បុគ្គលិកណាហ្គាវើលដ៏សម្រេចចិត្តចូលធ្វើការវិញ បន្ទាប់ពីភាគីក្រុមហ៊ុនយល់ព្រមលើសំណើពីរចំណុច
នៅទីបំផុតទៅ វិវាទការងាររវាងបុគ្គលិកនិងក្រុមហ៊ុនកាស៊ីណូណាហ្គាវើលដ៏ បានឈានដល់ដំណោះស្រាយមួយហើយ គិតត្រឹមល្ងាចម្សិលមិញនេះ គឺបន្ទាប់ពីការធ្វើកូដកម្មតវ៉ាអស់រយៈពេលពីរថ្ងៃ។ ដំណោះស្រាយបឋម គឺភាគីបុគ្គលិកយល់ព្រមចូលបំរើការងាររបស់ខ្លួនឡើងវិញចាប់ពីថ្ងៃនេះតទៅ។ ចំណែកឯភាគីក្រុមហ៊ុនវិញ យល់ព្រមតម្លើងប្រាក់ខែគោលឲ្យបុគ្គលិក និងទទួលយកតំណាងរបស់ពួកគេម្នាក់ ឲ្យចូលធ្វើការងារឡើងវិញនៅថ្ងៃនេះ។ ទោះជាយ៉ាងនេះក្តី ពួកគេបានព្រមានថា កូដកម្មនឹងអាចកើតឡើងវិញ ប្រសិនបើភាគីក្រុមហ៊ុនប្រែក្រឡាស់ពីកិច្ចសន្យា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
វិវាទការងាររវាងបុគ្គលិកនិងក្រុមហ៊ុនកាស៊ីណូណាហ្គាវើលដ៏ ដែលបានអូសបន្លាយតាំងពីខែកញ្ញា ឆ្នាំ ២០១៩ មកនោះ បានឈានមកដល់ដំណោះស្រាយមួយហើយ។ ដំណោះស្រាយជាបឋមនេះ គឺភាគីបុគ្គលិកគ្រប់ផ្នែកទាំងអស់ត្រូវផ្អាកធ្វើកូដកម្ម និងចូលធ្វើការងារឡើងវិញ ចាប់ពីថ្ងៃទី ១១ មករា នេះតទៅ។ ចំណែកឯភាគីក្រុមហ៊ុនវិញ បានទទួលយកសំណើពីរចំណុចក្នុងចំណោមការទាមទារ៦ចំណុច គឺទី១.យល់ព្រមតម្លើងប្រាក់ខែគោលអប្បរមាដល់បុគ្គលិកតាមផ្នែកនិងតាមតួនាទី និងទី២.ការទទួលយកប្រធានសហជីពម្នាក់ គឺកញ្ញា ឈឹម ស៊ីថរ ឲ្យចូលធ្វើការងារឡើងវិញ។ ដំណោះស្រាយខាងលើនេះ បានកើតឡើង ដោយសារមានការជួយសម្របសម្រួលនិងការធានាពីអាជ្ញាធរក្រុងភ្នំពេញផងដែរ។
ចំណែកឯលក្ខខណ្ឌទាមទារ៤ចំណុចទៀត ដូចជា ការទាមទារឲ្យភាគីក្រុមហ៊ុនការពារបុគ្គលិកពីការបៀតបៀននិងអំពើហិង្សា ការដកតំណែងប្រធានប្រតិបត្តិជាជនបរទេសម្នាក់ចេញពីតំណែង ការទាមទារឲ្យអនុវត្តការឈប់សម្រាកនៅថ្ងៃបុណ្យជាតិតាមច្បាប់ស្តីពីការងារ ដោយគោរពតាមគោលការណ៍ស្ម័គ្រចិត្ត និងការទាមទារឲ្យក្រុមហ៊ុនគោរពសិទ្ធិសហជីពជាដើមនោះ នឹងត្រូវដោះស្រាយតាមរយៈកិច្ចពិភាក្សាផ្ទៃក្នុងនៅពេលក្រោយ។ នេះបើតាមការឲ្យដឹងពីអ្នកស្រី ឃ្លាំង សុបិន្ត ទីប្រឹក្សាជាន់ខ្ពស់នៃសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុន ណាហ្គា វើលដ៍។
គួរកត់សំគាល់ថា ដំណោះស្រាយនេះ បានកើតឡើងបន្ទាប់ពីបុគ្គលិកកាស៊ីណូនិងសណ្ឋាគាណាហ្គាវើលដ៏ជាងពីរពាន់នាក់ បានចេញមកធ្វើកូដកម្មតវ៉ារយៈពេលពីរថ្ងៃ គឺចាប់ពីថ្ងៃទី ០៩ ដល់ថ្ងៃទី ១០ មករា ឆ្នាំ ២០២០ នេះ។ ទោះជាយ៉ាងនេះក្តី តំណាងសហជីពម្នាក់បានព្រមានថា កូដកម្មនឹងអាចកើតឡើងវិញគ្រប់ពេលវេលា ប្រសិនបើភាគីក្រុមហ៊ុនប្រែក្រឡាស់ពីកិច្ចសន្យារបស់ខ្លួន។
សូមរំលឹកជូនថា វិវាទការងាររវាងបុគ្គលិកនិងក្រុមហ៊ុនកាស៊ីណូណាហ្គាវើលដ៏ បានអូសបន្លាយចាប់តាំងពីខែកញ្ញា ឆ្នាំ ២០១៩ មក បន្ទាប់ពីភាគីក្រុមហ៊ុនបានសម្រេចព្យួរការងារកញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុន ណាហ្គា វើលដ៍។ កញ្ញា ឈឹម ស៊ីថរ ត្រូវបានចោទប្រកាន់ថា ជាមេខ្លោងដែលបំផុសឲ្យបុគ្គលិកណាហ្គាវើលដ៏ ធ្វើយុទ្ធនាការទាមទារតម្លើងប្រាក់ឈ្នួល តាមរយៈការពាក់អាវយឺត ដែលមានសរសេរសារថា «ក្រុមហ៊ុនរីកចម្រើន បុគ្គលិកត្រូវការប្រាក់ខែរស់នៅសមរម្យ»។ សូមបញ្ជាក់ដែរថា មុនឈានដល់ការធ្វើកូដកម្មជាទ្រង់ទ្រាយធំរយៈពេលពីរថ្ងៃចាប់ពីថ្ងៃទី ០៩ ដល់ថ្ងៃទី ១០ មករា មកនេះ ថ្នាក់ដឹកនាំសហជីព និងតំណាងបុគ្គលិកទាំងអស់ បានស្វែងរកដំណោះស្រាយតាមនីតិវិធីច្បាប់ទាំងនៅក្នុងក្រុមហ៊ុន នៅក្រសួងការងារ និងនៅក្រុមប្រឹក្សាអាជ្ញាកណ្តាលជាដើម ប៉ុន្តែគ្មានដំណោះស្រាយនោះទេ ដោយសារភាគីក្រុមហ៊ុន មិនព្រមជួបចរចារ និងបដិសេធសំណើរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ