សារមន្ទីរអាមេរិក ប្រគល់រូបបដិមាហនុមានសតវត្សទី១០ ឲ្យកម្ពុជាវិញ!
រូបបដិមាហនុមានក្នុងសតវត្សទី១០ ដែលត្រូវបានចោរលួចចេញពីប្រាសាទកោះកេររបស់ខ្មែរ ហើយរសាត់អណ្តែតដល់សារមន្ទីរសហរដ្ឋអាមេរិកនោះ នៅពេលនេះបានត្រឡប់មករួមរស់នៅលើទឹកដីកម្ពុជាវិញហើយ។ ជាការត្រឡប់មកវិញ ក្រោមកិច្ចសហប្រតិបត្តិយ៉ាងសកម្ម រវាងរដ្ឋាភិបាលសហរដ្ឋអាមេរិក និងកម្ពុជា រួមទាំងអង្គការ UNESCO ។ ពិធីប្រគល់រូបចម្លាក់បុរាណខ្មែរ ដល់កម្ពុជាវិញ ត្រូវបានធ្វើឡើង នៅព្រឹកថ្ងៃអង្គារ ទី ១២ឧសភានេះ នៅទីស្តីការគណៈរដ្ឋមន្ត្រី ទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០២:៣៧
នៅព្រឹកថ្ងៃទី ១២ឧសភានេះ រាជរដ្ឋាភិបាលកម្ពុជា និងសារមន្ទីរ The Cleveland Museum of Art របស់សហរដ្ឋអាមេរិក បានចុះហត្ថលេខា លើកិច្ចព្រមព្រៀងប្រគល់ និងទទួលរូបបដិមាហនុមាន ដល់ប្រទេសកម្ពុជាវិញ។ រូបបដិមាហនុមានសតវត្សទី១០ ដែលសារមន្ទី Cleveland បានទិញកាលពីឆ្នាំ ១៩៨២។ រូបបដិមាហនុមាន ដែលមានដងខ្លួនជាមនុស្ស និងក្បាលជាស្វា ហើយមានទម្រង់អង្គុយលុតជង្គង់ ត្រូវបានគេលួចចេញពីច្រកខាងកើតនៃប្រាសាទចិន ក្នុងរមណីយដ្ឋានប្រវត្តិសាស្ត្រកោះកេរ កាលពីអំឡុងឆ្នាំ ១៩៧០។
លោកឧបនាយករដ្ឋមន្ត្រីសុខ អាន បានថ្លែងនៅក្នុងពិធីទទួលរូបបដិមាហនុមាន នៅទីស្តីការគណៈរដ្ឋមន្ត្រីថា កម្ពុជាបានប្រឹងប្រែងស្វែងរកភស្តុតាងទាំងផ្នែកច្បាប់ និងផ្នែកវប្បធម៌ ទម្រាំអាចទទួលបានរូបបដិមាបុរាណនេះ មកកម្ពុជាវិញនៅពេលនេះ។
លោកច័ន្ទ តានី រដ្ឋលេខាធិការទីស្តីការគណៈរដ្ឋមន្ត្រី បានបញ្ជាក់នៅក្នុងសន្និសីទកាសែត ក្រោយពិធីទទួលរូបបដិមាថា នេះគឺជារូបបដិមាទី ៦ហើយ ដែលសារមន្ទីររបស់សហរដ្ឋអាមេរិក បានប្រគល់មកកម្ពុជាវិញ។ ហើយរូបបដិមានេះ នឹងត្រូវយកទៅជួសជុលរៀបចំឲ្យបានល្អប្រសើរជាមុនសិន មុននឹងបញ្ជូនទៅដាក់តាំង នៅក្នុងសារមន្ទីរជាតិ។ លោក ច័ន្ទ តានី បានអះអាងថា នៅមានរូបបដិមាជាច្រើនទៀត ដែលកំពុងមានវត្តមាន ក្នុងសារមន្ទីរសហរដ្ឋអាមេរិក។ យ៉ាងណាក៏ដោយកម្ពុជា ក៏បាននិងកំពុងធ្វើការស្រាវជ្រាវ និងចរចារ/តតាំងតាមផ្លូវច្បាប់ ដើម្បីទទួលបានរូបបដិមាទាំងនោះ មកកម្ពុជាវិញ។
ចំនែកលោកគង់ វីរៈ ប្រធាននាយកដ្ឋានសារមន្ទីរជាតិ បានឲ្យដឹងថា សារមន្ទីរគ្រោងនឹងធ្វើពិព័រណ៍ពិសេសមួយ បន្ទាប់ពីរូបបដិមាដែលបានបញ្ជូនមកវិញទាំងនេះ ត្រូវបានជួសជុលរួចរាល់។ ជាពិព័រណ៍ ក្នុងគោលដៅដើម្បីបង្ហាញពីរូបបដិមានៅរចនាបទប្រាសាទកោះកេរ។
សូមបញ្ជាក់ថា រូបបដិមាហនុមាន ត្រូវបានបញ្ជូនពីសារមន្ទីរអាមេរិក មកដល់ទីក្រុងភ្នំពេញ កាលពីយប់ថ្ងៃទី ១០ ខែឧសភា។ កាលពីឆ្នាំ២០១៤ លោក សុខ អាន តំណាងរាជរដ្ឋាភិបាលកម្ពុជា បានធ្វើដំណើរទៅកាន់ទីក្រុង New York សហរដ្ឋអាមេរិក ដើម្បីចុះហត្ថលេខាលើកិច្ចព្រមព្រៀងប្រគល់ និងទទួលយករូបចម្លាក់វត្ថុបុរាណកម្ពុជា ដែលសហរដ្ឋអាមេរិក ប្រមូលបានពីការជួញដូរខុសច្បាប់។
ចាប់តាំងពីឆ្នាំ ២០១៣មក មានរូបបដិមាចំនួន ៦ ដែលសារមន្ទីររបស់សហរដ្ឋអាមេរិកចំនួន៤ បានប្រគល់មកឲ្យកម្ពុជាវិញ។ រូបបដិមាទាំង៦នោះ រួមមានរូបបដិមា ទុរយោទ្ធន៍ ដែលបានមកពីសារមន្ទីរ Sotheby ក្រុងញ៉ូវយ៉ក់ បន្ទាប់ពីរដ្ឋាភិបាលកម្ពុជាឈ្នះក្តី ក្រោយការតតាំងតាមផ្លូវច្បាប់រយៈពេលជិត ២ឆ្នាំ។ រូបបដិមាភីម មកពីសារមន្ទីរ Norton Simon ក្នុងរដ្ឋ California។ រូបបដិមាពលរាម មកពីសារមន្ទីរ Christie ក្រុងញ៉ូវយ៉ក់ និងរូបបដិមា២ទៀត មកពីសារមន្ទីរ the Metropolitan ក្រុងញ៉ូវយ៉ក់ដែរ រួមទាំងរូបបដិមាហនុមាន ដែលមកពីសារមន្ទីរ the Cleveland នៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ