គង់ គាំ៖ ពលរដ្ឋសាទរនយោបាយស្បែកខ្លា និងជំរុញឲ្យដោះស្រាយទំនាស់ដីធ្លី
គណៈប្រតិភូគណៈកម្មការទី១នៃព្រឹទ្ធសភាកម្ពុជាដែលដឹកនាំ ដោយ លោក គង់ គាំ នៅថ្ងៃអាទិត្យទី៣០វិច្ឆិកានេះ បានចុះទៅត្រួតពិនិត្យស្ថានភាពជម្លោះដីធ្លី នៅស្រុកចំនួនពីរ ក្នុងខេត្តកោះកុង។ បើតាមលោក គង់ គាំ ក្រុមហ៊ុនចិន Union Development Group បានសារភាពថា កន្លងមក ខ្លួនពិតជាបានធ្វើឲ្យប៉ះពាល់ដល់ប្រជាពលរដ្ឋពិតមែន តែក្រុមហ៊ុននេះមិនចង់ឲ្យប៉ះពាល់ដល់មិត្តភាពកម្ពុជាចិននោះទេ។ ទោះយ៉ាងណា ក៏ដោយ នៅក្នុងបេសសកម្មរយៈពេលមួយថ្ងៃពេញនេះ លោក គង់ គាំ បានបញ្ជាក់ថា ប្រជាជនរងគ្រោះទាំងនោះចង់ឃើញដំណោះស្រាយដីធ្លីពិតប្រាកដ ហើយពួកគេគាំទ្រចំពោះគោលនយោបាយស្បែកខ្លារបស់រដ្ឋាភិបាល។
ចុះផ្សាយនៅថ្ងៃ៖
ស្តាប់ - ០១:៤៦
លោក គង់ គាំ ប្រធានគណៈកម្មការទី១ព្រឹទ្ធសភា បានដឹកនាំព្រឹទ្ធសមាជិកចំនួន៤រូប ចុះធ្វើបេសកកម្មអង្កេតស្ថានភាពទំនាស់ដីធ្លី នៅស្រុកបទុមសាគរ និងស្រុកគិរីសាគរ ក្នុងខេត្តកោះកុង។ នៅថ្ងៃអាទិត្យទី៣០វិច្ឆិកា លោកបានជួបប្រជាពលរដ្ឋដែលមានជម្លោះដីធ្លី ប្រមាណជិត២០០នាក់។ ពួកគេបានរៀបរាប់ពីវិបត្តិដីធ្លីរបស់ពួកគេ និងស្នើសុំឲ្យលោកជួយរកដំណោះស្រាយ។ លោក គង់ គាំ បានសន្យានឹងប្រជាពលរដ្ឋទាំងនោះថា លោកនឹងធ្វើរបាយកាណ៍ជម្រាបដល់ព្រឹទ្ធសភាកម្ពុជា និងគណៈកម្មការចម្រុះដោះស្រាយវិវាទដីធ្លីរបស់រដ្ឋាភិបាល។ មិនតែប៉ុណ្ណោះនោះ ប្រធានគណៈកម្មការទី១នៃព្រឹទ្ធសភារូបនេះ ក៏នឹងមានវិធានការជាមួយស្ថានអគ្គរដ្ឋទូតចិន នៅភ្នំពេញ ដើម្បីធ្វើចំណាត់ការណាមួយជាមួយក្រុមហ៊ុនចិន នៅខេត្តកោះកុង ទៀតផង។
ក្រៅពីជួបភាគីជនរងគ្រោះ លោកក៏បានជួបផ្ទាល់ជាមួយអ្នកតំណាងក្រុមហ៊ុនចិន Union Development Group ផងដែរ។ ក្រុមហ៊ុននេះ បានសារភាពថា កន្លងមក សន្តិសុខរបស់ខ្លួនពិតជាបានធ្វើឲ្យប៉ះពាល់ដល់ប្រជាពលរដ្ឋពិតមែន។ គួររម្លឹកជូនដែរថា ពេលកន្លងទៅ សន្តិសុខរបស់ក្រុមហ៊ុន Union Development Group បានបណ្តេញប្រជាជនចេញពីលំនៅដ្ឋាន ឈូសឆាយនិងដុតបំផ្លាញផ្ទះរបស់ប្រជាពលរដ្ឋអស់ជាច្រើនខ្នង នៅស្រុកបទុមសាគរ។
នៅពេលនេះ ចំពោះជំហររបស់សមាជិកព្រឹទ្ធសភាដែលមានកូតាមកពីគណៈបក្សសមរង្ស៊ីរូបនេះ មិនចង់ឃើញក្រុមហ៊ុនរបស់ចិន ដែលប្រទេសចិនមានចំណងទាក់ទងជិតស្និទ្ធជាមួយកម្ពុជានោះ ធ្វើឲ្យប៉ះពាល់ និងផ្តល់ទុក្ខវេទនាដល់ប្រជាជនខ្មែរនោះទេ។ លោក គង់ គាំ អះអាងថា លោកនឹងមានវិធានការជាមួយស្ថានទូតចិននៅកម្ពុជា ដើម្បីដោះស្រាយរឿងនេះ។
ក្រោយបានពីសន្យាជួយដោះស្រាយទំនាស់ដីធ្លី ប្រជាពលរដ្ឋរងគ្រោះទាំងនោះ ហាក់ទុកចិត្តនិងផ្តល់ក្តីសង្ឃឹមចុងក្រោយលើរូបលោក។ លោក គង់ គាំ ថ្លែងថា ពលរដ្ឋទាំងនោះសាទរគាំទ្រ និងមានក្តីសង្ឃឹមចំពោះគោលនយោបាយស្បែកខ្លារបស់រដ្ឋាភិបាល។ គោលនយោបាយស្បែកខ្លា គឺជាវិធានការដែលដាក់ចំពោះក្រុមហ៊ុនដែលប្រើប្រាស់ដីសម្បទានសេដ្ឋកិច្ច ត្រូវអនុវត្ត កុំឲ្យប៉ះដល់ដីកម្មសិទ្ធិពលរដ្ឋ ហើយដោយត្រូវឃ្វាងចេញពីដីលំនៅដ្ឋានរបស់ប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ