កម្ពុជា រុស្ស៊ី បង្កើតគណៈកម្មការដោះស្រាយបំណុល
កម្ពុជានិងប្រទេសរុស្ស៊ីបានឯកភាពគ្នាក្នុងការបង្កើតគណៈកម្មការចម្រុះរវាងប្រទេសទាំងពីរដើម្បីដោះស្រាយបញ្ហាបំណុលដែលកម្ពុជាជំពាក់រុស្ស៊ីកាលពីទសវត្សរ៍ ៨០។ ការព្រមព្រៀងគ្នាអំពីបញ្ហានេះបានកើតឡើងក្នុងជំនួបរវាងលោកនាយករដ្ឋមន្ត្រីហ៊ុន សែន និងលោក ឌីមីទ្រី មេឌវ៉េដេវ នាយករដ្ឋមន្ត្រីរុស្ស៊ីក្នុងឱកាសកិច្ចប្រជុំកំពូលអាស៊ានលើកទី២៥ នៅទីក្រុងណៃពីដោ ប្រទេសមីយ៉ាន់ម៉ា។
ចុះផ្សាយនៅថ្ងៃ៖
ស្តាប់ - ០១:៥៦
ក្នុងជំនួបពិភាក្សាគ្នានៅឯក្រៅកិច្ចប្រជុំកំពូលអាស៊ាននាទីក្រុងណៃពីដោ ប្រទេសម៉យ៉ាន់ម៉ា ប្រមុខរដ្ឋាភិបាលកម្ពុជា និងរុស្ស៊ី បានឯកភាពគ្នាបង្កើតគណៈកម្មការចម្រុះរវាងប្រទេសទាំងពីរដើម្បីដោះស្រាយបញ្ហាបំណុលដែលកម្ពុជាជំពាក់រុស្ស៊ីកាលពីទសវត្សរ៍៨០។ នេះបើយោងតាមទីភ្នាក់ងារសារព័ត៌មានកម្ពុជា AKP ដែលផ្សាយឲ្យដឹងនៅថ្ងៃព្រហស្បតិ៍ទី១៣វិច្ឆិកានេះ។
បើយោងតាម AKP លោកនាយករដ្ឋមន្ត្រី ហ៊ុន សែនបានស្នើដល់ភាគីរុស្ស៊ីឲ្យបន្ធូរបន្ថយអត្រាការប្រាក់ស្របតាមកិច្ចព្រមព្រៀងទីក្រុងប៉ារីស និងស្របពេលដែលកម្ពុជាកំពុងជួបប្រទះការលំបាកខាងសេដ្ឋកិច្ច។ ដើម្បីដោះស្រាយបញ្ហានេះ កម្ពុជានឹងបញ្ជូនរដ្ឋមន្ត្រីការបរទេស រដ្ឋមន្ត្រីក្រសួងមហាផ្ទៃ និងរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុទៅកាន់ប្រទេសរុស្ស៊ី ក្នុងពេលឆាប់ៗនេះដើម្បីចរចាដោះស្រាយបញ្ហាបំណុល។
សូមបញ្ជាក់ថា ប្រទេសកម្ពុជាបានជំពាក់បំណុលប្រទេសរុស្ស៊ីឬអតីតសហភាពសូវៀតចំនួនជាង ១៥០០ លានដុល្លារ។ ប៉ុន្តែ បំណុលនេះត្រូវបានប្រសួងការបរទេសកម្ពុជាបញ្ជាក់ថា រុស្ស៊ីបានលុបចោល៧០ភាគរយហើយពោលគឺបំណុលដែលនៅសល់សព្វថ្ងៃមានប្រហែលតែជាង៤៥០លានដុល្លារតែប៉ុណ្ណោះ។ បំណុលដែលកម្ពុជាខ្ចីពីអតីតសហភាពសូវៀតកាលណោះគឺដើម្បីទិញសម្ភារៈកសិកម្ម គ្រឿងយន្ត និងគ្រឿងសព្វាវុធជាដើម។
ទីក្រុងភ្នំពេញបានព្យាយាមសុំឲ្យរុស្ស៊ីលុបបំណុលនេះទាំងស្រុងក៏ប្រែក្លាយឲ្យទៅជាជំនួយអភិវឌ្ឍវិញ ប៉ុន្តែ សំណើនេះហាក់មិនអាចទៅរួចទេ។ កាលពីខែឧសភាកន្លងទៅ ឯកអគ្គរដ្ឋទូតថ្មីរបស់រុស្ស៊ីក៏ធ្លាប់បានអញ្ជើញរដ្ឋមន្ត្រីការបរទេស និងរដ្ឋមន្ត្រីសេដ្ឋកិច្ចនិងហិរញ្ញវត្ថុកម្ពុជាទៅចរចាដើម្បីដោះស្រាយបញ្ហាបំណុលនេះដែរ។
យោងតាមរបាយការណ៍របស់ធនាគារអភិវឌ្ឍន៍អាស៊ីក៏ដូចជាធនាគារពិភពលោកដែរ បច្ចុប្បន្ន កម្ពុជាកំពុងជំពាក់បំណុលគេប្រហាក់ប្រហែល ៥ ០០០ លានដុល្លារ ឬស្មើ ៣២ ភាគរយនៃផលិតផលក្នុងស្រុកសរុប (GDP)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ