សន្និបាតCPP៖ គណបក្សកាន់អំណាចនឹងមិនឱនក្បាលចំពោះសម្ពាធពីអន្តរជាតិឡើយ
គណបក្សប្រជាជនកម្ពុជា ដែលជាគណបក្សកាន់អំណាច បានបិទបញ្ចប់សន្និបាតគណៈកម្មាធិការកណ្តាលរបស់ខ្លួន រយៈពេល៣ថ្ងៃ កាលពីល្ងាចថ្ងៃព្រហស្បត្តិ៍ ទី ២០ ធ្នូ ដោយសម្រេចបានលទ្ធផលសំខាន់ៗចំនួន១១ចំណុច។ ប៉ុន្តែចំណុចសំខាន់មួយនៅក្នុងសន្និបាតលើកទី៤១នេះ បានសម្រេចបោះឆ្នោតជ្រើសតាំងបំពេញបន្ថែមនូវសមាជិកគណៈអចិន្ត្រៃយ៍ថ្មីចំនួន៧រូប ទៅក្នុងក្បាលម៉ាស៊ីនកំពូលរបស់គណបក្សកាន់អំណាច។ ក្រៅពីនេះ សន្និបាតបានប្តេជ្ញាថា គណបក្សនេះ នឹងមិនឱនក្បាលចំពោះសម្ពាធពីអន្តរជាតិនោះឡើយ។
ចុះផ្សាយនៅថ្ងៃ៖
សន្និបាតគណៈកម្មាធិការកណ្តាលគណបក្សប្រជាជនកម្ពុជាលើកទី៤១ បានប្រកាសជាឱឡារិក ពីការប្តេជ្ញាចិត្តរបស់ខ្លួន ក្នុងការតម្កល់នូវស្មារតីស្នេហាជាតិ ការពារដាច់ខាតនូវឯករាជ្យ អធិបតេយ្យ និងបូរណភាពទឹកដី។ បន្ថែមលើនេះ សន្និបាតរយៈពេល៣ថ្ងៃរបស់គណបក្សកាន់អំណាច ក៏បានប្រកាសពីការត្រៀមខ្លួនក្នុងការប្រឆាំងដាច់ខាត ចំពោះការជ្រៀតជ្រែកពីឥទ្ធិពលខាងក្រៅ ចូលទៅក្នុងកិច្ចការផ្ទៃក្នុងរបស់កម្ពុជា ក្រោមការមួលបង្កាច់ពីភាពត្រឹមត្រូវខាងផ្នែកនយោបាយ និងសកម្មភាពរបស់កម្ពុជា។ អ្វីដែលសំខាន់ជាងនេះទៅទៀត សន្និបាតគណបក្សកាន់អំណាចក៏បានបញ្ជាក់ថា នឹងមិនឱនក្បាលសោះឡើយ ចំពោះការដាក់សម្ពាធពីខាងក្រៅ។
ការប្តេជ្ញាចិត្តនេះ ទំនងជាបានឆ្លើយតបទៅនឹងការព្រមានជាយូរមកហើយរបស់សហភាពអឺរ៉ុប និងសហរដ្ឋអាមេរិក ពីការដាក់ទណ្ឌកម្ម និងការដកប្រព័ន្ធអនុគ្រោះពន្ធ (EBA) ពីកម្ពុជា ចាប់តាំងពីមានការរំលាយគណបក្សសង្គ្រោះជាតិនៅចុងឆ្នាំ២០១៧មក។ ប៉ុន្តែនៅក្នុងលទ្ធផលនៃសន្តិបាតគណៈកម្មាធិការកណ្តាលគណបក្សប្រជាជនកម្ពុជា គណបក្សកាន់អំណាចបានគូសបញ្ជាក់ច្បាស់ៗថា ការប្រើប្រាស់ទណ្ឌកម្មជាមធ្យោបាយដើម្បីគាប់សង្កត់ ទៅលើប្រទេសអធិបតេយ្យមួយឱ្យធ្វើអ្វីៗតាមឆន្ទៈរបស់ខ្លួន ដោយយកតម្លៃសិទ្ធិមនុស្ស និងប្រជាធិបតេយ្យមកប្រើប្រាស់ជាលេស ដើម្បីជ្រៀតជ្រែកចូលកិច្ចការផ្ទៃក្នុង, ការបំពានលើអធិបតេយ្យភាព, សិទ្ធិស្វ័យសម្រេចរបស់ប្រទេសដែលខ្សោយជាងនោះហើយ នឹងធ្វើឱ្យពិភពលោកជួបបញ្ហាប្រឈម និងហានិភ័យកាន់តែច្រើនឡើង ក្នុងពេលដែលបណ្តាប្រជាជាតិ កំពុងរួបរួមគ្នា ឆ្ពោះទៅសម្រេចគោលដៅអភិវឌ្ឍន៍ដោយចីរភាពនៅឆ្នាំ២០៣០ របស់អង្គការសហប្រជាជាតិ។ នៅក្នុងស្មារតីនេះ គណបក្សកាន់អំណាចជាង៣ទសវត្សន៍នៅកម្ពុជា បានប្តេជ្ញាបន្តថែរក្សាសន្តិភាព, សន្តិសុខ, ស្ថិរភាពនយោបាយ, សណ្តាប់ធ្នាប់ និងសុវត្ថិភាពសង្គម ឲ្យបានរឹងមាំ ព្រមជាមួយនឹងការទប់ស្កាត់ រាល់សកម្មភាពប្រទូស្តរ៉ាយ ដែលបង្កឡើងដោយក្រុមប្រឆាំង និងមជ្ឈដ្ឋានអន្តរជាតិនានា ដោយប្រតិបត្តិតាមរដ្ឋធម្មនុញ្ញយ៉ាងម៉ឺងម៉ាត់ និងច្បាប់ជាធរមាន។
សូមបញ្ជាក់ថា គណបក្សប្រជាជនកម្ពុជា ទើបតែបានជាប់ឆ្នោតជាថ្មី នៅក្នុងការបោះឆ្នោតជាតិ កាលពីខែកក្កដា ឆ្នាំ ២០១៨ បន្ទាប់ពីអវត្តមានរបស់គណបក្សប្រឆាំងធំជាងគេនៅកម្ពុជា។
គួរជំរាបជូនដែរថា គណបក្សប្រជាជនកម្ពុជា បានបិទបញ្ចប់សន្និបាតគណៈកម្មាធិការកណ្តាលរបស់ខ្លួន រយៈពេល៣ថ្ងៃ កាលពីល្ងាចថ្ងៃព្រហស្បត្តិ៍ ទី ២០ ធ្នូ ដោយសម្រេចបានលទ្ធផលសំខាន់ៗចំនួន១១ចំណុច ដើម្បីតម្រង់ទិសសម្រាប់ការអនុវត្តរបស់ខ្លួនតទៅថ្ងៃខាងមុខ។ ក្នុងនោះសន្និបាតក៏បានសម្រេចបោះឆ្នោតជ្រើសតាំងបំពេញបន្ថែមនូវសមាជិកគណៈអចិន្ត្រៃយ៍ថ្មីចំនួន៧រូប ទៅក្នុងក្បាលម៉ាស៊ីនដឹកនាំកំពូលរបស់គណបក្ស ដោយ៤រូប គឺជាមេបញ្ជាការយោធាកំពូលរបស់កម្ពុជា ដែលទើបនឹងតែងតាំងថ្មី ក្នុងនោះក៏មានលោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រី ហ៊ុន សែន ផងដែរ។ ការតែងតាំងនេះ ធ្វើឲ្យចំនួនសមាជិកគណៈអចិន្ត្រៃយ៍គណបក្សកាន់អំណាច កើនឡើងពី៣០រូប ដល់៣៧រូប និងសមាជិកគណៈកម្មាធិការកណ្តាលសរុបចំនួន ៨៦៥ រូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ