គំរោងហែញត្តិទៅកាន់ ACU ត្រូវបានរំសាយ ខណៈសង្គមស៊ីវិលត្រៀមបើកយុទ្ធនាការ «ឈុតពណ៌ខ្មៅ»
គម្រោងហែញត្តិរបស់ក្រុមប្រជាពលរដ្ឋនិងយុវជនជាង២ពាន់នាក់ ទៅកាន់អង្គភាពប្រឆាំងអំពើពុករលួយ នៅព្រឹកថ្ងៃទី៧ឧសភានេះ ត្រូវបានរំសាយទៅវិញ ដោយសារតែបារម្ភពីការប៉ះទង្គិចគ្នាជាមួយក្រុមអ្នកគាំទ្រគណបក្សប្រជាជនកម្ពុជា និងការបង្ក្រាបពីអាជ្ញាធរ។ ទោះជាយ៉ាងនេះក្តី យុទ្ធនាការមួយទៀត ត្រៀមនឹងធ្វើឡើងនៅដើមសប្តាហ៍ក្រោយ ដើម្បីទាមទារឲ្យមានការដោះលែងសកម្មជនការពារសិទ្ធិមនុស្សដែលត្រូវបានចាប់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
បើតាមគម្រោង ក្រុមប្រជាពលរដ្ឋនិងយុវជនជាង២០០០នាក់ គ្រោងនឹងជួបជុំគ្នានៅរមណីយដ្ឋានវត្តភ្នំ នៅវេលាម៉ោង៧ព្រឹក ថ្ងៃទី៧ឧសភានេះ ដើម្បីហែញត្តិយកទៅដាក់នៅអង្គភាពប្រឆាំងអំពើពុករលួយ ក្នុងបំណងទាមទារឲ្យអង្គភាពមួយនេះ បញ្ឈប់ការធ្វើទុក្ខបុកម្នេញគ្រប់រូបភាព មកលើអ្នកការពារសិទ្ធិមនុស្សអាដហុក មន្ត្រីអង្គការសហប្រជាជាតិ និងអគ្គលេខាធិការរង គ.ជ.ប លោក នី ចរិយា។ ក៏ប៉ុន្តែគម្រោងជួបជុំគ្នា ដែលពុំមានការអនុញ្ញាតពីអាជ្ញាធរក្រុងភ្នំពេញនេះ ត្រូវបានរំសាយទៅវិញ ដោយសារតែបារម្ភពីការប៉ះទង្គិចគ្នា ជាមួយក្រុមយុវជនដែលគាំទ្រគណបក្សប្រជាជនកម្ពុជា និង ការបង្ក្រាបពីអាជ្ញាធរទីក្រុងភ្នំពេញ។
កាលពីថ្ងៃសុក្រម្សិលម៉ិញ ក្រុមប្រជាពលរដ្ឋនិងយុវជន ដែលភាគច្រើនគឺជាតំណាងសហគមន៍រងគ្រោះដោយសារការរំលោភដីធ្លីនៅភ្នំពេញ បានប្រកាសជំហរម៉ឺងម៉ាត់ថា ពួកគេនឹងជួបជុំហែញត្តិទៅកាន់អង្គភាពប្រឆាំងអំពើពុករលួយ បើទោះបីជាអាជ្ញាធរសាលារាជធានីភ្នំពេញ មិនអនុញ្ញាតច្បាប់ឲ្យក្តី។
លោកស្រី មាស លក្ខិណា តំណាងសហគមន៍រងគ្រោះដីធ្លីមកពីតំបន់បាក់ខែង ដែលគេដឹងថា ជាអ្នកដឹកនាំការជួបជុំនេះបានថ្លែងថា មូលហេតុនៃការរំសាយការជួបជុំនៅថ្ងៃនេះ គឺដើម្បីបញ្ជៀសការប៉ះទង្គិចគ្នា ប៉ុន្តែលោកស្រី ស ស៊ុន ដែលជាតំណាងសហគមន៍ដីធ្លីមកពីបុរីកីឡា បានបង្ហាញការសោកស្តាយចំពោះការប្រកាសរំសាយបែបនេះ។
គួររំលឹកជូនថា អាជ្ញាធរក្រុងភ្នំពេញ កាលពីថ្ងៃទី៥ និងទី៦ឧសភា បានសម្រេចច្រានចោលសំណើសុំហែរក្បួនរបស់ក្រុមប្រជាពលរដ្ឋ២០០០នាក់ ដែលប្រឆាំងនឹងចំណាត់ការរបស់អង្គភាពប្រឆាំងអំពើពុករលួយ និងសំណើសុំជួបជុំ របស់ក្រុមយុវជនគាំទ្រគណបក្សប្រជាជនកម្ពុជា៥ពាន់នាក់ ដឹកនាំដោយលោក ប៉ាន់ខែម ប៊ុនថន តំណាងក្រុមសម្ព័ន្ធយុវជនស្រលាញ់សន្តិភាព ដែលគ្រោងនឹងជួបជុំគ្នានៅក្នុងថ្ងៃតែមួយនេះ។ ម្ខាងជួបជុំគ្នាដើម្បីប្រឆាំងនឹងចំណាត់ការរបស់អង្គភាពប្រឆាំងអំពើពុករលួយ និងម្ខាងទៀតជួបជុំគ្នាដើម្បីគាំទ្រចំណាត់ការរបស់អង្គភាពប្រឆាំងអំពើពុករលួយនេះ។
ទោះជាយ៉ាងនេះក្តី យុទ្ធនាការមួយទៀត ដឹកនាំដោយក្រុមអង្គការសង្គមស៊ីវិល ក៏គ្រោងនឹងធ្វើឡើង ចាប់ពីថ្ងៃចន្ទទី៩ឧសភាខាងមុខនេះ ដើម្បីទាមទារឲ្យមានការដោះលែងមន្ត្រីអង្គការសិទ្ធិមនុស្សអាដហុក៤នាក់ និងអគ្គលេខាធិការរង គ.ជ.ប ម្នាក់ផង។ យុទ្ធនាការដែលមានឈ្មោះថា «ឈុតខ្មៅ» ឬ «ការស្លៀកខ្មៅ ពាក់ខ្មៅ» នេះ ក៏ដើម្បីបង្ហាញពីការកាន់ទុក្ខចំពោះមរណភាពនៃលទ្ធិប្រជាធិបតេយ្យនៅក្នុងប្រទេសកម្ពុជា តាមរយៈការចាប់ខ្លួនអ្នកការពារសិទ្ធិមនុស្សនៅក្នុងប្រទេសកម្ពុជានាពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ