នាយកដ្ឋានពេទ្យសត្វនឹងបង្កើនការបណ្តុះបណ្តាលភ្នាក់ងារពេទ្យសត្វអោយបាន២៥រាជធានីខេត្ត
បច្ចុប្បន្ននេះ ការចិញ្ចឹមសត្វនៅកម្ពុជាមានការធ្លាក់ចុះពីមួយថ្ងៃទៅមួយថ្ងៃ។ មូលហេតុចម្បងនៃការធ្លាក់ចុះនេះ គឺដោយសារតែកង្វះខាតពេទ្យសត្វ ដែលជាតម្រូវការនៅតាមភូមិ ឃុំនានាកម្ពុជា។ឆ្លើយតបនឹងបញ្ហានេះ នាយកដ្ឋានផលិតកម្ម និងបសុព្យាបាលនៅថ្ងៃទី 24 ខែ សីហា បានបើកសិក្ខាសាលាថ្នាក់ជាតិ ដើម្បីចាប់ផ្តើមគម្រោងរួមគ្នាបង្កើនផលិតកម្មសត្វ ដើម្បីនិរន្តរភាពជីវភាព និងបរិស្ថានសហគមន៍។ព្រឿន បញ្ញារី ជូនព័ត៌មាន
ចុះផ្សាយនៅថ្ងៃ៖
ស្តាប់ - ០១:៥៧
បញ្ហាកង្វះពេទ្យសត្វនៅតាមភូមិឃុំ ទូទាំងប្រទេសកម្ពុជាគឺជាបញ្ហាប្រឈមរបស់ប្រជាកសិករដែលកំពុងប្រកបមុខរបរចិញ្ចឹមសត្វ ទន្ទឹមនឹងការនាំចូលសត្វមកពីក្រៅប្រទេសមានការកើនឡើងច្រើន។ ការនាំចូលសត្វពីក្រៅប្រទេសមានការកើនឡើងច្រើន ដែលចោទជាបញ្ហាធំមូយក្នុងការធ្វើអោយជីវភាពប្រជាកសិករ ដែលប្រកបរបរនេះមានការធ្លាក់ចុះគួរអោយកត់សម្គាល់។ ជុំវិញបញ្ហានេះ លោកស្រីបណ្ឌិត អ៊ុក ណាវិន អនុប្រធាននាយកដ្ឋានផលិតកម្ម និងបសុព្យាបាលនៅកម្ពុជា បានអោយដឹងថា នាយកដ្ឋាននឹងជំរុញអោយមានការបណ្តុះបណ្តាលដោយផ្ទាល់ដល់កសិករ ដែលមានប្រមាណ ៧០%នៅកម្ពុជាអំពី បច្ចេកទេសនៃការចិញ្ចឹមសត្វ ការគ្រប់គ្រងថែទាំសត្វ ការស្វែងរកទីផ្សារ និងជ្រើសរើសពូជសត្វ ដែលសមស្របទៅនឹងទីផ្សារនៅកម្ពុជា។
ក្រៅពីការបណ្តុះបណ្តាលនេះ នាយកដ្ឋានផលិតកម្ម និងបសុព្យាបាល នឹងរៀបចំក្របខណ្ឌផែនការយុទ្ធសាស្រ្តរយៈពេល១០ឆ្នំា ដោយមាន៩អនុកម្មវិធីគាំទ្រទៅតាមកម្មវិធីនីមួយៗ។
នៅក្នុងនោះ កិច្ចការដែលនឹងត្រូវផ្តោតសំខាន់ជាងគេគឺ ផែនការបណ្តុះបណ្តាលភ្នាក់ងារពេទ្យសត្វប្រមាណ ១៩០០នាក់ឡើងវិញ ដោយចាប់ផ្តើមបាន៨ខេត្តហើយ។
ទាក់ទិនទៅនឹងគម្រោងនេះ នាយកដ្ឋាននឹងយកចិត្តទុកដាក់ទៅលើការចុះបេសកកម្ម និងផ្តោតសំខាន់ទៅលើសកម្មភាពអនុវត្តនៅតាមបណ្តារាជធានីខេត្ត ជាពិសេសនឹងផ្តើមអោយមានយ៉ាងហោចណាស់ពេទ្យសត្វ១នៅក្នុងភូមិ១។ គួរបញ្ជាក់ថា នេះគឺជាគម្រោងដែលមានការសហការឧបត្ថម្ភពីខាងសហគមន៍អឺរ៉ុបដែលមានជាថវិកាសរុប ៦លានអឺរ៉ូ សម្រាប់ផលិតកម្មសត្វ។
សូមបញ្ជាក់ថា បញ្ហាប្រឈមដែលតែងតែរាំងស្ទះនៅក្នុងការអនុវត្តនូវគម្រោងនេះដោយសារតែបញ្ហាអាកាសធាតុប្រែប្រួល និងផ្ទៃដីដាំស្មៅនៅមានកម្រិត ដែលជាហេតុនាំអោយសុខភាពសត្វមានសភាពខ្សោយ។ ប្រឈមនឹងបញ្ហានេះ អនុប្រធាននាយកដ្ឋានបានអោយដឹងថា អ្វីដែលជាផលវិបាកគឺនាយកដ្ឋានមិនទាន់បានត្រៀមលក្ខណៈគ្រប់គ្រាន់សម្រាប់ចំណីសត្វ ដើម្បីផ្គត់ផ្គង់ដល់សត្វទាំងអស់នោះ។ ទោះជាយ៉ាងណាក្តី ដោយសារតែមានការសហការពីខាងសហគមន៍ទាន់ពេលេវេលា បញ្ហានេះត្រួវបានដោះស្រាយ និងព្យាបាលទាន់ពេលវេលា និងមិនមានការរីករាលដាលដល់តំបន់ផ្សេងៗទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ