បក្សប្រឆាំងវិលចូលប្រជុំសភាវិញ ប៉ុន្តែគ្មានវត្តមានលោក កឹម សុខា
គណបក្សសង្គ្រោះជាតិ នៅថ្ងៃទី១៨ វិច្ឆិកានេះ បានបើកកិច្ចប្រជុំជាមួយតំណាងរាស្ត្រជាប់ឆ្នោតរបស់ខ្លួនទាំងអស់ ដើម្បីសម្រេចពីការវិលចូលសភាវិញបន្ទាប់ពីពហិកាអស់រយៈពេលកន្លះឆ្នាំ។ ជាលទ្ធផល កិច្ចប្រជុំនេះ បានសម្រេចឱ្យសមាជិកសភាចូលប្រជុំវិញ ប៉ុន្តែលោកកឹម សុខា នឹងមិនចូលរួមកិច្ចប្រជុំទេ។ បក្សប្រជាជនបានហៅការសម្រេចចិត្តរបស់បក្សប្រឆាំងថាជំហរចុងស្រល់។
ចុះផ្សាយនៅថ្ងៃ៖
ស្តាប់ - ០២:១៥
មានមូលហេតុ ១ សំខាន់បំផុត ដែលគណបក្សសង្គ្រោះជាតិសម្រេចចូលប្រជុំសភានៅថ្ងៃទី២២ វិច្ឆិកាវិញ គឺច្បាប់ថវិកាជាតិឆ្នាំ២០១៧។ នេះគឺជាលទ្ធផលនៃកិច្ចប្រជុំសមាជិកសភារបស់គណបក្សសង្គ្រោះជាតិនៅរសៀលថ្ងៃទី១៨ វិច្ឆិកា។ លោក អេង ឆៃអ៊ាង មន្ត្រីជាន់ខ្ពស់បានលើកឡើងថា សមាជិកសភាទាំងអស់បានលើកយករបៀបវារៈសំខាន់២ គឺការពិនិត្យលើពង្រាងច្បាប់ថវិកាជាតិឆ្នាំ ២០១៧ ដែលរដ្ឋាភិបាលបានបញ្ជូនមក និងការចុះឈ្មោះសម្រាប់ការបោះឆ្នោតក្រុមប្រឹក្សាឃុំសង្កាត់ដែលកំពុងប្រឈមនឹងហានិភ័យអំឡុងពេលដែលថេរវេលានៃការចុះឈ្មោះកំពុងខើចខ្លី។
ក្រៅពីនេះ គណបក្សបានសម្រេចមិនឱ្យលោកកឹម សុខា ដែលកំពុងឃុំខ្លួនឯងជិតកន្លះឆ្នាំហើយនោះ ចូលប្រជុំសភាវិញនោះទេ។ សង្គ្រោះជាតិ ដែលកំពុងមានជម្លោះជាមួយបក្សកាន់អំណាចនៅតែមើលឃើញថាស្ថានការណ៍នយោបាយនៅតែមិនល្អ ដែលអាចឱ្យលោកកឹម សុខា ចាកចេញពីទីស្នាក់ការកណ្តាលគណបក្សនោះទេ។ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានហៅការវិលចូលសភាវិញរបស់បក្សប្រឆាំងថាជាជំហរមិនច្បាស់ដែលម្តងចេញម្តងចូលតាមតែបបូរមាត់។ យ៉ាងណាក៏ដោយ គណបក្សប្រជាជនកម្ពុជាអះអាងថាខ្លួនមិនខ្វល់ចំពោះការចេញ ឬចូលរបស់បក្សប្រឆាំងនោះឡើយ ព្រោះថាគណបក្សប្រជាជនមិនដែលហាមឃាត់បក្សសង្គ្រោះជាតិឡើយ។
ការប្រកាសវិលចូលសភាវិញជាមួយនឹងរបៀបវារៈមួយចំនួននោះ អ្នកវិភាគមួយចំនួន មានជាអាថ៌ លោកបណ្ឌិត ចាន់ វិបុល បានលើកឡើងថា គឺជាឡេះនយោបាយ និងជាការទាល់ច្រកអស់ផ្លូវនយោបាយ។ ប៉ុន្តែលោកចាន់ វិបុល ក៏បានមើលឃើញថា ការចូលសភាវិញ ក៏ជាប្រយោជន៍សម្រាប់ជាតិផងដែរ ព្រោះថាសភាកម្ពុជានឹងមានសកម្មភាព មិនត្រឹមតែប៉ុណ្ណោះនេះក៏ជាសញ្ញាណនៃភាពស្ងប់ស្ងាត់នយោបាយនៅកម្ពុជាផងដែរ។ គួរបញ្ជាក់ថាបក្សប្រឆាំងបានដើរចេញពីសភាតែពីខែឧសភាកន្លងមកបន្ទាប់ពីមានការប៉ុនប៉ងចាប់ខ្លួនលោកកឹម សុខាប្រធានស្តីទីគណបក្សខណៈដែលការប្រឈមមុខគ្នាកាន់តែខ្លាំងរបស់បក្សធំទាំងពីរ។
បើទោះបីជាគណបក្សប្រឆាំងព្រមចូលសភាវិញ ក៏ប៉ុន្តែគ្មានឡើយការចរចារវាងគណបក្សដែលជាដៃគូសន្ទនាទាំងពីរក្នុងក្របខណ្ឌប្រព័ន្ធតុលាការ។ នេះជាជំហរចុងក្រោយរបស់បក្សកាន់អំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ