សមាជិកសភាបក្សប្រឆាំង ស្វែងរកការពន្យល់ពីរដ្ឋមន្ត្រីក្រសួងវប្បធម៌ ពីរចនាបថខ្លោងទ្វារអង្គរសង្ក្រាន្តដែលរងការរិះគន់
លោកអេង ឆៃអ៊ាង សមាជិករដ្ឋសភាមកពីគណបក្សសង្គ្រោះជាតិ នៅថ្ងៃអាទិត្យនេះ បានថ្លែងរិះគន់ទៅលើរចនាបថខ្លោងទ្វារចូលព្រឹត្តិការណ៍អង្គរសង្ក្រាន្ត ថាមិនមែនជារចនាបថរបស់ខ្មែរ។ ប៉ុន្តែអ្នកនាំពាក្យព្រឹត្តិការណ៍អង្គរសង្ក្រាន្ត បានបញ្ជាក់ថា វាជារចនាបថរបស់ខ្មែរ ដែលមានបោះពុម្ភនៅក្នុងសៀវភៅក្បាច់ខ្មែរនៅវិទ្យាស្ថានរ៉ៃយំ។
ចុះផ្សាយនៅថ្ងៃ៖
ស្តាប់ - ០២:៤៩
តាមពិតទៅ ការរិះគន់ទៅលើការសាងសង់ខ្លោងទ្វារចូល នៃព្រឹត្តិការណ៍អង្គរសង្ក្រាន្តនៅខេត្តសៀមរាបនេះ ដើមឡើយមានចំនួនតិចតួចប៉ុណ្ណោះ តែពេលនេះ ការរិះគន់កាន់តែផុសផុល ឡើង រាប់តាំងពីសាមញ្ញជនរហូតដល់អ្នកនយោបាយ តាមរយៈមធ្យោបាយផ្សព្វផ្សាយសង្គមFacebook ដ៏ពេញនិយម។ ពួកគេបានសរសេររិះគន់ ទៅលើការសាងសង់ខ្លោងទ្វារចូលនៃព្រឹត្តិការណ៍អង្គរសង្ក្រាន្តឆ្នាំថ្មី ឆ្នាំមមែនេះ ថាជាការសាងសង់ឡើង យកតាមគំរូរចនាបថវិហារចិន ឫវៀតណាម នោះដោយផ្អែកទៅលើពណ៌ និងរចនាបថនៃខ្លោងទ្វារចូល។ ការរិះគន់ ក៏មានភ្ជាប់ ជាមួយនូវរូបភាពនៃរចនាបថទាំងនោះផងដែរ ប៉ុន្តែថា ការរិះគន់គួរណាស់ ត្រូវផ្អែកលើមូលដ្ឋានច្បាស់លាស់ ហើយអ្នកដែលរងការរិះគន់ ក៏គួរតែចេញមុខពន្យល់ដើម្បីឱ្យគ្រប់ភាគីស្ងប់ចិត្ត។
លោក អេង ឆៃអ៊ាង សមាជិករដ្ឋសភាមកពីគណបក្សប្រឆាំង និងជាប្រធានគណៈកម្មការទី១នៃរដ្ឋសភា បានបញ្ជាក់ថា ព្រឹត្តិការណ៍អង្គរសង្ក្រាន្តគឺជាព្រឹត្តិការណ៍ដ៏ធំមួយ ដែលអាចទាក់ទាញភ្ញៀវទេសចរជាតិនិងអន្តរជាតិជាង១លាននាក់ ដូច្នេះ ការធ្វើអ្វីមួយ ដោយមិនផ្អែកលើវប្បធម៌និងអរិយធម៌របស់ខ្មែរ វានឹងជះឥទ្ធិពលអាក្រក់ដល់វប្បធម៌ខ្មែរ។ លោក អេង ឆៃអ៊ាង នៅថ្ងៃអាទិត្យនេះ បានស្វែងរកការពន្យល់ពីលោកស្រី ភឿង សក្កណា រដ្ឋមន្ត្រីក្រសួងវប្បធម៌ និងវិចិត្រសិល្បះ ហើយថា បើមិនកែសំរួលទេ លោកនឹងស្នើសុំឱ្យប្រធានគណ:កម្មការទី៧នៃរដ្ឋសភា ដែលមកពីគណបក្សសង្គ្រោះជាតិដែរនោះ កោះហៅលោកស្រីរដ្ឋមន្ត្រី មកសួរនាំអំពីរចនាបថនៃក្លោងទ្វារនេះ។
នៅថ្ងៃអាទិត្យនេះ មិនទាន់មានការឆ្លើយតបពីលោកស្រីរដ្ឋមន្ត្រីនៅឡើយទេ ក៏ប៉ុន្តែបើតាមការលោក សោម រតនា អ្នកនាំពាក្យព្រឹត្តិការណ៍អង្គរសង្ក្រាន្តថា ការសាងសង់ខ្លោងទ្វារនេះ គឺផ្អែកទាំងស្រុងទៅលើរចនាបថរបស់ខ្មែរ ដែលមានសរសេរនៅក្នុងសៀវភៅក្បាច់ខ្មែររបស់លោក វិ ថារិន ដែលបានបោះពុម្ភផ្សាយដោយវិទ្យាស្ថានរ៉ៃយុំ។ លោកបានបញ្ជាក់ថា ក្រុមការងារព្រឹត្តិការណ៍អង្គរសង្ក្រាន្តបានដឹងអំពីការរិះគន់ទាំងនេះ ហើយកំពុងពិនិត្យមើល តែថា រហូតមកទល់នឹងពេលនេះ មិនទាន់មានការសម្រេចថា ត្រូវរុះរើចេញនោះទេ។
សូមបញ្ជាក់ថា នេះគឺជាឆ្នាំទី៣ហើយ ដែលព្រឹត្តិការណ៍អង្គរសង្ក្រាន្តត្រូវបានរៀបចំឡើង ដោយសហភាពសហព័ន្ធយុវជនកម្ពុជាដឹកនាំដោយលោក ហ៊ុន ម៉ានី កូនប្រុសរបស់លោកនាយករដ្ឋមន្ត្រីហ៊ុន សែន ចាប់ពីថ្ងៃទី១៤ ដល់ថ្ងៃទី១៦ ខែមេសា។ តាមគម្រោងព្រឹត្តិការណ៍អង្គរសង្ក្រាន្តឆ្នាំនេះ នឹងមានលក្ខណៈធំជាងមុន ប្លែកជាងមុន និងអស្ចារ្យជាងមុន ដោយក្នុងរយៈពេលបីថ្ងៃ នៃព្រឹត្តិការណ៍ នឹងមានការដាក់បង្ហាញ នូវទស្សនីយភាពប្លែកៗ ដែលក្នុងនោះរួមមាន នំអន្សមយក្សដែលមានទម្ងន់ជាង៣តោន, មួកស្លឹកត្នោតយក្ស, អង្រុតយក្សកម្ពស់ ៥,៥ម៉ែត្រ , កន្ត្រងប្រហុកយក្ស , បំពង់ទឹកត្នោតយក្សចំណុះ១៥លីត្រ , ការទាញព្រ័ត្រយក្ស , ល្បែងចត្រង្គ ឬល្បែងអុកយក្ស , ការប្រណាំងរទេះគោ ក្របី គោយន្ត និងត្រាក់ទ័រ , ការរាំចង្វាក់ម៉ាឌីហ្សូន។ តាមគម្រោង លោកនាយករដ្ឋមន្ត្រី ហ៊ុន សែន នឹងចូលរួមក្នុងព្រឹត្តិការណ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ