កម្ពុជា-ចិនសន្យាពង្រឹងចំណងមិត្តភាពបន្ថែមទៀត
តំណាងរដ្ឋាភិបាលកម្ពុជា និងចិនបានសន្យាបន្តពង្រឹងមិត្តភាព និងសហប្រតិបត្តិការទ្វេភាគីអោយកាន់តែស៊ីជម្រៅថែមទៀត។ ការសន្យាត្រូវបានធ្វើឡើងនៅក្នុងជំនួបរវាងលោកជា គីងលីន ប្រធានគណៈកម្មាធិការជាតិនៃការិយាល័យក្រុមប្រឹក្សានយោបាយនៃប្រជាជនចិន និងលោកឧបនាយករដ្ឋមន្ត្រីហោ ណាំហុងរដ្ឋមន្ត្រីការបរទេសកម្ពុជានៅក្នុងប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៧
ប្រមុខការទូតកម្ពុជាលោកឧបនាយករដ្ឋមន្ត្រីហោ ណាំហុងបានបញ្ចប់ទស្សនកិច្ចផ្លូវការនៅក្នុងប្រទេសចិនហើយ ហើយនឹងមកដល់រាជធានីភ្នំពេញវិញនៅយប់ថ្ងៃអង្គារទី៧កុម្ភៈនេះ។
បណ្តាញសារព័ត៌មានរបស់ប្រទេសចិនបានផ្សាយអោយដឹងអំពីការសន្យារវាងតំណាងរដ្ឋាភិបាលទាំងពីរកម្ពុជាចិន ក្នុងការពង្រឹងមិត្តភាព និងសហប្រតិបត្តិការទ្វេភាគីអោយកាន់តែជ្រាលជ្រៅថែមទៀត។ សេចក្តីថ្លែងការណ៍ទាំងនេះត្រូវបានធ្វើឡើងនៅក្នុងជំនួបកាលពីថ្ងៃចន្ទរវាងលោក ជា គីងលីន ប្រធានគណៈកម្មាធិការជាតិនៃការិយាល័យក្រុមប្រឹក្សានយោបាយនៃប្រជាជនចិន និងលោកឧបនាយករដ្ឋមន្ត្រីហោ ណាំហុងរដ្ឋមន្ត្រីការបរទេសកម្ពុជា។
ប៉ុន្តែបើយោងតាមសារព័ត៌មានរដ្ឋចិន ភាគីទាំងពីរមិនបាននិយាយត្រឹមតែសហប្រតិបត្តិការទ្វេភាគីនោះឡើយ។ លោក ជា គីងលីនក៏បានសន្យាពង្រីកសហប្រតិបត្តិការអាស៊ាន ចិន ផងដែរក្នុងខណៈដែលកម្ពុជាកំពុងធ្វើជាម្ចាស់នៃសមាគមនេះ។ លោក ហោ ណាំហុងវិញបានអះអាងអោយដឹងផងដែរថា កម្ពុជានឹងធ្វើយ៉ាងណាដើម្បីលើកតម្កើងអាស៊ាន ក៏ដូចជាអាស៊ានជាមួយអាស៊ីខាងកើតផងដែរ។
វត្តមានរបស់ប្រមុខការទូតកម្ពុជានៅក្នុងប្រទេសចិនប្រជាមានិតនៅពេលនេះ កើតមានឡើងតាមរយៈការអញ្ជើញរបស់រដ្ឋមន្ត្រីការបរទេសចិនលោកយ៉ាង ជាឈី។ នេះគឺជាទស្សនកិច្ចលើកដំបូងរបស់លោកប្រមុខការទូតកម្ពុជានៅក្នុងប្រទេសចិន បន្ទាប់ពីកម្ពុជាបានក្លាយជាម្ចាស់ផ្ទះអាស៊ាន ហើយកម្ពុជាបានប្រកាសសន្យាជួយសម្របសម្រួលនៅក្នុងជម្លោះដែនកោះនៅក្នុងសមុទ្រចិនខាងត្បូងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ