ជារៀងរាល់ឆ្នាំ នៅថ្ងៃទី ១៤ មិថុនា ប្រទេសជាសមាជិកអង្គការសុខភាពពិភពលោកទាំងអស់នឹងប្រារព្ធ ទិវាពិភពលោកនៃអ្នកបរិច្ចាគឈាម។ ឆ្នាំ២០១៣នេះ ប្រទេសបារាំង គឺជាម្ចាស់ផ្ទះទទួលរៀបចំកម្មវិធី។ ប្រទេសបារាំងដែលបានជំរុញឱ្យមានការផ្តល់ឈាម ដោយស្ម័គ្រចិត្តនិងដោយឥតគិតថ្លៃតាំងពីឆ្នាំ១៩៥០មក។ នៅកម្ពុជាវិញ បើតាមតួលេខឆ្នាំ ២០០៩ មានការបរិច្ចាគតែ៣០%នៃតម្រូវការប៉ុណ្ណោះ។ កម្មវត្ថុនៃទិវាពិភពលោកនេះ គឺជំរុញឱ្យមានការស្តុកឈាម និងប្រមូលឈាមប្រកបសុវត្ថិភាព ព្រមទាំងចង់ថ្លែងអំណរគុណដល់អ្នកបរិច្ចាគឈាមទាំងអស់ ដែលបានសំដែងកាយវិការគួរឱ្យគោរព និងមានទឹកចិត្តជាអ្នកសង្គ្រោះ។ ឆ្នាំនេះ ការប្រារព្ធខួប១០ឆ្នាំនៃទិវាអ្នកបរិច្ចាគឈាម ប្រព្រឹត្តទៅក្រោមប្រធានបទ « បរិច្ចាគឈាម គឺជាការសង្គ្រោះជីវិត"។
ផ្តល់ឈាមម្តង អាចជួយសង្គ្រោះជីវិតបានដល់ទៅ បីនាក់!
ជារៀងរាល់ឆ្នាំ មានការបរិច្ចាគឈាមប្រមាណជាង ៩២លាននាក់ នៅលើពិភពលោក ក្នុងនោះពាក់កណ្តាលជាអ្នកស្ម័គ្រចិត្តរស់នៅក្នុងប្រទេសអ្នកមាន ប្រទេសអភិវឌ្ឍន៍ ដែលតំណាងឱ្យតែ១៥%នៃប្រជាជនសរុបលើលោកប៉ុណ្ណោះ។ ប៉ុន្តែអ្នកជំងឺច្រើនណាស់ដែលត្រូវការឈាមជាបន្ទាន់ដើម្បីសង្គ្រោះជីវិត មិនអាចរកឈាមយកមកបញ្ចូលបាន ជាពិសេសនៅក្នុងប្រទេសក្រីក្រកំពុងអភិវឌ្ឍន៍។ ប្រទេសជាច្រើន ខ្វះទាំងបរិមាណ និងទាំងគុណភាព សុវត្ថិភាពឈាម ក្នុងការផ្តល់ជូនអ្នកជំងឺ។
ជាទូទៅ ការប្រើប្រាស់ឈាម មានលក្ខណៈខុសគ្នាស្រឡះ រវាងប្រទេសអ្នកមានប្រាក់ចំណូលខ្ពស់ និងទាប។ ក្នុងប្រទេសក្រីក្រ អំណោយឈាមត្រូវបានយកទៅប្រើប្រាស់តែក្នុងករណីសង្គ្រោះបន្ទាន់ពេលស្ត្រីឆ្លងទន្ល ឬ កង្វះឈាមធ្ងន់ធ្ងរវិះស្លាប់ប៉ុណ្ណោះ។ ឯនៅប្រទេសអ្នកមាន រាល់ការវះកាត់បេះដូង ប្តូរសរីរាង្គ ឬការព្យាបាលប្រឆាំងនឹងជំងឺមហារីក សុទ្ធតែបានទទួលការបញ្ចូលឈាម។
ការបរិច្ចាគឈាម ជាជំនួយឧបត្ថម្ភជីវិត
ដើម្បីឱ្យឈាមបំរុង ឆ្លើយតបបានយ៉ាងប្រាកដទៅនឹងតម្រូវការ តោងប្រមូលឈាម ពីអ្នកស្ម័គ្រចិត្ត និងដោយឥតគិតថ្លៃ។ អ្នកផ្តល់ឈាមជាអចិន្ត្រៃយ៍ ជាប្រភពផ្តល់ឈាម ប្រកបដោយសុវត្ថិភាពខ្ពស់ ព្រោះពួកគាត់កម្រជាអ្នកមានផ្ទុកមេរោគ អាចចម្លងដោយឈាម ជាងអ្នកស្ម័គ្រចិត្តផ្តល់ឈាម ជាបន្ទាន់ ដែលជាសមាជិកក្រុមគ្រួសារអ្នកជំងឺ ឬអ្នកផ្តល់ឈាមដើម្បីថវិកា។
ហេតុដូច្នេះហើយ បានជា អង្គការសុខភាពពិភពលោក បានកំណត់កម្មវត្ថុ នាឱកាសទិវាពិភពលោកនៃអ្នកផ្តល់ឈាមឆ្នាំ២០១៣ នេះ សូមឱ្យប្រទេសជាសមាជិកអង្គការទាំងមូល ខិតខំធ្វើយ៉ាងប្រមូលឈាមបំរុងទុក ឱ្យបានគ្រប់គ្រាន់ និងមានគុណភាព ដោយយកតែពីអ្នកស្ម័គ្រចិត្ត និងដោយគិតថ្លៃ មកសង្គ្រោះជីវិតអ្នកជំងឺ ឱ្យបានទាំងស្រុង នៅឆ្នាំ២០២០។
មិនតែប៉ុណ្ណោះ អង្គការសុខភាពពិភពលោក បានជំរុញប្រទេសជាសមាជិកឱ្យចេះ លើកទឹកចិត្ត ថ្លែងអំណរគុណអ្នកបរិច្ចាគឈាម ដោយស្ម័គ្រចិត្ត និងឥតគិតថ្លៃ ដើម្បីឱ្យពួកគាត់បន្តធ្វើការផ្តល់ឈាម និងចេះលើកទឹកចិត្ត ដល់អ្នកមានសុខភាពល្អ មិនធ្លាប់បរិច្ចាគឈាម ជាពិសេសយុវជន ឱ្យហ៊ានធ្វើការបរិច្ចាគ។ ការបរិច្ចាគ ត្រូវស្ថិតនៅជាការស្ម័គ្រចិត្ត និងដោយគ្មានគិតថ្លៃ។
សូមអញ្ជើញចូលរួមធ្វើការបរិច្ចាគឈាម ដើម្បីសង្គ្រោះជីវិត ព្រោះការបរិច្ចាគនេះ នឹងអាចជួយគ្រួសារមួយ ជីវិតមួយ នៅថ្ងៃនេះ ឬនៅថ្ងៃស្អែក ឱ្យរួចពីសេចក្តីស្លាប់ ! ឯលោកអ្នកវិញ មិនបានខាតបង់អ្វី ! ឈាមលោកអ្នកដែលបូមចេញនឹងត្រូវបំពេញមកវិញ ក្នុងពេលដ៏ខ្លីបំផុត។
អន្តរាគមន៍ដោយលោក វេជ្ជបណ្ឌិត ហុង គឹមចេង អនុប្រធានមជ្ឈមណ្ឌលជាតិផ្តល់ឈាម នៃក្រសួងសុខាភិបាលកម្ពុជា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ