វិវាទការងារ៖ តុលាការបង្គាប់ឲ្យកាសែតភ្នំពេញប៉ុស្តិ៍ បង់សំណង២៦ម៉ឺនដុល្លារឲ្យអតីតអគ្គនាយក
នៅថ្ងៃព្រហស្បតិ៍នេះ តុលាការក្រុងភ្នំពេញ បានចុះអនុវត្តសាលដីការបស់ខ្លួននៅការិយាល័យកាសែតភ្នំពេញប៉ុស្តិ៍។ សាលដីកាពាក់ព័ន្ធនឹងវិវាទការងារនេះ បង្គាប់ឲ្យកាសែតភ្នំពេញប៉ុស្តិ៍ បង់សំណងជាទឹកប្រាក់២៦ម៉ឺនដុល្លារសហរដ្ឋអាមេរិក ឲ្យទៅលោក Chris Dawe ដែលធ្លាប់បម្រើការងារជាអតីតអគ្គនាយកកាសែតនេះ ពីឆ្នាំ២០១២ ដល់ឆ្នាំ២០១៥។
ចុះផ្សាយនៅថ្ងៃ៖
ស្តាប់ - ០២:០៥
ការអនុវត្តសាលដីការបស់តុលាការក្រុងភ្នំពេញ នៅការិយាល័យកាសែតភ្នំពេញប៉ុស្តិ៍នាថ្ងៃព្រហស្បតិ៍នេះ ដឹកនាំដោយលោកព្រះរាជអាជ្ញារង ខាំ សុផារី បន្ទាប់ពីតុលាការជាន់ទាបក្រុងភ្នំពេញ សម្រេចឲ្យលោក Chris Dawe ឈ្នះក្ដីក្នុងសំណុំរឿងវិវាទការងារជាមួយកាសែតភ្នំពេញប៉ុស្តិ៍។ លោក Chris Dawe ធ្លាប់បម្រើការងារនៅកាសែតភ្នំពេញប៉ុស្តិ៍ នៅខែមីនាឆ្នាំ២០១២ ក្នុងមុខតំណែងជាអគ្គនាយកនៃកាសែតនេះ មុននឹងលោកត្រូវបានបណ្ដេញចេញពីការងារ នៅក្នុងឆ្នាំ២០១៥។
តាមរយៈសាលដីកានេះ កាសែតភ្នំពេញប៉ុស្តិ៍មានរយៈពេល១៥ថ្ងៃ ដើម្បីទូទាត់សំណងជាទឹកប្រាក់២៦ម៉ឺនដុល្លារ ទៅឲ្យលោក Chris Dawe។ ក្នុងករណីកាសែតកូនកាត់ពីរភាសានេះមិនអាចទូទាត់ប្រាក់សំណងទៅភាគីឈ្នះក្ដីទេ ទ្រព្យសម្បត្តិរបស់កាសែតភ្នំពេញប៉ុស្តិ៍នឹងត្រូវរឹបអូស ហើយដាក់លក់ឡាយឡុយ ។
លោក Marcus Holmes នាយកប្រតិបត្តិនៃកាសែតភ្នំពេញប៉ុស្តិ៍មិនអាចទាក់ទងសុំការបំភ្លឺជុំវិញសំណុំរឿងនេះនៅឡើយទេ ប៉ុន្តែនៅក្នុងអត្ថបទបំភ្លឺរបស់ខ្លួនចុះផ្សាយនៅចុងខែមីនា លោកបានគូសបញ្ជាក់ថា ក្នុងសំណុំរឿងវិវាទការងារជាមួយលោក Chris Dawe នេះ កាសែតនឹងប្ដឹងជំទាស់ទៅតុលាការជាន់ខ្ពស់ជាបន្តទៀត។
គួរជម្រាបជូនថា កាលពីពេលថ្មីៗនេះ សារព័ត៌មានបរទេស និងបណ្តាញព័ត៌មានមួយចំនួនបានផ្សព្វផ្សាយថា កាសែតភ្នំពេញប៉ុស្តិ៍ កំពុងប្រឈមនឹងការបិទទាំងស្រុង ដោយសារតែជំពាក់ពន្ធរដ្ឋរាប់លានដុល្លារ។ ប៉ុន្តែកាសែតភ្នំពេញប៉ុស្តិ៍បានគូសបញ្ជាក់នៅក្នុងសេចក្ដីថ្លែងការណ៍ចុះថ្ងៃទី២០មីនាថា ខ្លួនមិនបានប្រឈមមុខនឹងការបិទទ្វារដោយសារបញ្ហាជំពាក់ពន្ធដារ ដូចការចុះផ្សាយនោះទេ។
តាមរយៈសេចក្តីថ្លែងការណ៍ដដែល កាសែតភ្នំពេញប៉ុស្តិ៍ពន្យល់ថា បញ្ហាបង់ពន្ធ និងការចុះធ្វើអធិការកិច្ច គឺជារឿងធម្មតាសម្រាប់ការធ្វើអាជីវកម្ម ហើយភ្នំពេញប៉ុស្តិ៍ក៏មិនមានជាប់ជំពាក់នឹងរឿងនយោបាយដូចការលើកឡើងដែរ។ សម្រាប់កាសែតកូនកាត់ពីរភាសាមួយនេះ កាសែតភ្នំពេញប៉ុស្តិ៍បានក្លាយជាទីទុកចិត្តសម្រាប់មិត្តអ្នកអាននៅក្នុងប្រទេសកម្ពុជាអស់រយៈពេល២៥ឆ្នាំមកហើយ ហើយរំពឹងថា ខ្លួននឹងបន្តការងារនេះក្នុងរយៈពេលច្រើនឆ្នាំបន្តទៅមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ