សាលារាជធានីភ្នំពេញនឹងរៀបចំប្រគល់កម្មសិទ្ធិដីជូនប្រជាជនដែលតាំងលំនៅដ្ឋានលើដីឯកជនរបស់រដ្ឋ
សាលារាជធានីភ្នំពេញនឹងរៀបចំប្រគល់កម្មសិទ្ធិដីជូនប្រជាជនដែលតាំងលំនៅដ្ឋានជាយូរមកហើយ នៅលើដីឯកជនរបស់រដ្ឋ។ នៅរសៀលថ្ងៃសុក្រ ទី០៤មីនា រដ្ឋបាលរាជធានីភ្នំពេញបានបើកកិច្ចប្រជុំត្រួតពិនិត្យ និងចាត់តាំងក្រុមការងារ ដើម្បីដោះស្រាយបញ្ហានេះឲ្យបានឆាប់ជូនដល់ប្រជាពលរដ្ឋ។ អង្គការដែលធ្វើការលើបញ្ហាសិទ្ធិដីធ្លី បានសម្ដែងការអបអរសាទរចំពោះចំណាត់ការថ្មីនេះ ដោយសង្ឃឹមថា ទំនាស់ដីធ្លីនៅរាជធានីភ្នំពេញ នឹងប្រសើរឡើង។
ចុះផ្សាយនៅថ្ងៃ៖
ស្តាប់ - ០២:១៣
ប្រជាពលរដ្ឋ ដែលមានលំនៅដ្ឋានយូរឆ្នាំនៅលើដីឯកជនរបស់រដ្ឋ នឹងត្រូវអាជ្ញាធរក្រុងភ្នំពេញ ចុះរៀបចំឲ្យបានរៀបរយនិងស្របច្បាប់។ បើតាមការប្រកាសរបស់សាលារាជធានីភ្នំពេញ អ្នកដែលតាំងទីលំនៅជាយូរមកហើយនៅលើទីតាំងអង្គភាពរបស់រដ្ឋ ដូចជាក្រសួង និងមន្ទីរនានា នឹងត្រូវរៀបចំប្រគល់កម្មសិទ្ធិជូន ហើយកាត់ចេញពីបញ្ជីសារពើភ័ណ្ឌរបស់ស្ថាប័នតែម្ដង។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានគូសបញ្ជាក់ប្រាប់វិទ្យុបារាំងអន្ដរជាតិ នៅថ្ងៃសៅរ៍ ទី០៥មីនានេះថា ក្រុមការងារដែលទទួលបន្ទុកលើបញ្ហានេះនៅគ្រប់ខណ្ឌ នឹងធ្វើសាលាកប័ត្រព័ត៌មានស្រង់យកក្បាលដីនីមួយៗជាមុនសិន មុននឹងប្រជុំពិភាក្សាជាមួយក្រសួងមន្ទីរដែលជាម្ចាស់សារពើភ័ណ្ឌ ដើម្បីសម្រេចអំពីការផ្ដល់កម្មសិទ្ធិ។ អ្នកនាំពាក្យរូបនេះនៅមិនទាន់អាចប្រាប់បានទេថា មានទីតាំងប៉ុន្មានកន្លែង ដែលនឹងត្រូវរៀបចំផ្ដល់កម្មសិទ្ធិដីជូនប្រជាពលរដ្ឋឲ្យស្របច្បាប់ ព្រោះអាជ្ញាធរទើបតែសម្រេចបង្កើតក្រុមការងារនៅក្នុងកិច្ចប្រជុំកាលពីថ្ងៃទី០៤មីនា តែប៉ុណ្ណោះ។
លោក សៀ ភារម្យ នាយកប្រតិបត្តិអង្គការសិទ្ធិលំនៅដ្ឋាន បានសម្ដែងការអបអរសាទរចំពោះចំណាត់ការថ្មីនេះ។ តាមរយៈឆន្ទៈ និងចំណាត់ការរបស់សាលារាជធានីភ្នំពេញថ្មីនេះ លោក សៀ ភារម្យ សង្ឃឹមថា ទំនាស់ដីធ្លីនៅក្នុងទីក្រុងភ្នំពេញនឹងមានភាពប្រសើរឡើង។ ប្រសិនបើធ្វើបាន នាយកប្រតិបត្តិអង្គការសិទ្ធិលំនៅដ្ឋានរូបនេះ យល់ថា កិត្តិយសរបស់សាលារាជធានីភ្នំពេញ ដែលធ្លាប់តែធ្លាក់ចុះដុនដាបដោយសារទំនាស់ដីធ្លីជាបន្តបន្ទាប់ជាមួយប្រជាសហគមន៍បឹងកក់ និងបុរីកីឡានោះ នឹងរុងរឿង ថ្កុំថ្កើងឡើងវិញជាក់ជាពុំខាន។
សូមរំលឹកថា បញ្ហាទំនាស់ដីធ្លី ធ្លាប់ជាបញ្ហាប្រឈមដ៏ធំមួយសម្រាប់រាជធានីភ្នំពេញ និងបណ្ដាខេត្តនានា ទូទាំងប្រទេសកម្ពុជា នាក្រោយការបោះឆ្នោតជាតិឆ្នាំ២០១៣។ ប៉ុន្តែនៅឆ្នាំ២០១៥កន្លងទៅ ទាំងអង្គការសង្គមស៊ីវិល និងរដ្ឋាភិបាល បានអះអាងឲ្យដឹងថា បញ្ហាជម្លោះដីធ្លីនៅទូទាំងប្រទេសកម្ពុជាមានការថយចុះគួរឲ្យកត់សម្គាល់។ បើតាមរបាយការណ៍របស់ក្រសួងដែនដីនគរូបនីយកម្មនិងសំណង់ ការដោះស្រាយវិវាទដីធ្លីនៅក្នុងឆ្នាំ២០១៥កន្លងទៅ សម្រេចបានជោគជ័យ៣៧៦ករណី ក្នុងចំណោមករណីវិវាទសរុប ៦៧៣ករណី នៅទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ