ក្រសួងធនធានទឹក៖ ខេត្តបីនៅអមទន្លេមេគង្គលើប្រឈមនឹងទឹកជំនន់ ក្នុងរយៈពេល ៥ ថ្ងៃខាងមុខ
ក្រសួងធនធានទឹក និងឧតុនិយម នៅថ្ងៃនេះ បានប្រកាសថា ខេត្តចំនួនបី ដែលស្ថិតនៅអមសងខាងដងទន្លេមេគង្គលើ អាចប្រឈមនឹងទឹកជំនន់ ចាប់ពីថ្ងៃទី ២០ ឬ ២១ ខែ កក្កដា ខាងមុខនេះ។ ខេត្តទាំងបីនោះ រួមមាន ខេត្តស្ទឹងត្រែង ក្រចេះ និងខេត្តកំពង់ចាម។ ចំណែកកម្ពស់ទឹកទន្លេមេគង្គវិញ ក៏ត្រូវបានក្រសួងធនធានទឹក ព្យាករណ៍ថា នឹងបន្តហក់ឡើងជាលំដាប់ តែមិនទាន់ឈានដល់កម្រិតកម្ពស់ ប្រកាសអាសន្ននៅឡើយនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
មូលហេតុដែលធ្វើឲ្យខេត្តនៅអមសងខាងទន្លេមេគង្គលើ ប្រឈមនឹងទឹកជំនន់ និងកម្ពស់ទឹកទន្លេមេគង្គ បន្តហក់ឡើង ដោយសារតែ កម្ពុជាកំពុងទទួលរងឥទ្ធិពលកូនព្យុះ ឈ្មោះ តាឡាស ដែលជាព្យុះទី៤ ប្រចាំឆ្នាំ ២០១៧ ។ កូនព្យុះតាឡាស បានកើតឡើង និងកំពុងស្ថិតនៅក្នុងសមុទ្រចិនខាងត្បូងនៅខណៈពេលនេះ។ ក្រៅពីទន្លេមេគង្គ ក្រសួងធនធានទឹក ក៏បានព្យាករណ៍ដែរថា ស្ថានភាពកម្ពស់ទឹកទន្លេមេគង្គក្រោម ទន្លេសាប និងទន្លេបាសាក់ ក៏នឹងបន្តហក់ឡើងផងដែរ។
មិនត្រឹមតែប៉ុណ្ណោះ ឥទ្ធិពលរបស់កូនព្យុះ តាឡាស និងប្រព័ន្ធសម្ពាធទាប ធ្វើឲ្យភ្លៀងបន្តធ្លាក់រាយប៉ាយនៅក្របខណ្ឌទូទាំងប្រទេសកម្ពុជា រហូតដល់ថ្ងៃទី ២១ កក្កដា។ នេះបើតាមសេចក្តីជូនដំណឹងរបស់ក្រសួងធនធានទឹក ស្តីពីស្ថានភាពអាកាសធាតុ និងកម្ពស់ទឹកទន្លេមេគង្គ ចុះថ្ងៃទី ១៦ កក្កដា។
បើតាមការព្យាករណ៍ កូនព្យុះនេះនឹងរំកិលខ្លួនចូលទៅក្នុងឈូងសមុទ្រកុងតឹង រួចបន្តដំណើរទៅដល់តំបន់ផ្ទៃរងទឹកភ្លៀងរបស់ទឹកទន្លេមេគង្គ ដែលបង្កឲ្យមានភ្លៀងធ្លាក់ច្រើននៅអាងទន្លេមេគង្គ ក្នុងប្រទេសថៃ និងប្រទេសឡាវ ចាប់ពីថ្ងៃទី ១៧ ដល់ថ្ងៃទី ២១ កក្កដា។
ប្រឈមនឹងបញ្ហានេះ ក្រសួងធនធានទឹក បានអំពាវនាវឲ្យ អាជ្ញាធរដែនដី និងប្រជាពលរដ្ឋ ដែលរស់នៅតាមដងទន្លេមេគង្គ ទន្លេសាប និងទន្លេបាសាក់ បង្កើនការយកចិត្តទុកដាក់ប្រុងប្រយ័ត្ន ចំពោះស្ថានភាពទឹកទន្លេ ដែលបន្តហក់ឡើងនេះ និងរួសរាន់ប្រមូលកសិផលឲ្យបានទាន់ពេលវេលា។ ចំណែកនៅតំបន់មាត់សមុទ្រវិញ អាជ្ញាធរក៏បានក្រើនរំឮកប្រជានេសាទ និងអ្នកធ្វើដំណើរតាមសមុទ្រទាំងអស់ឲ្យបង្កើនការប្រុងប្រយ័ត្នឲ្យបានខ្ពស់បំផុត។
លោក ចាន់ យុត្ថា អ្នកនាំពាក្យក្រសួងធនធានទឹក បានបញ្ជាក់ថា ក្នុងឆ្នាំ២០១៧នេះ របាយទឹកភ្លៀង នៅរដូវវស្សា អាចនឹងមានច្រើនជាងឆ្នាំមុន ហើយភូមិសាស្រ្តតំបន់ទំនាបកណ្តាល អាចនឹងរងជំនន់ទឹកភ្លៀងនៅពេលមានភ្លៀងធ្លាក់មកខ្លាំង។ ទន្ទឹមនឹងការរៀបចំប្រព័ន្ធរំដោះទឹកជំនន់ ខេត្តបន្ទាយមានជ័យ គឺជាខេត្តគួរឲ្យបារម្ភនឹងទឹកជំនន់ជាងគេ ដោយសារខេត្តនេះអាចនឹងរងជំនន់ទឹកភ្លៀងខ្លួនឯងផង ព្រមទាំងជំនន់ពីប្រទេសថៃផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ