មេដឹកនាំបក្សប្រឆាំង វាយប្រហារលើបក្សបង្កើតថ្មី ហើយអំពាវនាវសកម្មជន អ្នកគាំទ្រ កុំឲ្យបែកបាក់
បន្ទាប់ពីវិលត្រឡប់មកពីអឺរ៉ុបវិញ លោកសម រង្ស៊ី និងលោកកឹម សុខា មេដឹកនាំគណបក្សសង្គ្រោះជាតិ បានដាក់កាលវិភាគ ចុះមូលដ្ឋានជួបសកម្មជន អ្នកគាំទ្រ តាមបណ្តាខេត្តជាច្រើន កាលពីថ្ងៃពុធ នៅខេត្តកំពង់ស្ពឺ បន្តនៅថ្ងៃព្រហស្បតិ៍នេះ នៅខេត្តកោះកុង ព្រះសីហនុ ខេត្តស្វាយរៀង និងខេត្តកណ្តាល រហូតដល់ថ្ងៃទី១៧មករា។ នៅតាមបណ្តាខេត្តទាំងនោះ លោកសម រង្ស៊ី បានអំពាវនាវដល់សកម្មជន អ្នកគាំទ្រ ឲ្យបន្តរួបរួម កុំបែកបាក់។ លោកសម រង្ស៊ី ក៏ចាប់ផ្តើមវាយប្រហារមិនចំឈ្មោះលើគណបក្សទើបបង្កើតថ្មីថា ដើម្បីជួយដល់គណបក្សប្រជាជនកម្ពុជាប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១១
គឺកាលពីថ្ងៃពុធ ទី១៤មករា នៅខេត្តកំពង់ស្ពឺ លោកសម រង្ស៊ី បានប្រកាសទៅកាន់សកម្មជន អ្នកគាំទ្រគណបក្សសង្គ្រោះជាតិថា គណបក្សថ្មី ដែលទើបបង្កើត និងគ្រោងនឹងបង្កើតនោះ ដើម្បីតែបំបែកសំឡេងពីគណបក្សសង្គ្រោះជាតិ ជាគូប្រជែងតែ១គត់ នឹងគណបក្សប្រជាជនកម្ពុជា ទោះជាគណបក្សទាំងនោះ ដឹងខ្លួនហើយថា មិនមែនដើម្បីឈ្នះខ្លួនឯងក៏ដោយ តែធ្វើ ដើម្បីប្រយោជន៍គណបក្សប្រជាជនកម្ពុជាប៉ុណ្ណោះ។ ដូច្នេះតាមលោកសម រង្ស៊ី គណបក្សសង្គ្រោះជាតិ អ្នកប្រជាធិបតេយ្យ និងអ្នកសេ្នហាជាតិ ត្រូវតែបន្តរួបរួមគ្នា។
លោកសម រង្ស៊ី បានបញ្ជាក់ថា “ដូច្នេះសូមបងប្អូនគិតពិចារណា! គណបក្សតូចៗ ដែលមកហ្នឹងណា! ដឹងខ្លួនហើយ ដឹងខ្លួនថា ខ្លួនមិនងាយឈ្នះទេ។ បើខ្លួនចេញមក មកគ្រាន់តែរំខានយើង មកបំបែកសំឡេងពីយើងបន្តិច នោះគណបក្សប្រជាជន ចំណេញ។ គណបក្សតូចៗហ្នឹង អត់មានឈ្នះខ្លួនឯងទេ ដែលធ្វើហ្នឹង ធ្វើដើម្បីឲ្យគណបក្សប្រជាជនឈ្នះ។ បងប្អូនយល់! បងប្អូនមិនត្រូវលេងសើចជាមួយគណបក្សតូចៗហ្នឹងទេ។ ពួកគណបក្សតូចៗហ្នឹង គឺបម្រើ ចង់មិនចង់ ដឹងខ្លួន ឬមិនដឹងខ្លួន ដឹងខ្លួនហើយ ធ្វើមិនដឹងខ្លួន មកបន្លំទៀត តែគណបក្សតូចៗហ្នឹង គឺបម្រើប្រយោជន៍គណបក្សប្រជាជនទេ។ ខ្លួនឯង ដឹងថា អត់ឈ្នះ។ ធ្វើនេះ ដើម្បីជួយគណបក្សប្រជាជន។ បំបែកសំឡេងយើងតែបន្តិច ក៏អាចជួយគណបក្សប្រជាជនបានដែរ"។
ការលើកឡើងរបស់លោកសម រង្ស៊ីដូច្នេះ ទោះជាមិនចេញឈ្មោះឲ្យចំ តែគេដឹងថា សំដៅលើក្រុមលោកកែម ឡី អ្នកស្រាវជ្រាវសង្គម ព្រមទាំងមេដឹកនាំអង្គការសង្គមស៊ីវិលមួយចំនួន ដែលជាស្ថាបនិកបណ្តាញពលរដ្ឋដើម្បីអភិវឌ្ឍន៍សង្គម ឬខ្មែរដើម្បីខ្មែរ។ ក្រុមបណ្តាញថ្មីនោះ កំពុងគៀរគរប្រជាពលរដ្ឋ បង្កើតគណបក្សនៅមូលដ្ឋាន ដែលនឹងអាចលេចជារូបរាង ក្នុងខែមីនា។
ដោយបដិសេធថា មិនមានគណបក្សប្រជាជនកម្ពុជា នៅពីក្រោយ លោកកែម ឡី បានចាត់ទុកការវិភាគរបស់លោកសម រង្ស៊ី ថាមិនទាន់គ្រប់ជ្រុងជ្រោយ ហើយថា ការវាយប្រហារនោះ ជាការជួយឃោសនាឲ្យបណ្តាញខ្មែរដើម្បីខ្មែរ។ បណ្តាញខ្មែរដើម្បីខ្មែរ ដែលតាមលោកកែម ឡី មានបំណងតែមួយគត់ ដើម្បីឲ្យពលរដ្ឋ មានចំណេះដឹង មានបទពិសោធន៍នយោបាយកាន់តែច្រើន។
លោកកែម ឡី បញ្ជាក់ថា “ជារួមយើងបើកចំហ។ យើងបើកចំហឲ្យមានការស៊ើបអង្កេតជាថវិកា យើងបើកចំហឲ្យមានការស៊ើបអង្កេតជាព័ត៌មាន។ បើសិនជាគណបក្សសង្គ្រោះជាតិ គាត់សង្ស័យអីចឹង គាត់អាចបង្កើតក្រុមធំមួយ មានការស៊ើបអង្កេត។ យើងទទួល ឬមួយក៏សង្ស័យថា មានហិរញ្ញវត្ថុពីគណបក្សប្រជាជនអី ពីស្ថាប័នណាក៏ដោយ អាចមានថវិកាជួលស្ថាប័នសវនកម្ម ឲ្យមានការស៊ើបអង្កេត អាហ្នឹង យើងទទួល ពីព្រោះ យើងធ្វើនេះ គឺតាមសមត្ថភាព តាមលទ្ធភាពយើង។ ចូលលុយគ្នាតិចតួចៗ ដើម្បីធ្វើថ្ងៃសៅរ៍ ថ្ងៃអាទិត្យអ៊ីចឹង”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ