ពលករខ្មែរធ្វើការនៅថៃមកលេងស្រុកមានការថយចុះ
ពលករខ្មែរធ្វើការនៅថៃបានធ្វើដំណើរត្រឡប់មកប្រទេស កំណើតវិញហើយដើម្បីចូលរួមពិធីបុណ្យចូលឆ្នាំថ្មីប្រពៃណីជាតិខ្មែរ ចាប់តាំងពីថ្ងៃទី១០មេសា រហូតមកដល់ថ្ងៃទី១២មេសា នេះ តាមច្រកទ្វារអន្តរជាតិប៉ោយប៉ែត។ តែឆ្នាំនេះចំនួនពលករមកលេងស្រុកមានការថយចុះជាងបណ្ដាឆ្នាំមុនៗ។ ហើយការថយចុះនេះ មន្ត្រីសង្គមស៊ីវិលប្រចាំការនៅទីនោះឲ្យដឹងថា មានការយកកម្រៃខ្ពស់នៅច្រកប៉ោយប៉ែត ដែលជាហេតុមួយធ្វើឲ្យពលករបង្វែរទិសដៅធ្វើដំណើរតាមច្រកឡែមនិង ជ្រៃសីម៉ា ខាងខេត្តបាត់ដំបងវិញ។
ចុះផ្សាយនៅថ្ងៃ៖
ស្តាប់ - ០១:២៥
ប៉ោយប៉ែតគឺជាច្រកមួយពេញនិយមក្នុងការធ្វើដំណើរចាកចេញរបស់ពលករខ្មែរក្នុងឱកាសនៃពិធីបុណ្យជាតិដូចជាៈ បុណ្យចូលឆ្នាំប្រពៃណីជាតិខ្មែរនិងពិធីបុណ្យភ្ជុំបិណ្ឌ។ប៉ុន្តែនៅឆ្នាំនេះ ច្រកប៉ោយប៉ែតរងការរិះគន់ពីមន្ត្រីសង្គមស៊ីវិល និង ពលរដ្ឋថា មានការចំណាយខ្ពស់ ទៅឲ្យភាគីថៃផងនិងខ្មែរផងតាមរយៈសេវាផ្សេងៗដើម្បីបានមកដល់ដីខ្មែរ។
លោក ស៊ុម ចាន់គា មន្ត្រីអាដហុកប្រចាំខេត្តបន្ទាយមានជ័យគត់សម្គាល់ឃើញទៀតថា ពលករខ្មែរប្រឈមនិងការចាប់ខ្លួនលើកដាក់ឡានបញ្ជូនត្រឡប់មកដីខ្មែរទៀតផងនៅពេលពួកគាត់ធ្វើដំណើរមកដល់ទីប្រជុំជនអារញ្ញ ដែលសព្វថ្ងៃស្ថិតនៅក្នុងខេត្តស្រះកែវ របស់ថៃ ។ ហើយពលករខ្មែរចូលក្នុងទឹកខ្មែរបានលុះត្រាតែមានបណ្ណអនុញ្ញាតពណ៌ស៊ីជម្ពូរ ។
លោក ង៉ោ ម៉េងជ្រួញ អភិបាលក្រុងប៉ោយប៉ែតឲ្យដឹងថា ចំនួនពលករខ្មែរធ្វើដំណើរត្រឡប់មកប្រទេសកំណើតវិញមានការថយចុះជាងបណ្ដាលឆ្នាំមុនៗចន្លោះពី៥ទៅ១០ភាគរយ។ មូលហេតុនៃការធ្លាក់ចុះនេះលោកអះអាងថា មកពីពលករខិតខំធ្វើការនៅប្រទេសថៃជាអ្វីដែលលោកយល់ថា កុំឲ្យខាតពេលវេលានិងថវិកា។
លោកបានបដិសេពថា ការចូលក្នុងទឹកដីខ្មែរជាថ្នូរជាមួយការចំណាយច្រើនព្រោះថា មុននេះតែប៉ុន្មានថ្ងៃពលករខ្មែរសម្រុកមកច្រើនដែលនាំឲ្យមានការកកស្ទះចរាចរ ហើយអាជ្ញាធរក៏បានរៀបចំសណ្ដាប់ធ្នាប់និងបញ្ចៀសចរាចរមិនឲ្យមានការកកស្ទះដូចបណ្ដាលឆ្នាំមុនៗដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ