ក្រសួងអប់រំកម្ពុជា៖ សួនបន្លែនៅតាមសាលាធ្វើឲ្យអាហារូបត្ថម្ភប្រសើរឡើង
លោកហង់ ជួនណារ៉ុន បានក្រើនរំលឹកកាលពីម្សិលមិញ ឲ្យគ្រឹះស្ថានសិក្សាសាធារណៈយកចិត្តទុកដាក់បង្កើតសួនបន្លែដើម្បីពង្រឹងបំណិនជីវិតរបស់សិស្ស។ លោករដ្ឋមន្ត្រីក្រសួងអប់រំ យុវជន និងកីឡាកម្ពុជា អះអាងថា ការជំរុញឲ្យដាំបន្លែតាមសាលារៀនគឺសម្រាប់ធ្វើឲ្យប្រសើរឡើងនូវអាហារូបត្ថម្ភនៅក្នុងប្រទេសនេះ។
ចុះផ្សាយនៅថ្ងៃ៖
ស្តាប់ - ០១:៥៤
សេចក្តីណែនាំរបស់រដ្ឋមន្ត្រីក្រសួងអប់រំ យុវជន និងកីឡាកម្ពុជា បានក្រើនរំលឹកឱ្យគ្រឹះស្ថានសិក្សាសាធារណៈកម្រិតបឋមសិក្សានិងមធ្យមសិក្សាចំណេះទូទៅ ធ្វើសួនបន្លែ បង្គន់អនាម័យ និងទឹកស្អាត ដើម្បីពង្រឹងការអប់រំបំណិនជីវិតដែលបានផ្សព្វផ្សាយកន្លងមកឱ្យកាន់តែមានប្រសិទ្ធភាព។
ដោយផ្អែកលើរបាយការណ៍របស់ក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ ព្រមទាំងលិខិតស្តីពីការគ្រប់គ្រងការងារអប់រំបច្ចេកទេសនៅតាមរាជធានី ខេត្ត លោកហង់ ជួនណារ៉ុន បានជំរុញឱ្យបង្កើតសួនបន្លែតាមសាលារៀនសម្រាប់ធ្វើឱ្យប្រសើរឡើងនូវអាហារូបត្ថម្ភនៅក្នុងប្រទេសកម្ពុជា។ រួមជាមួយបង្គន់អនាម័យ និងទឹកស្អាតផង បើតាមលោករដ្ឋមន្ត្រី សួនច្បាររបស់គ្រឹះស្ថានសិក្សាមានគោលបំណងធានាឱ្យសិស្សានុសិស្សមានសុខភាពល្អ និងមានអាហារូបត្ថម្ភគ្រប់គ្រាន់។
ការណែនាំខាងលើកើតឡើងនៅពេលដែលក្រសួងអប់រំ យុវជន និងកីឡាកម្ពុជា សង្កេតឃើញថា កន្លងទៅ គ្រឹះស្ថានសិក្សាមួយចំនួនមិនទាន់បានយកចិត្តទុកដាក់លើការបង្កើតឱ្យមានសួនបន្លែ បង្គន់អនាម័យ និងទឹកស្អាតនៅឡើយ។
សេចក្តីណែនាំរបស់ក្រសួង ចុះថ្ងៃទី១៨ ខែកុម្ភៈ ឆ្នាំ២០១៥ បានតម្រូវឱ្យសាលាបឋមសិក្សានិងសាលាមធ្យមសិក្សាចំណេះទូទៅសាធារណៈ ត្រៀមចាត់តាំងគ្រូបង្គោល ដើម្បីទទួលការបណ្ដុះបណ្តាលអំពីជំនាញកសិកម្មនិងអនាម័យ ដែលនឹងមានគ្រូមកពីអង្គការស្បៀងអាហារនិងកសិកម្ម និងអង្គការកម្មវិធីស្បៀងអាហារពិភពលោក។
បើតាមលិខិតនោះ គ្រឹះស្ថានសិក្សាទាំងពីរកម្រិត ត្រូវរៀបចំតារាងសម្រង់ស្ថិតិសួនបន្លែ បង្គន់អនាម័យ និងទឹកស្អាត រួចបញ្ជូនមកនាយកដ្ឋានមធ្យមសិក្សាចំណេះទូទៅ និងនាយកដ្ឋានបឋមសិក្សា ដើម្បីឱ្យក្រសួងអប់រំជួយស្វែងរកការគាំទ្រ។ ទន្ទឹមនឹងនេះដែរ លោករដ្ឋមន្ត្រី ហង់ ជួន ណារ៉ុន ក៏តម្រូវឱ្យសាលារៀនធ្វើទំនាក់ទំនងជិតស្និទជាមួយដៃគូអភិវឌ្ឍន៍នានា ដើម្បីសហការអនុវត្តសេចក្តីណែនាំរបស់ក្រសួងអប់រំ យុវជន និងកីឡានោះ ឱ្យមានប្រសិទ្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ