាលកម្ពុជាពិនិត្យលក្ខខណ្ឌការងារឲ្យបានគ្រប់ជ្រុងជ្រោយ ដើម្បីធានាថាពលករខ្មែរដែលទៅធ្វើការនៅម៉ាលេស៊ី នឹងមិនរងការរំលោភបំពាន ម្តងទៀតឡើយ។
ចុះផ្សាយនៅថ្ងៃ៖ កែប្រែថ្ងៃទី៖
កម្ពុជា និងម៉ាឡេស៊ី បានសម្រេចបន្តអនុស្សរណៈយោគយល់គ្នាស្ដីពីការជ្រើសរើស និងបញ្ជូនពលករខ្មែរទៅបម្រើការងារតាមផ្ទះនៅប្រទេសម៉ាលេស៊ីឡើងវិញ ក្រោយពីផ្អាកតាំងពីឆ្នាំ ២០១១ មក ។ ការសម្រេចយ៉ាងដូច្នេះធ្វើឡើងនៅក្នុងជំនួបពិភាក្សារវាង រដ្ឋមន្រ្តីក្រសួងការងារកម្ពុជា និង រដ្ឋមន្រ្តីក្រសួងធនធានមនុស្សនៃប្រទេសម៉ាលេស៊ី កាលពីថ្ងៃទី ១១ ឧសភា។ តាមគម្រោង ភាគីទាំងពីរ នឹងប្រជុំពិភាក្សាបញ្ចប់រាល់បញ្ហាដែលនៅសេសសល់ឲ្យ បានចប់សព្វគ្រប់ នៅក្នុងកិច្ចប្រជុំក្រុមការងារបច្ចេកទេសលើកទី៣ ឲ្យបានមុនដំណាច់ខែ ឧសភា នេះ។
ព្រមជាមួយគ្នានេះ ដើម្បីធានាបាននូវការធ្វើចំណាកស្រុកទៅធ្វើការប្រកបដោយសុវត្ថិភាព ភាគីទាំងពីរក៏បានចុះហត្ថលេខាលើការអនុវត្តអនុស្សារណៈមួយចំនួនដូចជា៖ ការលើកកម្ពស់ និងកាពារសិទ្ធិពលករតាមរយៈការអប់រំណែនាំតម្រង់ទិស និងការបណ្តុះបណ្តាលជំនាញហាត់ការ ពង្រឹងប្រសិទ្ធភាពក្នុងការជ្រើសរើស បណ្តុះបណ្តាល បញ្ជូន និង គ្រប់គ្រងពលករខ្មែរ ការផ្លាស់ប្តូរព័ត៌មាន ដើម្បីទប់ស្កាត់ការជ្រើសរើស និងប្រើប្រាស់ពលករខុសច្បាប់ ក៏ដូចជាបង្ការ និងប្រយុទ្ធប្រឆាំងការកេងប្រវ័ញ្ចកម្លាំងពលករ និង ការជួញដូរមនុស្សជាដើម។
សូមរំឮកឡើងវិញថា កម្ពុជាបានផ្អាកបញ្ជូនពលករបម្រើការងារតាមផ្ទះទៅប្រទេសម៉ាឡេស៊ី កាលពីឆ្នាំ២០១១ ដោយហេតុថា ពលករមួយចំនួនត្រូវបានថៅកែធ្វើទារុណកម្មវាយធ្វើបាប និងរំលោភបំពាន បង្ខំឲ្យធ្វើការលើសម៉ោងពី ១៧ ទៅ ២០ ម៉ោង ក្នុងមួយថ្ងៃ និងដោយគ្មានថ្ងៃឈប់សម្រាក ខណៈពលករខ្លះទៀតមិនទទួលបានប្រាក់កម្រៃសោះអំឡុងពេលបំពេញការងារ។
នាយកប្រតិបត្តិអង្គការខារ៉ាម (CARAM) លោក យ៉ា ណាវុធ ដែលធ្វើការពាក់ព័ន្ធនឹងការការពារសិទ្ធិរបស់ពលករចំណាកស្រុក បញ្ជាក់ប្រាប់វិទ្យុបារាំងថា លោកមិនជំទាស់នោះទេ ក្នុងការសម្រេចបញ្ជូនពលករខ្មែរទៅធ្វើការនៅម៉ាលេស៊ីឡើងវិញនេះ។ ក៏ប៉ុន្តែដើម្បីបញ្ចៀសបញ្ហាប្រឈមនានា ដែលពលករខ្មែរតែងតែជួបប្រទះអំឡុងពេលបំពេញការងារកន្លងទៅនោះ លោក ស្នើសុំឲ្យរដ្ឋាភិបាលកម្ពុជា ពិនិត្យលក្ខខណ្ឌ ឬ កិច្ចសន្យាការងារឲ្យបានម៉ត់ចត់មុនបញ្ជូនពលករទៅធ្វើការ។ ជាកិច្ចសន្យាដែលកំណត់ម៉ោងធ្វើការ ថ្ងៃឈប់សម្រាកប្រចាំសប្តាហ៍ និងប្រចាំឆ្នាំ ក្នុងការធានាការគោរពសិទ្ធមនុស្ស។ និងចាំបាច់ត្រូវបណ្តុះបណ្តាលពលករឲ្យយល់ពីទំនៀមទម្លាប់នៃប្រទេសម៉ាឡេស៊ី ទីតាំងនៃក្រុមហ៊ុនដែលបញ្ជូនពលករនៅប្រទេសម៉ាលេស៊ី និងស្ថានទូតខ្មែរប្រចាំនៅម៉ាលេស៊ី ដែលអាចជួយសម្រួលឲ្យពួកគេអាចស្វែងរកអន្តរាគមន៍ភ្លាមៗនៅពេលមានបញ្ហាណាមួយកើតឡើង។
បន្ថែមលើនេះ រដ្ឋាភិបាលគួរបង្កើតយន្តការតាមដានត្រួតពិនិត្យ ឬ ធ្វើអធិការកិច្ចជាប្រចាំ ដើម្បីធានាពលករខ្មែរនឹងមានសុវត្ថិភាព ពិសេស ត្រូវចាត់វិធានការណ៍ឲ្យម៉ឺងម៉ាត់ ចំពោះក្រុមហ៊ុនបញ្ជូនពលករទៅធ្វើការខុសច្បាប់ទៅតាមផ្លូវច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ