ក្រសួងកសិកម្មថា ជំងឺប៉េស្តជ្រូកអាហ្វ្រិកមិនទាន់កើតនៅកម្ពុជាទេ
មន្រ្តីជំនាញខាងសុខភាពសត្វរបស់កម្ពុជា បានបញ្ជាក់ថា ជំងឺប៉េស្តជ្រូកអាហ្វ្រិក (ASF) ដែលកំពុងកើតឡើងនៅក្នុងប្រទេសធំៗមួយចំនួននោះ មិនទាន់កើតមាននៅកម្ពុជាទេ។ ប៉ុន្តែក្រសួងកសិកម្មបានព្រមានថា បើសិនជាកសិដ្ឋានណាដែលមានសត្វជ្រូកឆ្លងជំងឺនេះ គឺត្រូវតែសម្លាប់ចោលទាំងអស់ ព្រោះរហូតមកដល់ពេលនេះគេមិនទាន់មានវិធីព្យាបាលជំងឺជ្រូកប្រភេទថ្មីនេះនៅឡើយទេ។
ចុះផ្សាយនៅថ្ងៃ៖
បើទោះបីប្រទេសកម្ពុជា មិនទាន់មានករណីឆ្លងជំងឺប៉េស្តជ្រូកអាហ្វ្រិក (ASF) ក៏ពិតមែន ប៉ុន្តែអ្នកជំនាញខាងសុខភាពសត្វនៃក្រសួងកសិកម្ម បានរៀបចំសិក្ខាសាលាផ្សព្វផ្សាយមួយកាលពីថ្ងៃទី២០កញ្ញា ដើម្បីបង្ការការឆ្លងជំងឺនេះមកប្រទេសកម្ពុជា ស្របពេលកម្ពុជាបាននាំចូលជ្រូករស់រាប់ពាន់ក្បាលក្នុង១ថ្ងៃៗពីប្រទេសជិតខាង។
បច្ចុប្បន្នជំងឺផ្តាសាយជ្រូកអាហ្វ្រិក បានកើតឡើងនៅក្នុងប្រទេសធំៗ ដែលចូលចិត្តទទួលទានសាច់ជ្រូក រួមមាន ចិន រុស្សី ប៉ូឡូញ ក្រិច ហុងគ្រី អាហ្វ្រិកខាងត្បូង និង អ៊ុយក្រែន ជាដើម។ នេះបើតាមសមាគមអ្នកចិញ្ចឹមសត្វកម្ពុជា។ សមាគមនេះ បានឲ្យដឹងថា ជំងឺជ្រូកប្រភេទនេះគឺជាជំងឺឆ្លងដ៏គ្រោះថ្នាក់បំផុត ដែលបង្កឡើងដោយវីរុស។ ជំងឺនេះបានឆ្លងយ៉ាងឆាប់រហ័ស រវាងជ្រូកក្នុងស្រុក និង ជ្រូកព្រៃ ដែលអាចកើតទៅលើជ្រូកគ្រប់វ័យ និងគ្រប់ប្រភេទទាំងអស់។ សមាគមដដែលបញ្ជាក់ថា ជ្រូកដែលឆ្លងជំងឺនេះ មិនអាចព្យាបាលបានទេ ពោលគឺត្រូវងាប់តែម្ដង។
នៅប្រទេសចិន មានជ្រូកជិត៤ម៉ឺនក្បាលហើយ ដែលត្រូវបានសម្លាប់ចោល ក្រោយមានករណីឆ្លងរាតត្បាតនៃជំងឺប៉េស្តជ្រូក។ យោងតាមអង្គការស្បៀងអាហារនិងកសិកម្ម ជំងឺនេះបានរកឃើញនៅចំងាយ១០០០គីឡូម៉ែត្រពីកន្លែងដែលបានកើតឡើង ហើយវាអាចរាលដាលពេញប្រទេសចិន និង ប្រទេសផ្សេងទៀតនៅអាស៊ី។
ប្រទេសវៀតណាមក្បែរខាងវិញ បានរឹតបន្តឹងការដឹកជញ្ជូនសត្វដើម្បីទប់ស្តាត់ជំងឺនេះ។ គួរជម្រាបថា វៀតណាមបាននាំចេញជ្រូករស់មកកាន់ប្រទេសកម្ពុជារហូតជាង ២០០០ ក្បាលក្នុងមួយថ្ងៃៗ ខណៈក្រសួងកសិកម្មកម្ពុជាអនុញ្ញាតឲ្យនាំចូលជាផ្លូវការតែចំនួន ១២៥០ក្បាលប៉ុណ្ណោះ។ នេះបើតាមមន្រ្តីកសិកម្មខ្មែរ។ ការនាំជ្រូកចូលពីប្រទេសជិតខាងជាប្រចាំនេះ បានក្លាយជាជាក្តីបារម្ភពីការចម្លងជំងឺប៉េស្តជ្រូកអាហ្វ្រិកមកកម្ពុជា ប្រសិនបើមិនមានការត្រួតពិនិត្យច្បាស់លាស់ទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ