លោកហោ ណាំហុង ណែនាំទូតខ្មែរឲ្យតាមដានព័ត៌មានលើហ្វេសបុកលោកហ៊ុន សែន
លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសកម្ពុជា នៅព្រឹកថ្ងៃសៅរិ៍ទី៣០មករានេះ បានកោះប្រជុំជាមួយឯកអគ្គរាជទូត និងអគ្គកុងស៊ុលខ្មែរដើម្បីពង្រឹងការងាររបស់ខ្លួន។ ក្នុងនោះ លោកប្រមុខការទូតកម្ពុជា ក៏បានណែនាំឲ្យឯកអគ្គរាជទូតខ្មែរប្រចាំនៅក្រៅប្រទេសទាំងអស់ តាមដានព័ត៌មាននៅលើបណ្តាញសង្គមហ្វេសបុក និងគេហទំព័ររបស់លោកនាយករដ្ឋមន្ត្រី និងក្រសួងការបរទេស ដើម្បីទទួលបានព័ត៌មានជាក់ស្តែងពីកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
នៅក្នុងកិច្ចប្រជុំដែលធ្វើឡើងដោយបិទទ្វារនៅឯទីស្តីការក្រសួងការបរទេសនៅថ្ងៃសៅរិ៍ទី៣០មករានេះ ប្រមុខការទូតកម្ពុជា លោក ហោ ណាំហុង បានធ្វើការណែនាំទៅដល់ឯកអគ្គរាជទូត និងអគ្គកុងស៊ុលខ្មែរទាំងអស់ឲ្យយកចិត្តទុកដាក់អនុវត្តការងាររបស់ខ្លួនឲ្យបានល្អថែមទៀត។
ថ្លែងនៅក្រោយបិទបញ្ចប់កិច្ចប្រជុំជាមួយឯកអគ្គរាជទូត និងអគ្គកុងស៊ុលខ្មែរនៅថ្ងៃនេះ លោកប្រមុខការទូតកម្ពុជា ហោ ណាំហុង បានបញ្ជាក់ថា មានបញ្ហាសំខាន់ៗចំនួនបី ដែលលោកបានលើកឡើងនៅក្នុងកិច្ចប្រជុំនេះ ទី១-គឺលោកបានណែនាំឲ្យឯកអគ្គរាជទូត និងអគ្គកុងស៊ុលខ្មែរទាំងអស់ ស្វែងយកពីសភាពការណ៍ជាក់ស្តែងរបស់ប្រទេសកម្ពុជា និងការរីកចំរើនជាក់ស្តែងរបស់ប្រទេសនេះ។ ទី២-យកចិត្តទុកដាក់ជាអាទិភាពទៅលើបញ្ហាប្រឈមរបស់ពលករខ្មែរនៅក្រៅប្រទេស និងទី៣ គឺយកចិត្តទុកដាក់ទៅលើបញ្ហាយុវជនកម្ពុជាដែលជានិស្សិតដែលកំពុងសិក្សានៅបរទេស និងស្វែងរកអាហារូបករណ៍ថ្មីៗបន្ថែមទៀត។
សូមជម្រាបថា ឯកអគ្គរាជទូតកម្ពុជានៅក្រៅប្រទេសមានចំនួន២៦ និងអគ្គកុងស៊ុលមានចំនួន។
ផ្អែកលើបញ្ហាទាំងនេះ លោកប្រមុខការទូតកម្ពុជា ក៏បានណែនាំឲ្យឯកអគ្គរាជទូតនិងអគ្គកុងស៊ុលខ្មែរប្រចាំនៅបរទេសទាំងអស់ យកចិត្តទុកដាក់តាមដានព័ត៌មានពីប្រទេសកម្ពុជា ដើម្បីឲ្យដឹងបានច្បាស់ពីសភាពការណ៍ជាក់ស្តែងនៅក្នុងប្រទេស ពិសេសគឺតាមដានព័ត៌មាននៅលើបណ្តាញសង្គមហ្វេសបុក Facebook និង Website របស់លោកនាយករដ្ឋមន្ត្រី និងរបស់ក្រសួងការបរទេសកម្ពុជាឲ្យបានជាប់ជារៀងរាល់ថ្ងៃ។
គួរជំរាបជូនដែរថា នៅក្នុងសន្និបាតគណៈកម្មាធិការកណ្តាលគណបក្សប្រជាជនកម្ពុជាកាលពីថ្ងៃទី៩ មករា ឆ្នាំ២០១៦កន្លងទៅ លោកនាយករដ្ឋមន្ត្រី ហ៊ុន សែន បានព្រមានទៅដល់មន្ត្រីអង្គទូតណាដែលអសកម្មក្នុងការងាររបស់ខ្លួនផងដែរ។
នៅថ្ងៃនេះដែរ លោក ហោ ណាំហុង បានដាស់តឿនឯកអគ្គរាជទូតនិងអគ្គកុងស៊ុល ខ្មែរទាំងអស់ ត្រូវបំពេញការងាររបស់ខ្លួនឲ្យបានល្អ កុំចាំតែមានការណែនាំពីក្រសួង ពោលគឺត្រូវមានគំនិតផ្តួចផ្តើមឲ្យបានច្រើន នៅក្នុងការផ្សព្វផ្សាយពីសភាពការណ៏ជាក់ស្តែងពីប្រទេសកម្ពុជាទៅបរទេស និងត្រូវតាមដានសភាពការណ៍ក្នុងប្រទេសរបស់ខ្លួនក៏ដូចជាប្រទេសដែលខ្លួនស្នាក់នៅ ឬក្នុងតំបន់ដែលខ្លួនកំពុងបំពេញបេសកម្មនោះដែរ។ លោករដ្ឋមន្ត្រីក៏បានរិះគន់ចំៗដែរថា ឯកអគ្គរាជទូតខ្មែរនៅបរទេសខ្លះ ហាក់ទៅបំពេញការងារសម្រាប់តែការសន្សំលុយតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ