ក្រុមហ៊ុនផ្សារមូលបត្រកម្ពុជាផ្សព្វផ្សាយពីនីតិវិធីច្បាប់ ក្នុងការចុះបញ្ជីក្រុមហ៊ុន
ក្រុមហ៊ុនផ្សារមូលបត្រកម្ពុជា នៅព្រឹកថ្ងៃទី ៣០ មេសានេះ បានបើកសិក្ខាសាលាមួយ ក្រោមប្រធានបទ “ការត្រៀមខ្លួនផ្នែកច្បាប់សម្រាប់ការចុះបញ្ជី” ដើម្បីផ្សព្វផ្សាយពីនីតិវិធីច្បាប់នានាក្នុងការចុះបញ្ជីក្រុមហ៊ុន ដែលមានការចាប់អារម្មណ៍ ក្នុងទីផ្សារភាគហ៊ុននេះ។ បច្ចុប្បន្នក្រុមហ៊ុនផ្សារមូលបត្រកម្ពុជា មានតែក្រុមហ៊ុន រដ្ឋាករទឹកមួយប៉ុណ្ណោះ ដែលបានចុះបញ្ជី ខណៈដែលក្រុមហ៊ុនមួយចំនួនទៀត បានចាប់អារម្មណ៍ ប៉ុន្តែមិនទាន់សម្រេចចិត្តក្នុងការចុះបញ្ជីនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
នេះជាលើកទីបីហើយ ដែលក្រុមហ៊ុនផ្សារមូលបត្រកម្ពុជា បានបើកសិក្ខាសាលាផ្សព្វផ្សាយពីនីតិវិធីច្បាប់សម្រាប់ការចុះបញ្ជីក្រុមហ៊ុន។ សិក្ខាសាលានេះធ្វើឡើង ដើម្បីផ្សព្វផ្សាយពីនីតិវិធីច្បាប់ក្នុងការចុះបញ្ជី និង ផ្តល់ចំណេះដឹងបន្ថែមពាក់ព័ន្ធនឹងលក្ខខណ្ឌផ្នែកច្បាប់នានា សម្រាប់ក្រុមហ៊ុន ដែលមានបំណងចង់ចូលផ្សារហ៊ុន ក៏ដូចជាក្រុមហ៊ុន ដែលកំពុងតែស្ថិតក្នុងដំណើរការរៀបចំខ្លួនផងដែរ។
លោក ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជា បាននិយាយឲ្យដឹងថា សិក្ខាសាលានេះនឹងផ្តល់ឲ្យក្រុមហ៊ុនដែលមានបំណងចង់ចុះបញ្ជីដឹងពីកាតព្វកិច្ចរបស់ខ្លួន ដឹងពីដំណើរការនីមួយៗនៃការរៀបចំខ្លួន ក្នុងការចុះបញ្ជីចូលផ្សារហ៊ុន។ បើតាមអគ្គនាយករូបនេះ មានក្រុមហ៊ុនប្រមាណ ១០ បានចាប់អារម្មណ៍នឹងការចូលផ្សារហ៊ុននេះ ខណៈមួយចំនួនបានកំពុងរៀបចំខ្លួនខ្លះៗ ក្នុងការចុះបញ្ជីក្នុងផ្សារហ៊ុន។ លោក ហុង សុហួរ បានបញ្ជាក់ថា នៅខែក្រោយនេះក្រុមហ៊ុនកាត់ដេរមួយរបស់តៃវ៉ាន់ គ្រោងនឹងធ្វើការចុះបញ្ជី ស្របពេលដែលក្រុមហ៊ុនមួយ ឫ ពីរផ្សេងទៀត ក៏គ្រោងនឹងធ្វើការចុះបញ្ជី នៅមុនដំណាច់ឆ្នាំ២០១៤នេះ។
ចំពោះលក្ខខណ្ឌផ្លូវច្បាប់វិញ លោក លី តៃសេង នាយកប្រតិបត្តិនៃក្រុមហ៊ុនមេធាវី HBS LAW បានពន្យល់ថា ដើម្បីចុះបញ្ជីនៅក្នុងទីផ្សារមូលបត្រកម្ពុជា ជាដំបូងក្រុមហ៊ុន ដែលចាប់អារម្មណ៍ត្រូវដាក់ពាក្យសុំជាមុនសិន ហើយក្រុមហ៊ុនទីផ្សារមូលបត្រកម្ពុជា នឹងធ្វើការត្រួតពិនិត្យពីលទ្ធភាព និង លក្ខខណ្ឌផ្សេង។ បន្ទាប់មក ក្រុមហ៊ុននោះ ត្រូវរៀបចំក្រុមការងារ ដើម្បីបោះផ្សាយ ហើយត្រូវជូនដំណឹងទៅគណៈកម្មការមូលបត្រកម្ពុជាផងដែរ។ ក្រោយមកត្រូវរៀបចំឯកសារព័ត៌មានបញ្ជូនទៅគណៈកម្មការមូលបត្រកម្ពុជា ដើម្បីធ្វើការពិនិត្យ និងអនុញ្ញាត។ លោក លី តៃសេង បានគូសបញ្ជាក់ថា ប្រសិនបើក្រុមហ៊ុនមានការរៀបចំបានត្រឹមត្រូវនោះ រយៈពេលនៃដំណើរការចុះបញ្ជីអាចពី ៦ ខែ ទៅ មួយឆ្នាំ។
សូមបញ្ជាក់ថា តាំងពីបានបង្កើតឡើងកាលពីឆ្នាំ ២០១១ មក ក្រុមហ៊ុនទីផ្សារមូលបត្រកម្ពុជាមានតែក្រុមហ៊ុន រដ្ឋាករទឹកស្វ័យតក្រុងភ្នំពេញមួយប៉ុណ្ណោះ ដែលបានចុះបញ្ជី និង កំពុងដំណើរការលក់ហ៊ុនរបស់ខ្លួន។ចំណែកក្រុមហ៊ុនផ្សេងៗទៀត បានត្រឹមតែចាប់អារម្មណ៍ និង គ្រោងចុះបញ្ជី តែមិនទាន់បានចុះបញ្ជីជាផ្លូវការនៅឡើយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ