លោកហ៊ុន សែន គ្រោងប្តឹងសមាជិកព្រឹទ្ធសភាគណបក្សសមរង្ស៊ី លោកស្រីថាក់ ឡានី
ក្រុមមេធាវីតំណាងរដ្ឋាភិបាលបានជួបប្រជុំគ្នាដើម្បីសិក្សាទៅ លើពាក្យបណ្តឹង ប្រឆាំងនឹងលោកស្រី ថាក់ ឡានី សមាជិកព្រឹទ្ធសភាគណបក្សសម រង្ស៊ី។ ពាក្យបណ្តឹងដែលគ្រោងធ្វើឡើង បន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសប្រាប់សារព័ត៌មានក្នុងស្រុកថា នឹងប្តឹងសមាជិកព្រឹទ្ធសភាគណបក្ស សម រង្ស៊ី មួយរូបគឺ លោកស្រី ថាក់ ឡានី ដែលបានចោទប្រកាន់មកលើលោកនាយករដ្ឋមន្ត្រីថា ជាអ្នកនៅពីក្រោយនៃអំពើឃាតកម្មបាញ់សម្លាប់អ្នកវិភាគនយោបាយនិង សង្គម លោក កែម ឡី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
គម្រោងនៃការដាក់ពាក្យប្តឹងសមាជិកព្រឹទ្ធសភាគណបក្សសម រង្ស៊ី ត្រូវបានលោកនាយករដ្ឋមន្ត្រី ហ៊ុន សែន បានទំលាយឲ្យដឹងនៅក្នុងកិច្ចសម្ភាសន៍ពិសេសមួយជាមួយអង្គភាពព័ត៌មានក្នុងស្រុក (Fresh News) នៅរាត្រីថ្ងៃទី២៩ខែកក្កដា ឆ្នាំ២០១។
តាមរយៈបទសម្ភាសន៍នោះ ប្រមុខរដ្ឋាភិបាលកម្ពុជាលោក ហ៊ុន សែន បានប្រកាសពីការសម្រេចចិត្តរបស់លោកក្នុងការ ប្តឹងសមាជិកព្រឹទ្ធសភាមកពីគណបក្ស សម រង្ស៊ី មួយរូប គឺលោកស្រី ថាក់ ឡានី ដែលបានចោទប្រកាន់លោកនាយករដ្ឋមន្ត្រីថា ជាអ្នកនៅពីក្រោយនៃអំពើឃាតកម្មបាញ់សម្លាប់លោក កែម ឡី អ្នកវិភាគនយោបាយនិងស្រាវជ្រាវសង្គមនៅកម្ពុជាដ៏មានប្រជាប្រិយភាព កាលពីដើមខែកក្កដាកន្លងទៅ។
លោកនាយករដ្ឋមន្ត្រី ហ៊ុន សែន បានបញ្ជាក់តាមរយៈបទសម្ភាសន៍នោះថា ពាក្យបណ្តឹងនឹងធ្វើឡើងនៅពេលឆាប់ៗនេះ, ហើយសម្រាប់សមាជិកព្រឹទ្ធសភារូបនេះ មិនពិបាកនោះទេ សម្រាប់ការប្តឹង និងបោះឆ្នោតដកអភ័យឯកសិទ្ធិ, ដោយហេតុថា សមាជិកព្រឹទ្ធសភារបស់គណបក្សប្រជាជនកម្ពុជាមានសម្លេងលើសពី២ភាគ។
ការប្រកាសប្តឹងរបស់លោកនាយករដ្ឋមន្ត្រី ហ៊ុន សែន ធ្វើឡើងបន្ទាប់ពីការបែកធ្លាយនៃវីដេអូឃ្លីបមួយរបស់លោកស្រី ថាក់ ឡានី សមាជិកព្រឹទ្ធសភាមណ្ឌលភូមិភាគ២ មកពីគណបក្ស សម រង្ស៊ី ដែលបានថ្លែងនៅក្នុងវេទិការមួយថា លោកនាយករដ្ឋមន្ត្រី ហ៊ុន សែន គឺជាអ្នកនៅពីក្រោយនៃអំពើឃាតកម្មបាញ់សម្លាប់លោក កែម ឡី។ ការចោទប្រកាន់ដែលគ្មានមូលដ្ឋាននេះ ត្រូវបានលោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា អ្នកណាក៏ដោយឲ្យតែនិយាយប៉ះពាល់ដល់កិត្តិយសនិងសេចក្តីថ្លៃថ្នូរបស់គណបក្សប្រជាជនកម្ពុជា ក៏ដូចជាថ្នាក់ដឹកនាំគណបក្សដោយគ្មានមូលដ្ឋាន គឺត្រូវតែទទួលខុសត្រូវចំពោះមុខច្បាប់។
លោក គី តិច មេធាវីតំណាងរដ្ឋាភិបាលវិញបានថ្លែងថា ក្រុមមេធាវីរបស់រដ្ឋាភិបាលកំពុងតែពិភាក្សាគ្នាដើម្បីសិក្សាពីបទល្មើស។ លោកថា យ៉ាងយូរនៅត្រឹមថ្ងៃច័ន្ទ ពាក្យបណ្តឹងនឹងទៅដល់ដៃតុលាការ។ លោកស្រី ថាក់ ឡានី នៅមិនទាន់ឆ្លើយតបទៅនឹងគម្រោងនៃការប្តឹងផ្តល់របស់នាយករដ្ឋមន្ត្រីទៅលើរូបលោកស្រីនៅឡើយទេ។
គួរកត់សំគាល់ថា លោកស្រី ថាក់ ឡានី នឹងក្លាយជាសមាជិកព្រឹទ្ធសភាទី២ ដែលរងបណ្តឹងនៅក្នុងតុលាការ បន្ទាប់ពីលោក ហុង សុខហួរ ដែលកំពុងជាប់ពន្ធនាគានៅក្នុងសំណុំរឿងព្រំដែនស្រាប់។ ហើយលោកស្រីក៏នឹងស្ថិតនៅក្នុងជួរថ្នាក់ដឹកនាំសំខាន់ៗរបស់គណបក្សប្រឆាំងដែលកំពុងញាំញីដោយបណ្តឹងនៅក្នុងតុលាការ រួមមាន លោក សម រង្ស៊ី ប្រធានគណបក្ស, លោក កឹម សុខាជាអនុប្រធាន, លោក ចាន់ ចេង តំណាងរាស្ត្រមណ្ឌលកណ្តាល, លោក មាជ សុវណ្ណារ៉ា ប្រធាននាយកដ្ឋានផ្សព្វផ្សាយ និងសកម្មជនថ្នាក់កណ្តាលនិងថ្នាក់ក្រោមជាច្រើនរូបទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ