សិទ្ធិមនុស្ស ១០ធ្នូ ក្រោមសម្រែកទាមទារការគោរពសិទ្ធិពិតប្រាកដ
ដើម្បីប្រារព្ធទិវាសិទ្ធមនុស្សអន្តរជាតិ ខួបទី ៦៦ ឆ្នាំ ២០១៤នេះ ក្រុមសម្ព័ន្ធអង្គការសង្គមស៊ីវិល បាននាំគ្នាជួបជុំ សម្តែងមតិ ពេញមួយថ្ងៃ នៅទីលានប្រជាធិបតេយ្យ។ ជាការសម្តែងមតិ ក្រោមប្រធាន «មានតុលាការឯករាជ្យ មានការគោរពសិទ្ធមនុស្ស»។ ការសម្តែងមតិ បានផ្សារភ្ជាប់ នឹងការស្នើសុំផង ទាមទារផង យំសោកផង សូមឲ្យរដ្ឋាភិបាលកម្ពុជា អនុវត្តឲ្យបាននូវការគោរពសិទ្ធមនុស្សដ៏ពិតប្រាកដមួយ។
ចុះផ្សាយនៅថ្ងៃ៖
ស្តាប់ - ០២:៤៤
ក្រោមប្រធានបទ «មានតុលាការឯករាជ្យ មានការគោរពសិទ្ធមនុស្ស» ក្រុមសម្ព័ន្ធអង្គការសង្គមស៊ីវិល បានចាប់អារម្មណ៍ឃើញថា ដំណើរការនៃការគោរពសិទ្ធមនុស្ស បានដើរថយក្រោយយ៉ាងខ្លាំង ដោយសារប្រព័ន្ធតុលាការបច្ចុប្បន្ន។ លោក សុក សំអឿន ប្រធានសម្របសម្រួល គណៈកម្មាធិការប្រព្រឹត្តិកម្ម (CHRAC) បានឡើងថ្លែងដោយស្នើសុំឲ្យរដ្ឋាភិបាល បោះជំហានដើម្បីធានា ឲ្យបាននូវតុលាការដែលមានតម្លាភាព ត្រូវធានាថាមន្ត្រីតុលាការទទួលបានកម្រៃគ្រប់គ្រាន់ សម្រាប់កិច្ចការសំខាន់ ដែលពួកគេបានធ្វើ។ ត្រូវធានាថាតុលាការទទួលបាននូវគ្រប់របាយការណ៍តុលាការដោយសេរី ហើយការការពារ ត្រូវបានផ្តល់ដល់សាធារណជនជាប់ចោទ នៅក្រោមនីតិវិធីព្រហ្មទណ្ឌកម្ពុជា ដោយប្រកាន់ខ្ជាប់យ៉ាងតឹងរ៉ឹង និងការផ្តល់សេវាជំនួយផ្លូវច្បាប់គ្រប់គ្រាន់។
តុលាការ មិនឯករាជ្យ គឺជាដើមចម ដែលធ្វើឲ្យមានអយុត្តិធម៌ក្នុងសង្គម, អយុត្តិធម៌ សម្រាប់ជនជាតិភាគតិច។ នេះគឺជាការថ្លែងរបស់លោកលី លីម តំណាងជនជាតិដើមភាគតិច មកពីខេត្តក្រចេះ។ លោកចង់ឲ្យរដ្ឋាភិបាល ពិគ្រោះយោបល់ជាមួយជនជាតិដើមភាគតិចជាមុនសិន មុននឹងធ្វើការសាងសង់ទំនប់វារីអគ្គិសនីផ្សេងៗ ព្រោះថាកន្លងមករដ្ឋាភិបាល មិនដែលបានពិគ្រោះយោបល់ជាមួយពលរដ្ឋ ហើយថែមទាំងរួមដៃជាមួយក្រុមហ៊ុនផ្សេងៗ រំលោភដីធ្លីពលរដ្ឋ។ តាមលោកលី លីម បញ្ហាទាំងនេះ បានធ្វើឲ្យជនជាតិដើមភាគតិច នឹងបាត់បង់វប្បធម៌ ប្រពៃណី ហើយមានជីវភាពកាន់តែលំបាកពីមួយថ្ងៃទៅមួយថ្ងៃដែលលោកហៅថាជាការរំលោភសិទ្ធិមនុស្សទៅលើជនជាតិដើមភាគតិច ដែលគួរតែបំបាត់ចោល។
ចំនែកអ្នកស្រី អ៊ំ សុភី តំណាងសហគមន៍ដីធ្លី នៅឡពាង ខេត្តកំពង់ឆ្នាំង ក៏បានឡើងថ្លែងទាំងអួលដើមករ ទាមទារឲ្យមានការគោរពសិទ្ធិមនុស្សដ៏ពិតប្រាកដមួយ មិនមែនសិទ្ធិមនុស្សតែនៅនឹងមាត់ និងលើក្រដាសនោះទេ។ ដោយមានបីកូននឹងដៃផង អ្នកស្រី អ៊ំ សុភី យំផងនិយាយដាក់មេក្រូផងថា តាំងពីមានជម្លោះជាមួយក្រុមហ៊ុន ខេឌីស៊ី អ្នកស្រី និងក្រុមគ្រួសារកាន់តែមានជីវភាពក្រីក្រលំបាក ដោយសារអ្នកស្រី ត្រូវតវ៉ា ទាមទារដីមកវិញ ត្រូវបាត់បង់ការងារ ហើយត្រូវរងការគំរាមកំហែងឥតឈប់ឈរ មានទាំងការចាប់ដាក់គុកផង ដោយគ្រាន់តែទាមទារ ឲ្យមានដំណោះស្រាយចំពោះអ្វីដែលខ្លួនបានធ្វើត្រូវ។ អ្នកស្រី បានថ្លែងដោយទឹកមុខឈឺចាប់ថា យុត្តិធម៌ ប្រហែលជាមានតែចំពោះអ្នកមានលុយមានអំណាចប៉ុណ្ណោះ ចំពោះអ្នកក្រ គឺគ្មានឡើយប្រព័ន្ធតុលាការយុត្តិធម៌។
ដោយឡែក កូនស្រីរបស់អ្នកស្រី គង់ ចន្ថា ដែលកំពុងជាប់ឃុំនៅក្នុងពន្ធនាគារព្រៃស គឺកញ្ញាសៀក ហ៊ន ដែលជាជនរងគ្រោះដីធ្លីនៅសហគមន៍បឹងកក់ ក៏បានឡើងថ្លែងដោយភាពក្តុកក្តួល ថ្កោលទោសរាជរដ្ឋាភិបាល ថាមិនបានគោរពសិទ្ធិមនុស្សត្រឹមត្រូវនោះទេ។ តាមកញ្ញាសៀក ហ៊ន តុលាការបានកាត់ក្តីដោយមិនផ្អែកលើការពិត ហើយបង្កឲ្យម្តាយនិងកូន កញ្ញា ត្រូវរស់នៅព្រាត់ប្រាស់គ្នា។
ក្រៅពីការថ្លែងរបស់ជនរងគ្រោះដោយសារបញ្ហាដីធ្លី និងតំណាងសង្គមស៊ីវិល ក៏មានផងដែរ ការចូលរួមថ្លែងដោយតំណាងសហភាពអឺរុប និងតំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធមនុស្សប្រចាំកម្ពុជា ដោយស្នើឲ្យមានការបន្តគោរពសិទ្ធមនុស្សនៅកម្ពុជា និងអនុវត្តឲ្យបាននូវប្រព័ន្ធតុលាការឯករាជ្យមួយ ដើម្បីសិទ្ធ និងយុត្តិធម៌ សម្រាប់ប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ