លីកាដូ៖ ពន្ធនាគារនៅកម្ពុជា មានការរំលោភបំពាន ការរើសអើង ការកេងប្រវ័ញ្ច និងអំពើពុករលួយ
អង្គការ លីកាដូ ចេញផ្សាយនូវរបាយការណ៍ថ្មីមួយ ស្តីអំពី ស្ថានភាពបច្ចុប្បន្ននៃពន្ធនាគារកម្ពុជា និងសិទ្ធិមនុស្ស។ របាយការណ៍ស្តីអំពី “សិទ្ធិនៅលើការទិញដូរ៖ ជីវិតនៅក្នុងពន្ធនាគារកម្ពុជា” រៀបរាប់យ៉ាងលម្អិតលើការរំលោភបំពាន ការរើសអើង ការកែងប្រវ័ញ្ច និងអំពើពុករលួយ ដែលកំពុងបន្តកើតមានឡើង និងជាលក្ខណៈប្រព័ន្ធក្នុងប្រព័ន្ធពន្ធនាគារក្នុងប្រទេសកម្ពុជា។ តាមលីកាដូ ទោះបីជាបានចាប់ផ្តើមជំហានក្នុងការកែទម្រង់ក៏ដោយ ក៏ឧបសគ្គមួយចំនួន នៅតែមាន ដូចជា ភាពចង្អៀតណែនក្នុងពន្ធនាគារ រចនាសម្ព័ន្ធគ្រប់គ្រងនៅមានភាពខ្វះខាត ខ្វះមធ្យោបាយធ្វើដំណើរទៅសាលាឧទ្ធរណ៍ ខ្វះខាតក្នុងការអនុវត្តច្បាប់ និងកង្វះសមត្ថភាពខាងចំណេះដឹងក្នុងចំណោមមន្ត្រីពន្ធនាគារមួយចំនួន។
ចុះផ្សាយនៅថ្ងៃ៖
ស្តាប់ - ០២:៣៩
របាយការណ៍ ស្តីពី “សិទ្ធិនៅលើការទិញដូរ៖ ជីវិតនៅក្នុងពន្ធនាគារកម្ពុជា” ត្រូវបានអង្គការលីកាដូ ចេញផ្សាយ នៅថ្ងៃអង្គារ ទី២០មករា។ របាយការណ៍បង្ហាញថា បើទោះជាពន្ធនាគារកម្ពុជា មានភាពខុសប្លែកគ្នាបែបនេះក៏ដោយ ក៏នៅមានកត្តាមួយចំនួន ដែលបង្ហាញនូវលក្ខណៈទូទៅរបស់ប្រព័ន្ធពន្ធនាគារទាំងមូល។ ភាពចង្អៀតណែន និងភាពខ្វះអនាម័យ ជាបញ្ហាទូទៅរបស់ពន្ធនាគារ ហើយអំពើពុករលួយក៏នៅតែមានផងដែរ។
លីកាដូ លើកឡើងថា សម្រាប់ជនជាប់ឃុំភាគច្រើន លុយជាកត្តាដែលកំណត់នូវស្ថានភាពនៃការឃុំឃាំង ការប្រព្រឹត្តមកលើជនជាប់ឃុំ ការមកសួរសុខទុក្ខរបស់គ្រួសារ និងការទទួលបាននូវសេចក្តីត្រូវការចាំបាច់មួយចំនួន ដូចជា អាហារ ទឹក ពន្លឺថ្ងៃ និងខ្យល់ចេញចូលធម្មជាតិ ជាដើម។ រចនាសម្ព័ន្ធដឹកនាំក្នុងបន្ទប់ពន្ធនាគារ ដែលមានអំណាច និងភាពគ្មានរបៀបរៀបរយ បានជះឥទ្ធិពលដល់ជីវិតដែលរស់នៅ និងអនុវត្តដោយមានអំពើនិទណ្ឌភាព។ ក្នុងនោះ កម្រិតនៃការឃុំខ្លួនបណ្តោះអាសន្ន រង់ចាំសវនាការនៅខ្ពស់នៅឡើយ ជាពិសេសក្នុងចំណោមស្ត្រី និងអនីតិជន។
អ្នកស្រី នូ សមអន អ្នកគ្រប់គ្រងគម្រោងពន្ធនាគារនៃអង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ បានលើកឡើងថា “បញ្ហាក្នុងប្រព័ន្ធពន្ធនាគារកម្ពុជា គឺមានលក្ខណៈស្មុគស្មាញច្រើន ហើយគួរឲ្យសោកស្តាយ យើងមិនទាន់ឃើញមានការប្តេជ្ញាចិត្តពិតប្រាកដ ក្នុងការស្វែងរកដំណោះស្រាយរយៈពេលយូរនៅឡើយនោះទេ។ អ្នកស្រី បន្ថែមថា វិធានការជម្រើសផ្សេង ក្រៅពីការដាក់ពន្ធនាគារនៅមិនទាន់ត្រូវបានយកមកពិចារណាឲ្យបានត្រឹមត្រូវនៅឡើយនោះទេ ដោយមនុស្សជាច្រើន ដែលត្រូវបានគេឃុំខ្លួនក្នុងពន្ធនាគារ ក្នុងករណីមិនចាំបាច់។
នៅក្នុងរបាយការណ៍ដដែល លីកាដូ បានសន្និដ្ឋានថា អាជ្ញាធរពន្ធនាគារ នឹងនៅតែមិនអាចបំពេញតួនាទីរបស់ខ្លួន ឲ្យបានពេញលេញក្នុងការធានាឲ្យមានការអប់រំ ការស្តារនីតិសម្បទា និងការថែរក្សាបរិស្ថាន ប្រកបដោយប្រសិទ្ធភាពបានឡើយ។ ដើម្បីសម្រេចបានការផ្លាស់ប្តូរពិតប្រាកដ តុលាការ ត្រូវតែស្វែងយល់អំពីផលប៉ះពាល់នៃគោលនយោបាយ ក្នុងការផ្តន្ទាទោសពន្ធនាគាររបស់តុលាការ។ អាជ្ញាធរពន្ធនាគារ ត្រូវតែងាកចេញពីការរីករាលដាលនៃអំពើពុករលួយ និងឥទ្ធិពលនៃអំណាចក្នុងការគ្រប់គ្រងបន្ទប់ពន្ធនាគារ។
លីកាដូ បានស្រាវជ្រាវក្នុងពន្ធនាគារចំនួន ១៨ កន្លែង ដែលត្រូវបានឃ្លាំមើលជាទៀងទាត់ ដោយរួមទាំងការសម្ភាសន៍ជនជាប់ឃុំ អតីតអ្នកជាប់ឃុំ គ្រួសាររបស់ជនជាប់ឃុំ ការជួបប្រជុំជាមួយប្រធានពន្ធនាគារ និងមន្ត្រីពន្ធនាគារ។
អគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ លោកឧត្តមសេនីយ៍ឯក គុយ ប៊ុនសន បានច្រានចោលរបាយការណ៍របស់លីកាដូខាងលើ ព្រោះលោកថា មិនអព្យាក្រឹត្យនោះទេ។ លោកឧត្តមសេនីយ៍ អះអាងថា ពន្ធនាគារនៅកម្ពុជាទាំងអស់ បើកចំហរ បើសិនជាអ្នកកាសែត ចង់ចូលមើល។
របាយការណ៍របស់អគ្គនាយកដ្ឋានពន្ធនាគារ បង្ហាញថា គិតត្រឹមថ្ងៃទី១៥ ខែធ្នូ ឆ្នាំ២០១៤ មានអ្នកជាប់ឃុំក្នុងពន្ធនាគារទូទាំងប្រទេសចំនួន ២៦ កន្លែង សរុប ១៥.១៦៨ នាក់ ក្នុងនោះ មានស្ត្រី ១.២១២ នាក់ ហើយអ្នកដែលកាត់ទោសរួច មាន ៥.៣៥៣ នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ