កម្ពុជាជម្រុញឲ្យជប៉ុនវិនិយោគឲ្យបានមួយពាន់លានដុល្លារនៅក្នុងឆ្នាំ២០១៥
នៅក្នុងជំនួបទ្វេភាគីជាមួយរដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និង ឧស្សាហកម្មជប៉ុននៅព្រឹកថ្ងៃទី ២៧ មេសានេះ លោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មបានជម្រុញឲ្យភាគីជប៉ុនបន្តបង្កើនវិនិយោគបន្ថែមទៀតឲ្យបានមួយពាន់លានដុល្លារមកកាន់ប្រទេសកម្ពុជានៅក្នុងឆ្នាំ ២០១៥។ បើតាមលោករដ្ឋមន្ត្រី ការវិនិយោគរបស់ជប៉ុនមកកាន់ប្រទេសកម្ពុជាមានទឹកប្រាក់ប្រមាណតែប្រាំរយលានដុល្លារប៉ុណ្ណោះនៅក្នុងឆ្នាំ២០១៣ កន្លងមក។ជាការឆ្លើយតបរដ្ឋមន្ត្រីជប៉ុន លោក Toshimitsu Motegi បានសន្យាថា នឹងសិក្សាពិចារណាលើការជម្រុញនេះ។
ចុះផ្សាយនៅថ្ងៃ៖
ស្តាប់ - ០២:២៨
នៅក្នុងជំនួបទ្វេភាគីនោះ លោក ស៊ុន ចាន់ថុល បានជម្រុញឲ្យភាគីជប៉ុនពង្រីកទំហំការវិនិ យោគរបស់ខ្លួនឲ្យបានកាន់តែច្រើនបន្ថែមទៀតមកកាន់ប្រទេសកម្ពុជា ដោយសារបច្ចុប្បន្ន នេះការវិនិយោគរបស់ជប៉ុននៅមានកម្រិតទាបនៅឡើយ។
ជាការឆ្លើយតប លោក Toshimitsu Motegiរដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និង ឧស្សាហកម្មជប៉ុនបានសន្យាថា នឹងយកការជម្រុញនេះទៅធ្វើសិក្សាពិចារណា។ លោករដ្ឋមន្ត្រីជប៉ុនក៏បានលើកឡើងផងដែរពីគម្រោងរបស់ជប៉ុនក្នុងបញ្ជូនមន្ត្រី និង ក្រុមយុវជនជប៉ុនមកធ្វើការនៅកម្ពុជាដើម្បីសិក្សាពីគ្នាទៅវិញទៅមក។ ចំណែកលោករដ្ឋមន្ត្រីស៊ុន ចាន់ថុលក៏បានស្នើត្រឡប់ទៅវិញថា ជប៉ុនគួរតែជ្រើសរើសមន្ត្រី និង យុវជនកម្ពុជាទៅធ្វើការនៅប្រទេសជប៉ុនផងដែរដើម្បីសិក្សាពីគ្នាទៅវិញទៅមកដូចគ្នា។
លោក ស៊ុន ចាន់ថុលបានលើកឡើងពីសក្តានុពលរបស់ប្រទេសកម្ពុជាសម្រាប់ទាញទាក់ការវិនិយោគថា កម្ពុជាមានស្ថេរភាពម៉ាក្រូសេដ្ឋកិច្ច រដ្ឋាភិបាលបានយកដៃគូឯកជនជាសំខាន់សម្រាប់សេដ្ឋកិច្ចជាតិ និង ផ្តល់ការលើកទឹកចិត្តការវិនិយោគដែលល្អច្រើនជាងប្រទេសជិតខាង។ លោក រដ្ឋមន្ត្រីបានបញ្ជាក់ដល់អ្នកវិនិយោគទាំងអស់ថា ផលិតផលនៅកម្ពុជាអាចនាំចេញទៅសហគមអឺរ៉ុបបានដោយមិនបាច់បង់ពន្ធដោយសហគមអឺរ៉ុបបានលើកលែងពន្ធដល់ផលិតផលកម្ពុជា។ ម្យ៉ាងទៀត កម្ពុជាសម្បូរដោយធនធានធម្មជាតិ និងមានកម្លាំងពលកម្មច្រើនដែលជាកត្តាសំខាន់សម្រាប់ការវិនិយោគ។
ជាមួយគ្នានេះដែរ លោក ស៊ុន ចាន់ថុល បានអះអាងថា កម្ពុជាជាបេះដូងនៃប្រទេសអាស៊ីអាគ្នេយ៍ទាំង ១។ ដូច្នេះការដាក់វិនិយោគនៅក្នុងប្រទេសកម្ពុជាក៏ដូចជាការវិនិយោគនៅក្នុងទីផ្សារអាស៊ានទាំងមូលដែលមានប្រជាជន ៦០០ លាននាក់ និង អាចចែកចាយទៅកាន់ទីផ្សារអាមេរិក និង អឺរ៉ុបថែមទៀត។
ក្រោយជំនួបដ៏កម្រនេះ លោក ស៊ុន ចាន់ថុល សង្ឃឹមថា ជប៉ុននឹងបន្តបង្កើនការវិនិយោគរបស់ខ្លួនមកកាន់ប្រទេសកម្ពុជាបន្ថែមទៀត។
សូមបញ្ជាក់ថា ជប៉ុនជាប់ជាប្រទេសធំទី១១ក្នុងការវិនិយោគនៅក្នុងប្រទេសកម្ពុជា បន្ទាប់ប្រទេសកូរ៉េខាងត្បូង សហគមអឺរ៉ុប សហរដ្ឋអាមេរិក វៀតណាម និង ប្រទេសថៃ។ ចំណែកប្រទេសចិនជាប់ជាប្រទេសទី ១ ដែលបានវិនិយោគច្រើនបំផុតនៅក្នុងប្រទេសកម្ពុជា។នេះបើតាមយោងតាមតូរលេខរបស់ ក្រុមប្រឹក្សាអភិវឌ្ឍន៍កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ