យុវជន សហជីព និងអង្គការសមាគម ជួបជុំ ហែក្បួនដាក់ញត្តិសាទរទិវាយុវជនអន្តរជាតិ ថ្ងៃ១២សីហា
យុវជន សហជីព សមាគម និងអង្គការសង្គមស៊ីវិល ដែលធ្វើការលើវិស័យការងារ និងសិទ្ធិមនុស្ស រាប់សិបនាក់ បានជួបសាទរទិវាយុទ្ធជនពិភពលោក ថ្ងៃ១២សីហា។ ក្រោយពីជួបជុំ លើកបដា ថ្លែងការណ៍នៅទីលានប្រជាធិបតេយ្យ មុននឹងដើរហែក្បួនដាក់ញត្តិ នៅរដ្ឋសភា ក្រសួងអប់រំ និងក្រសួងការងារ ដើម្បីស្នើឲ្យស្ថាប័នទាំងបី ជួយដោះស្រាយនូវបញ្ហាចំនួន ១០ ចំនុច របស់យុវជន និងកម្មករនិយោជិក ដូចជា ការលុបបំបាត់អំពើពុករលួយ ធានាសុវត្ថិភាពការងារ បង្កើតទីផ្សារការងារ និងលើកស្ទួយសិទ្ធិកម្មករ ជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
យុវជនជាតំណាងសហភាព សហព័ន្ធ សហជីព សមាគម អង្គការសង្គមស៊ីវិល ដែលធ្វើការលើវិស័យការងារ និងសិទ្ធិមនុស្ស ប្រមាណ ១០ ស្ថាប័ន បានជួបជុំ លើកបដា និងថ្លែងការណ៍ នៅទីលានប្រជាធិបតេយ្យ នាព្រឹកថ្ងៃអង្គារ ទី១២សីហានេះ។
បញ្ហាប្រឈមរបស់យុវជន និងកម្មករនិយោជិក ដោយមានការបំបិទសិទ្ធិក្នុងការបញ្ចេញមតិ ការគំរាមកំហែង ការរើសអើងសហជីព ការងារទទួលបាននូវប្រាក់ខែតិច និងការអប់រំពុំសូវមានគុណភាព ជាដើម ទាំងអស់នេះ ត្រូវបានតំណាងបាតុករ លើកឡើងក្នុងពិធីជួបជុំ នៅព្រឹកមិញ។
លោក ស ម៉ូរ៉ា ប្រធានសហព័ន្ធសហជីពចំណីអាហារ និងសេវាកម្មកម្ពុជា បានកត់សម្គាល់ថា យុវជនកម្ពុជា សព្វថ្ងៃ នៅតែទទួលរងការរិតត្បិតរើសអើងឥតឈប់ឈរ ការរំលោភសិទ្ធិការងារ ការប្រើប្រាស់កិច្ចសន្យាការងារខ្លី និងបញ្ហាប្រាក់ឈ្នួលអប្បបរមា នៅមានកម្រិតនៅឡើយ។ បញ្ហារបស់យុវជន នាពេលសព្វថ្ងៃ រដ្ឋាភិបាលមិនទាន់បានចាត់វិធានការដ៏មានប្រសិទ្ធភាពនៅឡើយទេ។
បញ្ហាយុវជនទាំងអស់នេះ ត្រូវបានក្រុមសហជីពសមាគម លើកឡើងនូវបញ្ហា ១០ ចំណុច ដាក់ជូនរដ្ឋសភា ក្រសួងអប់រំ និងក្រសួងការងារ ដោះស្រាយ សម្រាប់ទិវាយុវជនពិភពលោក នៅថ្ងៃ១២សីហានេះ។ សំណូមពរទាំង ១០ ចំនុចនោះ រួមមាន៖ ស្នើសុំក្រសួងអប់រំ ត្រូវលុបបំបាត់ឲ្យបាននូវអំពើពុករលួយគ្រប់ស្ថាប័នអប់រំទូទៅ រដ្ឋាភិបាលត្រូវធានាឲ្យបាននូវទីផ្សារការងារសម្រាប់និស្សិតចប់មហាវិទ្យាល័យ ស្នើសុំបញ្ចុះតំលៃលិខិតឆ្លងដែននៅត្រឹម ២៥ ដុល្លារ ស្នើសុំរដ្ឋាភិបាលជួយបង្កើតការងារសម្រាប់យុវជន ស្នើសុំរាជរដ្ឋាភិបាលចេញច្បាប់ធានាសុវត្ថិភាព និងសិទ្ធិការងារសម្រាប់កម្មករចំណាកស្រុក ចេញប្រកាសស្តីពីសុខភាព និងសុវត្ថិភាពនៅកន្លែងការងារ និងគោរពលើកស្ទួយសិទ្ធិកម្មករសេដ្ឋកិច្ចក្រៅប្រព័ន្ធ និងបង្កើតកន្លែងប្រកបរបរសមរម្យ។ល។ និង។ល។
ក្រុមយុវជន និងសហជីពអង្គការសមាគម បានគូសបញ្ជាក់ក្នុងញត្តិថា ប្រសិនបើរដ្ឋសភា មិនបានជួយដោះស្រាយបញ្ហារបស់យុវជន ដែលបានលើកឡើងទាំង ១០ ចំណុចទេ គឺនៅពេលធ្វើសមាហរណកម្មអាស៊ាន នៅឆ្នាំ២០១៥ យុវជនកម្ពុជាកាន់តែប្រឈមនឹងបញ្ហាសិទ្ធិមនុស្ស កង្វះខាតទីផ្សារការងារជាងបច្ចុប្បន្ននេះជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ