សាលាក្រុងមិនអនុញ្ញាតឲ្យគណបក្សសង្គ្រោះជាតិធ្វើពិធីសាសនានៅទីលានប្រជាធិបតេយ្យ
សាលារាជធានីភ្នំពេញ បានចេញលិខិតមួយយ៉ាងប្រញ៉ាប់ប្រញ៉ាល់នៅព្រឹកថ្ងៃសៅរ៍នេះ ដើម្បីបញ្ជាក់ទៅគណបក្សសង្គ្រោះជាតិថានឹងមិនមានការអនុញ្ញាតឲ្យមានការជួបជុំធ្វើពិធីសាសនា នៅលើទីលានប្រជាធិបតេយ្យទេ ដើម្បីរំលឹកដល់ខួបមួយឆ្នាំនៃអំពើហិង្សានៅផ្លូវវេងស្រេង។ ការសម្រេចបែបនេះត្រូវតំណាងគណបក្សសង្គ្រោះជាតិប្រចាំរាជធានីភ្នំពេញ ធ្វើការជំទាស់ហើយចោទប្រកាន់ថារំលោភលើកិច្ចព្រមព្រៀងកាលពីម្សិលមិញ ហើយពិធីនឹងបន្តធ្វើ ខណៈដែលសាលារាជធានីព្រមានពីការទទួលខុសត្រូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
សាលារាជធានីភ្នំពេញនៅព្រឹកថ្ងៃសៅរ៍នេះ បានចេញលិខិតមួយច្បាប់ផ្ញើរជូនតំណាងគណបក្សសង្គ្រោះជាតិប្រចាំក្រុងភ្នំពេញ ដោយមិនអនុញ្ញាតឲ្យសមាជិកគណបក្សប្រឆាំងនៅប្រទេសកម្ពុជានេះធ្វើការជួបជុំគ្នាសម្តែងមតិ និងរៀបចំបង្សុកូលឧទ្ទិសដល់វិញ្ញាណក្ខន្តអ្នកបាត់បង់ជីវិតនៅក្នុងការប៉ះទង្គិចគ្នាដោយហិង្សាមួយនៅផ្លូវវេងស្រេងកាលពីឆ្នាំទៅ។
លិខិតដែលចុះហត្ថលេខាដោយអភិបាលរងរាជធានីភ្នំពេញម៉ក់ វណ្ណស៊ីថា បានចង្អុលឲ្យគណបក្សសង្គ្រោះជាតិប្តូរទៅធ្វើពិធីជួបជុំគ្នាតាមបែបសាសនានេះនៅតាមវត្តណាមួយដែលមានការអនុញ្ញាតទីតាំងពីព្រះចៅអធិការ និងគណៈកម្មការវត្ត។
លោក ម៉ន ផល្លា ប្រធានគណៈកម្មាធិការប្រតិបត្តិរាជធានីភ្នំពេញ នៃគណបក្សសង្គ្រោះជាតិថ្លែងប្រាប់វិទ្យុបារាំងអន្តរជាតិ RFI ថា លោកមានការភ្ញាក់ផ្អើល ដោយសារការហាមប្រាមនេះបានផ្ទុយពីស្មារតីនៃកិច្ចប្រជុំ រវាងសាលារាជធានីនិងតំណាងគណបក្សសង្គ្រោះជាតិកាលពីរសៀលថ្ងៃទី២មករា។
តំណាងគណបក្សសង្គ្រោះជាតិក្រុងភ្នំពេញរូបនេះ មានការសោកស្តាយ ហើយនៅតែអះអាងថានឹងបន្តធ្វើការជួបជុំគ្នានៅទីលានប្រជាធិបតេយ្យដដែល។ការពោលបែបនេះគឺដោយសារតែពិធីនេះបានលើកពីផ្លូវវេងស្រេងដែលជាកន្លែងកើតហេតុ មកទីលានដើម្បីបញ្ចៀសការប្រឈមមុខដាក់គ្នារវាងអាជ្ញាធរដែលហាមឃាត់និងសមាជិកគណបក្សសង្គ្រោះជាតិ។
ក៏ប៉ុន្តែលោក ឡុង ឌីម៉ង់ អ្នកនាំពាក្យសាលារាជធានីភ្នំពេញពន្យល់ថាការធ្វើពិធីបែបនេះគឺហាក់ដូចជាការធ្វើអាជីវកម្មលើអ្នកស្លាប់ និងមានចរិកបែបញុះញង់។ហើយម្យ៉ាងទៀតប៉ះពាល់ដល់ស្ថិរភាពនយោបាយនិងសន្តិសុខសង្គម។ លោក ឡុង ឌីម៉ង់ ក៏បានបដិសេធផងដែរថាមិនមានជាកិច្ចព្រមព្រៀងគ្នាអ្វីទេ គឺជាការជជែកគ្នាធម្មតា ហើយបើតាមច្បាប់បាតុកម្ម ត្រូវមានការដាក់លិខិតមុន៧ថ្ងៃ។
សូមរំលឹកថាកាលពីដើមខែមករាឆ្នាំ២០១៤ យ៉ាងហោចណាស់មានមនុស្ស ៤នាក់បានស្លាប់ និង របួសជាច្រើននាក់ផ្សេងទៀតនៅក្នុងព្រឹត្តិការណ៍ប្រឈមមុខដាក់គ្នាមួយរវាងក្រុមអ្នកតវ៉ាដែលភាគច្រើនជាកម្មករ និងសមត្ថកិច្ចចំរុះ នៅលើផ្លូវវេងស្រេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ