ព្រះមហាក្សត្រអំពាវនាវជាថ្មីឲ្យមានសាមគ្គីភាពក្រោមដំបូលរដ្ឋធម្មនុញ្ញ
មិទ្ទិញមហាជន ដែលមានមនុស្សចូលរួមរាប់ម៉ឺននាក់ ដើម្បីអបអរខួប ១០ឆ្នាំនៃការឡើងគ្រងរាជសម្បត្តិ របស់ព្រះករុណា ព្រះបរមនាថ នរោត្តម សីហមុនី បានបញ្ចប់ទៅហើយ នៅព្រឹកនេះ។ ពិធីដ៏នក្ខត្តឫក្ស ដែលមានការចូលរួមពីមេដឹកនាំជាន់ខ្ពស់នៃគណបក្សជាប់ឆ្នោតទាំងពីរ ត្រូវគេមើលឃើញថា បានបង្ហាញនូវការឯកភាពជាតិមួយ នៅក្នុងក្រោមម្លប់ព្រះមហាក្សត្រ។បន្ទាប់ពីមានព្រះរាជសង្កថាលើកឡើង ពីសមិទ្ធិផលនានា របស់រដ្ឋាភិបាល ព្រះមហាក្សត្រក៏បានអំពាវនាវ ដល់ខ្មែរគ្រប់ព័ណ៌សម្បុរឲ្យសាមគ្គីគ្នា ដើម្បីរួមគ្នាអភិវឌ្ឍន៍ប្រទេសជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៥
គឺជាការថ្លែងព្រះរាជសង្កថា របស់ព្រះមហាក្សត្រកម្ពុជាសម្តេចព្រះបរមនាថ នរោត្តម សីហមុនី ពីនៅលើវេទិកាប្រាសាទចន្ទឆាយា បែរព្រះភ័ក្រ្តទៅរកមហាជន ដែលមានប្រជាពលរដ្ឋ មន្ត្រីរាជការ សិស្ស និស្សិត និងកងកម្លាំងប្រដាប់អាវុធ ប្រមាណជា ២ម៉ឺននាក់ នៅក្នុងឱកាសនៃមិទ្ទិញអបអរសាទរខួបអនុស្សាវរីយ៍ លើកទី១០ នៃការឡើងគ្រងរាជសម្បត្តិរបស់ព្រះអង្គ។
ពិធីដែលបានរៀបចំ ដោយមានមហាជនច្រើនកុះករ នៅព្រឹកថ្ងៃពុធនេះ ក៏បានចូលរួមផងដែរពីថ្នាក់ដឹកនាំជាន់ខ្ពស់នៃគណបក្សនយោបាយជាប់ឆ្នោតទាំងពីរ ក្នុងនោះមានលោក ហេង សំរិន ប្រធានរដ្ឋសភា លោកនាយករដ្ឋមន្ត្រីហ៊ុន សែន លោក សម រង្សី ប្រធានគណបក្សសង្គ្រោះជាតិ លោក កឹម សុខា អនុប្រធានទី១ រដ្ឋសភា និងជាអនុប្រធានគណបក្សប្រឆាំង ព្រមទាំងអង្គទូតនានា ប្រចាំនៅប្រទេសកម្ពុជា។ តែសម្តេចម៉ែ និង ប្រធានព្រឹទ្ធសភា លោក ជា ស៊ីម និងជាប្រធានគណបក្សប្រជាជនកម្ពុជា ដែលមានជម្ងឺប្រចាំកាយ មិនមានវត្តមានទេ។
លោក អ៊ុំ ដារ៉ាវុធ ទីប្រឹក្សា អមព្រះរាជលេខាធិការដ្ឋានសម្តេចម៉ែ ថ្លែងប្រាប់វិទ្យុបារាំង RFI នៅព្រឹកនេះដែរថា សម្តេចម៉ែមិនមានវត្តមាន ដោយហេតុថាជាពិធីផ្លូវការរបស់បុត្រ ក៏ប៉ុន្តែលោកបញ្ជាក់ថា សម្តេចម៉ែ នឹងបង្ហាញព្រះភ័ក្ត្រ នៅវេលាល្ងាចនេះ ក្នុងព្រះរាជពិធីស្រោចស្រពព្រះសុគន្ធវារី នៅក្នុងព្រះបរមរាជវាំង។
ដោយមានការផ្សាយបន្តផ្ទាល់តាមទូរទស្សន៍ជាតិ ទូរទស្សន៍ឯកជន និងវិទ្យុមួយចំនួនផងនោះ កម្មវិធីត្រូវបានបញ្ចប់ នៅវេលាប្រមាណជាម៉ោង ៩កន្លះព្រឹក បន្ទាប់ពីការចាប់ផ្តើមដោយរបាំជូនពរ ការថ្លែងសុន្ទរកថា របស់អភិបាលរាជធានីភ្នំពេញ លោក ប៉ា សុជាតិវង្ស ព្រះរាជសង្កថារបស់ព្រះមហាក្សត្រ និងបិទកម្មវិធី ដោយការលែងព្រាប និងប៉េងប៉ោង ទៅក្នុងលំហអាកាស។
សូមបញ្ជាក់ថា ព្រះករុណាសម្តេចព្រះបរមនាថ នរោត្តម សីហមុនី ដែលមានព្រះជន្ម ៦១ព្រះវស្សា បានឡើងគ្រងរាជ្យបន្ត ពីព្រះបិតា របស់ព្រះអង្គគឺសម្តេចឳ នៅថ្ងៃទី២៩ខែតុលាឆ្នាំ២០០៤ បន្ទាប់ពី ត្រូវបានជ្រើសរើស ដោយសមាជិកទាំង ៩រូបនៃក្រុមប្រឹក្សារាជសម្បត្តិ នៅថ្ងៃទី១៤ ខែឆ្នាំដដែល។ ព្រះអង្គដែលមានចំណេះដឹងខ្ពង់ខ្ពស់ខាងសិល្បៈ មានបទពិសោធន៍ការងារ និងការសិក្សាច្រើននៅក្រៅប្រទេស ហើយចេះភាសាច្រើនទៀតនោះ ត្រូវបានអ្នកវិភាគ ក៏ដូចជាអង្គទូត ស្រលាញ់ចូលចិត្ត ចាត់ទុកថា ជាព្រះមហាក្សត្រមួយអង្គ ដែលមានភាពស្ងៀមស្ងាត់ សាមញ្ញ និងមានរាជកិច្ចច្រើន ក្នុងព្រះរាជតួនាទីជាព្រះប្រមុខរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ