នៅទីបំផុត ថៅកែជាតិរុស្ស៊ីឈ្មោះ Polonski ត្រូវបានដោះលែងចេញពីគុកខ្មែរ
ការដោះលែងនេះ តាមសំដីមេធាវីជាតិរុស្ស៊ីរបស់គាត់ បានប្រព្រឹត្តទៅនៅម៉ោង៨និង៧នាទីព្រឹកមិញ ម៉ោងម៉ូស្គូ ត្រូវនឹងម៉ោង១១និង៧នាទីម៉ោងស្រុកខ្មែរ ក្រោយពីពលរដ្ឋរុស្ស៊ីរូបនេះជាប់ក្នុងការឃុំឃាំងអស់៣ខែ៣ថ្ងៃមក ក្នុងពន្ធនាគារក្រុងព្រះសីហនុ តាមបទប្រើអំពើហិង្សាទៅលើក្រុមអ្នកដើរកប៉ាល់ជាតិខ្មែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០១
ដំណឹងស្តីអំពីការដោះលែងនេះ តាំងពីព្រឹកមិញមក នាំគ្នាផ្សព្វផ្សាយដោយកាណាល់ទូរទស្សន៍ និងប៉ុស្តវិទ្យុជាច្រើននៃក្រុងម៉ូស្គូ ក៏ដូចជាតាមគេហទំព័រនៃទីភ្នាក់ងារព័ត៌មានធំៗរបស់ប្រទេសរុស្ស៊ី ទាំងយោងទៅលើសំដីពួកមេធាវីរុស្ស៊ីដែលខំការពាររូប Businessman Serguei Polonski នោះ។
តាមលោកមេធាវី Alexandre Dobrovinki កូនក្តីរបស់គាត់ត្រូវបានដោះលែងបណ្តោះអាសន្នទល់នឹងប្រាក់ធានាទំហំ៥ម៉ឺនដុល្លារស.រ.អា. ដោយមានការចេញមុខធានាពីខាងឥស្សរជនខ្មែរជាទីគោរពពីរនាក់ ដែលថាក្រោយពីទទួលបានសេរីភាពបណ្តោះអាសន្ន សាមីជននោះនឹងប្រកាន់អាកប្បកិរិយាយ៉ាងស័ក្តិសម ពេលវត្តមាននៅលើទឹកដីកម្ពុជា និងព្រមទាំងមានលិខិតសន្យាផ្ទាល់ដៃពីខាងថៅកែជាតិរុស្ស៊ីនោះថាគាត់គ្មានការទាមទារអ្វីណាចំពោះភាគីកម្ពុជាឡើយ ពោលគឺចំពោះព្រះមហាក្សត្រ ចំពោះរាជរដ្ឋាភិបាល ចំពោះប្រព័ន្ធតុលាការ និងចំពោះប្រជាជនកម្ពុជាសោះឡើយ។
លោកមេធាវីនេះបានសំដែងអំណរគុណទៅកាន់រាល់អ្នកណាដែលបានអន្តរាគមន៍ជួយជ្រោមជ្រែងក្នុងការដោះលែងនេះ មានពួកមន្ត្រីនៃក្រសួងការបរទេសរុស្ស៊ី ពួកអ្នកតំណាងរាស្តនៃសភាឌូម៉ារុស្ស៊ី ដែលក្នុងកិច្ចប្រជុំលើកនេះនៃគណៈកម្មការអន្តររដ្ឋាភិបាលកម្ពុជា-រុស្ស៊ី បានធ្វើសំណូមពរសុំឲ្យជួយដោះលែងនេះ ទៅកាន់រដ្ឋមន្ត្រីការបរទេសកម្ពុជា និងរដ្ឋមន្ត្រីក្រសួងយុត្តិធម៌កម្ពុជា។
ហើយតាមសំដីមេធាវីជាតិរុស្ស៊ីម្នាក់ទៀត គឺលោកស្រី Diana Tatosova ថ្លែងព្រឹកមិញតាមប៉ុស្តវិទ្យុ Kommersant FM ពលរដ្ឋរុស្ស៊ីឈ្មោះ Polonski នោះ ក្រោយពីចេញពីពន្ធនាគារ ឥតបន្តស្ថិតនៅក្នុងលក្ខណៈជាប់ឃុំនៅគេហដ្ឋានគាត់ ឬក៏ស្ថិតនៅក្រោមការឃ្លាំមើលពីខាងអំណាចតុលាការកម្ពុជាឡើយ។ គាត់អាចធ្វើដំណើរដោយសេរីតាមច្រកល្ហកប្លែកៗនៃទឹកដីកម្ពុជា ប៉ុន្តែគាត់គ្មានសិទ្ធិចាកចេញពីប្រទេសកម្ពុជាឡើយ។ ប្រាកដណាស់ ដោយរង់ចាំអង្គសវនាការកាត់ទោសដោយតុលាការក្រុងព្រះសីហនុ ដែលនឹងប្រព្រឹត្តទៅក្នុងពេលខាងមុខ លោក Polonski នឹងសម្រាកលំហែកាយក្នុងភូម៌គ្រឹះរបស់គាត់ផ្ទាល់នៅលើកោះពស់។
មេធាវីរុស្ស៊ីទាំងពីរនាក់នោះ សង្ឃឹមថាអង្គសវនាការដែលនឹងប្រព្រឹត្តទៅតែមួយថ្ងៃ មុខជានឹងបិទបញ្ចប់សំណុំរឿងគាត់ពុំខាន ដោយមកពីក្រុមនាវិកខ្មែរ៦នាក់ កាលពីដើមឆ្នាំនេះ បានដកទៅហើយពាក្យបណ្តឹងទល់នឹងរូប Polonski ជាថ្នូរនឹងប្រាក់សងជម្ងឺចិត្ត សរុបទៅ២ម៉ឺនដុល្លារ។
មេធាវីរុស្ស៊ី ក៏បានឲ្យដឹងដែរថា អាជ្ញាធរគុកក្រុងព្រះសីហនុថែមទាំងបានសំដែងអំណរគុណដល់លោក Polonski ទៅផងចំពោះការដែលគាត់បានជួយស្តារឡើងវិញប្រព័ន្ធផ្គត់ផ្គង់ទឹក និងជួយសង់ផ្លូវទៅកាន់ពន្ធនាគារនោះ។
លោក Polonski អាយុ៤០ឆ្នាំ ជាថៅកែក្រុមហ៊ុនឈ្មោះ Potok ខាងជួញអចលនទ្រព្យនៅរុស្ស៊ី ក៏ដូចជានៅបរទេសបែបយ៉ាង នៅអ៊ុយក្រែន បារាំង កម្ពុជា Montenegro Suisse ស.រ.អា. និង អង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ