មេដឹកនាំនយោបាយថ្លែងសារក្នុងទិវាសិទ្ធិមនុស្ស
សម្រាប់ទិវាសិទ្ធិមនុស្សអន្តរជាតិ១០ធ្នូនេះ មេដឹកនាំបក្សប្រឆាំងចូលរួមយ៉ាងសកម្មក្នុងទិវានេះ ដោយមានការថ្លែងសារមួយចំនួនផង ខណៈដែលប្រមុខរដ្ឋាភិបាលបក្សកាន់អំណាចចេញទៅបំពេញបេសកកកម្មនៅក្រៅប្រទេស។ ស្ថានទូតអាមេរិកក៏បានថ្លែងសារជំរុញឲ្យគ្រប់ភាគីចូលរួមដោះស្រាយបញ្ហារំលោភសិទ្ធិមនុស្សនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
ក្នុងសេចក្តីថ្លែងការណ៍របស់ខ្លួនដើម្បីឧទ្ទិសដល់ទិវាសិទ្ធិមនុស្ស ១០ ធ្នូ លោកកឹម សុខា អនុប្រធានគណបក្សសង្គ្រោះជាតិនិងជាអនុប្រធានទី១រដ្ឋសភាបានថ្លែងថា ដើម្បីធានាឲ្យបាននូវសេចក្តីថ្លៃថ្នូរបស់មនុស្ស យ៉ាងហោចណាស់រដ្ឋត្រូវធានាសិទ្ធិជាមូលដ្ឋានចំនួន៥គឺ សិទ្ធិរស់រានមានជីវិត សិទ្ធិមានចំណីអាហារគ្រប់គ្រាន់ សិទ្ធិមានផ្ទះសម្បែងសមរម្យ សិទ្ធិទទួលបានសេវាអប់រំនិងសិទ្ធិទទួលបានសេវាសុខាភិបាល។
ក្រៅពីនោះរដ្ឋត្រូវធានាសិទ្ធិផ្សេងទៀតដូចជាសិទ្ធរួចផុតពីទាសភាព រួចផុតពីទារុណកម្ម និងសិទ្ធិស្មើគ្នាចំពោះមុខច្បាប់ជាដើម។ សម្រាប់លោក កឹម សុខា ដើម្បីធានាការគោរពសិទ្ធិមនុស្សកម្ពុជាត្រូវមានកត្តាសំខាន់បីជាចាំបាច់គឺ ស្ថិរភាពនយោបាយ ប្រព័ន្ធតុលាការឯករាជ្យ និងការអនុវត្តច្បាប់ដោយសមភាព។ ចំណែកលោក សម រង្ស៊ី មេដឹកនាំបក្សប្រឆាំងក៏បានចូលរួមក្នុងធម្មយាត្រាជាមួយពលរដ្ឋតាមផ្លូវជាតិលេខ២ចេញពីខេត្តតាកែវនិងបានចូលរួមយ៉ាងសកម្មជាមួយសកម្មជនសិទ្ធិមនុស្សនៅថ្ងៃពុធនេះដើម្បីទាមទារឲ្យមានការគោរពសិទ្ធិមនុស្សនៅកម្ពុជា។
ចំថ្ងៃប្រារព្ធទិវាសិទ្ធិមនុស្ស១០ធ្នូនេះ លោកនាយករដ្ឋមន្ត្រី ហ៊ុន សែន បានចាកចេញពីប្រទេសឆ្ពោះទៅកាន់ប្រទេសកូរ៉េខាងត្បូងដើម្បីចូលរួមពិធីប្រារព្ធខួបជាដៃគូរវាងសាធារណៈរដ្ឋកូរ៉េនិងអាស៊ាន។ លោកនាយករដ្ឋមន្ត្រីក៏គ្រោងជួបជាមួយពលករខ្មែរនៅក្នុងប្រទេសកូរ៉េផងដែរ។ គ្មានការថ្លែងសារអំពីសិទ្ធិមនុស្សពីសំណាក់លោក ហ៊ុន សែន ទេនៅថ្ងៃនេះ។
ប៉ុន្តែ សារដែលគេធ្លាប់លឺជាញឹកញាប់មកហើយនោះគឺ រដ្ឋាភិបាលដឹកនាំដោយគណបក្សប្រជាជនកម្ពុជាបានផ្តល់ជូននូវសិទ្ធិជាមូលដ្ឋានសំខាន់មួយដល់ប្រជាពលរដ្ឋកម្ពុជានោះគឺសិទ្ធិរស់រានមានជីវិតចេញពីរបបខ្មែរក្រហមនិងការអភិវឌ្ឍប្រទេសនាពេលបច្ចុប្បន្ន។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក វីលៀម ថូដ ក៏បានថ្លែងសារមួយដែរ។ លោកបានសម្តែងមោទនភាពចំពោះសកម្មជន និងអង្គការសង្គមស៊ីវិលទាំងឡាយដែលបានធ្វើសកម្មភាពជាប្រចាំដើម្បីបុព្វហេតុសិទ្ធិមនុស្សនៅកម្ពុជា។ លោកអះអាងថា លោកស្ថិតនៅជានិច្ចជាមួយអ្នកទាំងនោះ។ ឯកអគ្គរដ្ឋទូតអាមេរិកក៏បានកត់សម្គាល់ពីការរីកចម្រើនមួយចំនួនខាងការគោរពសិទ្ធិមនុស្សនៅកម្ពុជា ប៉ុន្តែ ក៏មានការស្រុតចុះមួយចំនួនដែរ។
លោក វីលៀម ថូដ បានអំពាវនាវឲ្យរដ្ឋាភិបាលចូលរួមជាមួយបក្សប្រឆាំងនិងសង្គមស៊ីវិលដើម្បីជជែកអំពីបញ្ហានិទណ្ឌភាព បក្សពួកនិយម និងអំពើពុករលួយជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ