គ.ជ.ប មិនគ្រប់គ្រងបណ្តាញសង្គមហ្វេសប៊ុកក្នុងពេលឃោសនាបោះឆ្នោតឃុំសង្កាត់ឆ្នាំ ២០១៧
គណៈកម្មាធិការជាតិរៀបចំការបោះឆ្នោត (គជប) បានប្រកាសថា គជប នឹងមិនគ្រប់គ្រងគេហទំព័រព័ត៌មានអនឡាញ និងបណ្តាញសង្គមដូចជា ហ្វេសប៊ុក យូធូប អំឡុងពេលឃោសនាបោះឆ្នោតឃុំសង្កាត់ឆ្នាំនេះទេ។ ក្នុងន័យនេះ គជប នឹងត្រួតពិនិត្យមើលរាល់ការផ្សាយទាំងសម្ភារៈ និងខ្លឹមសារនយោបាយ របស់កាសែតបោះពុម្ព វិទ្យុ ទូរទស្សន៍ទាំងរដ្ឋ និងឯកជន ដែលបានផ្សព្វផ្សាយទាក់ទងនឹងគណបក្សនយោបាយប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:២១
អ្នកនាំពាក្យគណៈកម្មធិការជាតិរៀបចំការបោះឆ្នោត (គជប) លោក ហង្ស ពុទ្ធា បានបញ្ជាក់ប្រាប់វិទ្យុបារាំង នៅថ្ងៃអង្គារនេះថា អំឡុងពេលឃោសនាបោះឆ្នោតឃុំសង្កាត់ខាងមុខនេះ គជប នឹងមិនគ្រប់គ្រងការផ្សព្វផ្សាយពីគណបក្សនយោបាយ តាមបណ្តាញសង្គម ដូចជា ហ្វេសប៊ុក យូធូប និងគេហទំព័រព័ត៌មានអ៊នឡាញនោះទេ។ មិនគ្រប់គ្រងដោយសារ តាមច្បាប់ គជប មានយុត្តាធិការត្រឹមដែនដីកម្ពុជា ខណៈបណ្តាញសង្គមហ្វេសប៊ុក មានម្ចាស់គណនីជាច្រើននៅក្រៅប្រទេស គួបផ្សំនឹងលទ្ធភាពផ្នែកថវិកា និងធនធានមនុស្សរបស់ គជប នៅមានកម្រិត។
យ៉ាងណាក៏ដោយ អំឡុងពេលឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ ចាប់ពីថ្ងៃទី ២០ ខែឧសភា ដល់ថ្ងៃទី ០២ ខែមិថុនា ឆ្នាំ ២០១៧ គជប នឹងគ្រប់គ្រងរាល់សម្ភារៈ និងខ្លឹមសារផ្សព្វផ្សាយរបស់កាសែតបោះពុម្ព វិទ្យុ ទូរទស្សន៍ទាំងរដ្ឋ និងឯកជនក្នុងស្រុក ទាក់ទងនឹងគណបក្សនយោបាយ។ គជប បានណែនាំនូវគោលការណ៍ បី សម្រាប់ស្ថានីយ៍វិទ្យុ និងទូរទស្សន៍ក្នុងការលក់ ឬជួលម៉ោងផ្សព្វផ្សាយគោលនយោបាយគណបក្សក្នុងពេលឃោសនា គោលការណ៍ស្មើភាព តម្លៃស្មើគ្នា និងតាមលំដាប់មុនក្រោយ។ អ្នកនាំ ពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បានបន្ថែមថា ប្រព័ន្ធផ្សព្វផ្សាយរាប់ទាំងកាសែត វិទ្យុ និងទូរទស្សន៍ ដែលមានបំណងផ្សព្វផ្សាយពី គណបក្សនយោបាយអំឡុងពេលឃោសនាបោះឆ្នោត ត្រូវតែប្រកាសពីម៉ោង ឬទំហំទំនេរ សម្រាប់លក់ជូនគណបក្សនយោបាយក្នុងរយៈពេលយ៉ាងតិច ១៥ថ្ងៃ មុនថ្ងៃចាប់ផ្តើមឃោសនាបោះឆ្នោត។ ម្ចាស់កាសែត វិទ្យុ និងទូរទស្សន៍ ត្រូវតែលក់ជូនគ្រប់គណបក្សក្នុងតម្លៃដូចគ្នា ហើយគណបក្សមកមុនបានផ្សាយមុន តែអាចលក់ជូនគណបក្សមួយ ត្រឹមតែពីរដង នៃម៉ោង ឬទំហំទំនេរសម្រាប់ផ្សព្វផ្សាយប៉ុណ្ណោះ។ ហើយ រាល់សកម្មភាពឃោសនា ត្រូវបញ្ឈប់ ២៤ម៉ោង មុនថ្ងៃបោះឆ្នោត។
គួរជម្រាបថា ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ នឹងប្រព្រឹត្តិទៅ នៅថ្ងៃអាទិត្យ ទី០៤ ខែមិថុនា ឆ្នាំ ២០១៧ ដោយមាន អ្នកបោះឆ្នោតសរុបជាង ៧លាន ៨សែននាក់ មាន ១២ គណបក្សនយោបាយចូលរួមប្រកួត និងមានបេក្ខភាពឈរឈ្មោះ សរុប ៩៤.៥៩៥ នាក់ ក្នុងនោះបេក្ខនារី មានសរុប ២៥.៧៨៨ នាក់។ បេក្ខជនទាំងនេះ នឹងត្រូវចូលរួមបោះឆ្នោតប្រជែង យកតំណែង ប្រធាន អនុប្រធាន និងសមាជិកក្រុមប្រឹក្សាឃុំសង្កាត់ សរុប ១១៥៧២ អាសនៈ ដែលមាននៅក្នុងចំណោមឃុំសង្កាត់ សរុប ១៦៤៦ ទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ