បុគ្គលិកប្រេងសាំងកាល់តិចផ្ទុះការតវ៉ាជាថ្មី និងត្រៀមប្តឹងទៅកាន់ក្រសួង និងក្រុមប្រឹក្សាអាជ្ញាកណ្តាល
បុគ្គលិកក្រុមហ៊ុនប្រេងសាំងកាល់តិចប្រមាណជា១០០នាក់ មិនបានចូលធ្វើការនៅឡើយទេ ដោយពួកគេបានបន្តការតវ៉ាជាថ្មី តាំងពីថ្ងៃសុក្រ និងបន្តរហូតមកដល់ថ្ងៃសៅរិ៍នេះ។ ការតវ៉ា ដោយសារថា ភាគីក្រុមហ៊ុនបានតំរូវអោយពួកគេចុះកិច្ចសន្យាការងារថ្មី ដែលមានលក្ខណៈបំបិទសិទ្ធិសេរីភាពការងារ។ តែយ៉ាងណាក៍ដោយ បុគ្គលិកទាំងជាង១០០នាក់ នឹងចូលធ្វើការងារឡើងវិញ ចាប់ពីថ្ងៃអាទិត្យស្អែកនេះ តែក៍ត្រៀមដាក់ពាក្យបណ្តឹងទៅកាន់ក្រសួងការងារ និងក្រុមប្រឹក្សាអាជ្ញាកណ្តាលថែមទៀត ដើម្បីបង្ខំអោយភាគីក្រុមហ៊ុនគោរពតាមកិច្ចព្រមព្រៀងកន្លងមក។
ចុះផ្សាយនៅថ្ងៃ៖
ស្តាប់ - ០២:០៤
យ៉ាងហោចណាស់មានបុគ្គលិកក្រុមហ៊ុនប្រេងសាំងកាលតិច១០០នាក់ មកពី៦សាខា ក្នុងចំនោម១៨សាខានៅទូទាំងរាជធានីភ្នំពេញ មិនទាន់ចូលធ្វើការនៅឡើយទេ និងបានបន្តការតវ៉ារហូតដល់ថ្ងៃសៅរិ៍នេះ ក្រោយពីពួកគេបានចោទប្រកាន់ភាគីក្រុមហ៊ុនថា បានរំលោភលើលក្ខណការងារ និងកិច្ចព្រមព្រៀងបញ្ចប់ជំលោះ កាលពីថ្ងៃទី២១ឧសភា។ ជាកិច្ចព្រមព្រៀងដែលភាគីក្រុមហ៊ុនបានសំរេចបន្ថែមប្រាក់ចំនួន២០ដុល្លា ទៅលើប្រាក់ខែគោលរបស់បុគ្គលិកគ្រប់ផ្នែកទាំងអស់។ តាមកិច្ចព្រមព្រៀងនោះ ក្រុមបុគ្គលិកអនាម័យនឹងទទួលបាន១២០ដុល្លារ ក្រុមចាក់សាំង១៣០ដុល្លារ ក្រុមដូរប្រេង១២០ដុល្លារ បេឡា១៥០ដុល្លារ និងអ្នកឆុងកាហ្វេ១៥០ដុល្លារ។
ក៍ប៉ុន្តែនៅពេលដែលបុគ្គលិកអ្នកតវ៉ាបានយល់ព្រមចូលធ្វើការវិញនៅថ្ងៃទី២២ឧសភានោះ បែរជាត្រូវភាគីក្រុមហ៊ុនតំរូវអោយពួកគេ ចុះកិច្ចសន្យាការងារថ្មី។ កិច្ចសន្យាការងារថ្មី ដែលហាមមិនអោយបុគ្គលិកក្រុមហ៊ុន ចូលរួមធ្វើបាតុកម្មនៅពេលអនាគត ហើយថា ភាគីក្រុមហ៊ុនត្រូវការពេល២ខែទៀត ដើម្បីសិក្សាពីបញ្ហាប្រាក់ខែដែលត្រូវតំឡើងអោយកម្មករ។
លោក ស ម៉ូរ៉ា ប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា បានប្រាប់វិទ្យុបារាំងអន្តរជាតិក្រោយពីបានប្រជុំជាមួយបុគ្គលិកអ្នកតវ៉ាកាលពីព្រឹកថ្ងៃសៅរិ៍នេះថា បុគ្គលិកឈប់តវ៉ារឿងប្រាក់ឈ្នួលហើយ តែការតវ៉ានេះ ដោយសារក្រមហ៊ុនបានចេញកិច្ចសន្យាការងារថ្មី ដែលមានលក្ខណៈរឹតត្បិតលើបុគ្គលិក។ តែយ៉ាងណាក៍ដោយ លោក ស ម៉ូរ៉ា បានបញ្ជាក់ថា ក្រោយពីបានជួបប្រជុំនៅថ្ងៃសៅរិ៍នេះ បុគ្គលិកក្រុមហ៊ុនប្រេងសាំងកាល់តិចជាង ១០០នាក់នេះ នឹងចូលធ្វើការវិញ ចាប់ពីថ្ងៃអាទិត្យទី២៥ឧសភាតទៅ។
ប៉ុន្តែជាមួយគ្នានេះ សហជីពរបស់លោក នឹងតំណាងអោយបុគ្គលិកទាំងអស់ ដើម្បីសរសេរពាក្យបណ្តឹងដាក់ទៅកាន់ក្រសួងការងារ និងក្រុមប្រឹក្សាអាជ្ញាកណ្តាល ដើម្បីចាប់បង្ខំអោយភាគីក្រុមហ៊ុនអនុវត្តន៍លក្ខណ្ឌការងារនៅក្នុងប្រទេសកម្ពុជា ពិសេសគោរពទៅតាមកិច្ចព្រមព្រៀងបញ្ចប់ជំលោះកាលពីថ្ងៃទី២២ឧសភាកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ