លោក ហ៊ុន សែន ទទួលស្គាល់សំឡេងបែកធ្លាយជាមួយលោក កឹម សុខា ថាជាការពិត
លោក ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានទទួលស្គាល់ថា សំឡេងដែលបែកធ្លាយរវាងលោក និងលោក កឹម សុខា កាលពីយប់មិញ គឺជាការពិត។ ការចេញមុខមកបញ្ជាក់ជាផ្លូវការនេះ គឺបន្ទាប់ពីសំឡេងសន្ទនាតាមខ្សែទូរសព្ទ ដែលគេបញ្ជាក់ថា ជាសំឡេងរបស់លោកនាយករដ្ឋមន្ត្រី ហ៊ុន សែន និងលោក កឹម សុខា នោះ ត្រូវបានទំលាយតាមរយៈគណនេយ្យហ្វេសបុកមួយ ឈ្មោះសីហា ហើយត្រូវបានផ្សព្វផ្សាយបន្ត ដោយសារព័ត៌មានក្នុងស្រុកហ្វ្រេសញូ (Fresh News)។ ប៉ុន្តែភ្លាមៗនៃការផ្សព្វផ្សាយនោះ មានការចោទជាសំណួរថា តើសំឡេងសន្ទនានោះ ពិតឬក្លែងក្លាយ?
ចុះផ្សាយនៅថ្ងៃ៖
ស្តាប់ - ០២:៤៩
គឺនៅប៉ុន្មានម៉ោងក្រោយពីការបែកធ្លាយសំឡេងសន្ទនារបស់លោកនាយករដ្ឋមន្ត្រី ហ៊ុន សែន ជាមួយលោក កឹម សុខា ជុំវិញផែនការក្តោបក្តាប់គណបក្សប្រឆាំងរបស់លោក កឹម សុខានោះ លោកនាយករដ្ឋមន្ត្រី ហ៊ុន សែន បានចូលទៅសរសេរ (Comment) នៅក្នុងទំព័រហ្វេសបុករបស់សារព័ត៌មានក្នុងស្រុកឈ្មោះហ្វ្រេសញូ (Fresh News) ថា សំឡេងដែលបែកធ្លាយនោះ គឺជាសំឡេងពិត១០០%របស់លោក។ លោក ហ៊ុន សែន បានសរសេរថា លោកពិតជាបាននិយាយឆ្លងឆ្លើយជាមួយលោក កឹម សុខា ជាច្រើនលើក រួមទាំងការឆ្លងឆ្លើយគ្នាតាមWhats App ជាច្រើនដងថែមទៀត។ មិនតែប៉ុណ្ណោះ លោកនាយករដ្ឋមន្ត្រី ហ៊ុន សែន ថែមទាំងបានកើតសរសើរដល់ម្ចាស់គណនេយ្យហ្វេសបុកឈ្មោះសីហា ដែលមានសមត្ថភាពអាចលួចថតសំឡេងសន្ទនារបស់លោកបាន។
សូមបញ្ជាក់ថា សំឡេងសន្ទនាតាមខ្សែទូរសព្ទរវាងលោកនាយករដ្ឋមន្ត្រី ហ៊ុន សែន និងលោក កឹម សុខា ដែលត្រូវបានទម្លាយដោយគណនេយ្យហ្វេសបុកមួយឈ្មោះសីហានោះ គឺមានរយៈពេលជាង២០នាទី ដែលបានរៀបរាប់ពីសេនារីយ៉ូ (Scenario) ក្នុងការឆ្ពោះទៅក្តោបក្តាប់គណបក្សសង្គ្រោះជាតិរបស់លោក កឹម សុខា នឹងការផាត់លោកសម រង្ស៊ី ចេញពីគណបក្សសង្គ្រោះជាតិ។ ហើយការចេញមុខមកបញ្ជាក់របស់លោកនាយករដ្ឋមន្ត្រី ហ៊ុន សែន កាលពីយប់មិញនេះ គឺបន្ទាប់ពីគេដាក់ការសង្ស័យថា សំឡេងដែលបែកធ្លាយនោះ ជាសំឡេងមិនពិត ហើយជាការប្រឌិតព័ត៌មានឡើង ដើម្បីបំបែកមេដឹកនាំគណបក្សប្រឆាំងតែប៉ុណ្ណោះ។
ទោះជាយ៉ាងណាក្តី លោក សុខ ឥសាន អ្នកនាំពាក្យគណបក្សប្រជាជនកម្ពុជាបានបញ្ជាក់ប្រាប់វិទ្យុបារាំងអន្តរជាតិ RFI នៅព្រឹកថ្ងៃអាទិត្យនេះថា នោះគឺជាការបញ្ជាក់ជាផ្លូវការរបស់លោកនាយករដ្ឋមន្ត្រី ហ៊ុន សែន ហើយ។ លោក សុខ ឥសាន បានបន្ថែមថា សារសន្ទនានោះ គឺកើតឡើងនៅក្នុងអំឡុងខែកញ្ញាឆ្នាំ២០១៦ មុនពេលដែលលោក កឹម សុខា បានទទួលការលើកលែងទោសពីព្រះមហាក្សត្រ តាមការស្នើសុំរបស់លោកនាយករដ្ឋមន្ត្រី ហ៊ុន សែន។
យ៉ាងណាក៏ដោយ គណបក្សប្រឆាំងនៅមិនទាន់ចេញប្រតិកម្មជាផ្លូវការនៅឡើយទេ ជុំវិញការបែកធ្លាយសារសន្ទនាចុងក្រោយក្នុងចំណោមសារបែកធ្លាយជាច្រើនទៀត ដែលបានបែកធ្លាយនារយៈពេលចុងក្រោយនេះ។ លោក មុត ចន្ថា មន្ត្រីទទួលបន្ទុកខុទ្ទកាល័យរបស់លោក កឹម សុខា បានចាត់ទុកថា ការលួចថតសំឡេងរបស់បុគ្គលណាក៏ដោយ គឺជាអំពើខុសច្បាប់។ ប៉ុន្តែលោកក៏មិនអាចបញ្ជាក់បាននៅឡើយទេថា តើសំឡេងដែលបែកធ្លាយនោះ ពិតឬក្លែងក្លាយនោះដែរ។
អ្វីជាការកត់សំគាល់ ការបែកធ្លាយសារ ឬព័ត៌មានក្លែងក្លាយ (Fake News) នេះហាក់កំពុងកើនឡើងច្រើន នៅក្នុងបរិបទដែលកម្ពុជាកំពុង ត្រៀមរៀបចំការបោះឆ្នោតឃុំសង្កាត់នៅថ្ងៃទី ៤ មិថុនា ខាងមុខ។ លោក គល់ បញ្ញា នាយកប្រតិបត្តិអង្គការឃ្លាំមើលការបោះឆ្នោតនៅកម្ពុជា ហៅកាត់ថា ខុមហ្វ្រែល បានចោទជាសំណួរថា តើអ្នកនយោបាយនៅកម្ពុជា ដែលប្រើយុទ្ធសាស្ត្របញ្ចេញព័ត៌មានបែកធ្លាយ ប្រឆាំងគូប្រកួតរបស់ខ្លួន នឹងទទួលបានប្រយោជន៍ជាសម្លេងឆ្នោតច្រើនប្រាកដមែនឬ? លោក គល់ បញ្ញា បានសរសេរនៅលើបណ្តាញសង្គមហ្វេសបុករបស់លោកកាលពីយប់មិញនេះថា ការលេចធ្លាយព័ត៌មាន (leaks) មិនត្រឹមមានបំណងបញ្ចុះកិត្យានុភាព (credibility) របស់ដៃគូប្រកួតនោះទេ តែក៏ចង់បង្កើតឲ្យមានការសង្ស័យគ្នា ដែលអាចនាំឲ្យការបែកបាក់គូប្រគួតនយោបាយច្រើនជាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ