ករណីអគ្គិភ័យក្នុងរាជធានីភ្នំពេញថយចុះ ប្រៀបធៀបនឹងរយៈពេលដូចគ្នាកាលពីឆ្នាំមុន
គិតត្រឹមថ្ងៃទី១៥ ខែមេសា នេះករណីអគ្គិភ័យក្នុងរាជធានីភ្នំពេញ មានការថយចុះ បើប្រៀបធៀបនឹងឆ្នាំមុន។ ទោះបីជាយ៉ាងនេះក្តី អាជ្ញាធរនៅតែត្រៀមកម្លាំងជានិច្ច សម្រាប់ហេតុការណ៍អគ្គិភ័យ ដែលអាចនឹងកើតមានក្នុងឆ្នាំ២០១៦នេះ។ នេះបើតាមការឲ្យដឹងពីនាយរងការិយាល័យអគ្គិភ័យរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:០៤
ចាប់តាំងពីថ្ងៃទី០១ ខែមករា ឆ្នាំ២០១៦ រហូតមកដល់ថ្ងៃទី១៥ ខែមេសា នេះករណីអគ្គិភ័យក្នុងរាជធានីភ្នំពេញ មាន ២៩ករណី រាប់ទាំងករណីអគ្គិភ័យ កាលពីថ្ងៃទី ១៤ ខែមេសា ម្សិលមិញផង។ នេះបើតាមការបញ្ជាក់របស់លោក អ៊ុំ ចន្ទរដ្ឋា នាយរងការិយាល័យអគ្គិភ័យរាជធានីភ្នំពេញ។ បើតាមនាយរងរូបនេះ ករណីអគ្គិភ័យនៅដើមឆ្នាំ២០១៦នេះ មានការថយចុះ បើប្រៀបធៀបនឹងឆ្នាំមុន ក្នុងរយៈពេលដូចគ្នា។
បើទោះបីជាករណីអគ្គិភ័យមានការថយចុះ ប្រៀបធៀបនឹងឆ្នាំមុនក្តី ប៉ុន្តែដោយសារតែខែមេសានេះ ជាខែក្តៅផង ក្រុមពន្លត់អគ្គិភ័យបានត្រៀមកម្លាំងជាស្រេចសម្រាប់ហេតុការណ៍អគ្គិភ័យនានាក្នុងរាជធានី។ សម្រាប់ចូលឆ្នាំរយៈពេលប៉ុន្មានថ្ងៃមកនេះ ក្រុមពន្លត់អគ្គីភ័យរបស់រាជធានីភ្នំពេញ បានត្រៀមរថយន្តពន្លត់អគ្គិភ័យប្រមាណ៤៨គ្រឿង និងកម្លាំងប្រមាណ១៨០នាក់ សម្រាប់បង្ការករណីអគ្គិភ័យក្នុងរាជធានីភ្នំពេញ។
សូមបញ្ជាក់ថាកាលពីយប់ថ្ងៃទី១៤ មេសា មានករណីអគ្គិភ័យមួយបានកើតឡើងនៅក្នុងសង្កាត់ចាក់អង្រែលើ ខណ្ឌមានជ័យ ដែលបានបណ្តាលឲ្យផ្ទះប្រជាពលរដ្ឋប្រមាណ៥៥ខ្នងត្រូវឆេះទាំងស្រុង តែមិនបានបង្កឲ្យមានអ្នកណាម្នាក់រងរបួស ឬស្លាប់ទេ។ ជុំវិញករណី ដែលបណ្តាលឲ្យមានភ្លើងឆេះនេះ អាជ្ញាធរកំពុងតែស៊ើបអង្កេតនៅឡើយ។ នេះបើតាមលោក អ៊ុំ ចន្ទរដ្ឋា។ លោកបន្តថា ហេតុដែលបណ្តាលឲ្យមានភ្លើងឆេះផ្ទះប្រជាពលរដ្ឋរហូតដល់ ៥៥ខ្នង គឺដោយសារតែឡានពន្លត់អគ្គិភ័យ មិនអាចចូលទៅដល់ទីតាំងដែលកំពុងឆេះបាន ព្រោះផ្លូវតូចចង្អៀត។
លោកឃួន ស្រេង អភិបាលរងរាជធានីភ្នំពេញ បានបញ្ជាក់ប្រាប់វិទ្យុបារាំងថា មូលហេតុបឋម ដែលបណ្តាលឲ្យមានករណីភ្លើងឆេះ កាលពីយប់មិញ គឺដោយសារចរន្តអគ្គិសនី។ លោកថា កន្លងមកសាលារាជធានីធ្លាប់បានណែនាំឲ្យប្រជាពលរដ្ឋប្រុងប្រយ័្នតចំពោះបញ្ហាអគ្គិភ័យ និងការបង្ការអគ្គិភ័យ តែប្រជាពលរដ្ឋនៅតែមានការធ្វេសប្រហែសដដែល។
លោកឃួន ស្រេង និងលោក អ៊ុំ ចន្ទរដ្ឋា បានអំពាវនាវឲ្យប្រជាពលរដ្ឋទាំងអស់អុជ ទានធូប ទទួលទេវតា ឲ្យមានការប្រុងប្រយ័ត្នខ្ពស់ នាឱកាសបុណ្យចូលឆ្នាំប្រពៃណីជាតិនេះ។ ក្រៅពីនេះលោកឃួន ស្រេង បានបន្ថែមថាកម្លាំងល្បាតរបស់រាជធានីមិនអាចមើលសព្វគ្រប់ជ្រុងជ្រោយនោះទេ ដូច្នេះមានតែប្រជាពលរដ្ឋត្រូវចូលរួមប្រុងប្រយ័ត្នផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ