គ ជ ប ត្រួតពិនិត្យ និងរៀបចំការិយាល័យបោះឆ្នោតព្រឹទ្ធសភានៅកម្ពុជា
ទីតាំងការិយាល័យបោះឆ្នោត និងរាប់សន្លឹកឆ្នោតចំនួន៣៣ការិយាល័យក្នុងតំបន់ភូមិភាគទាំង៨នៅកម្ពុជា ត្រូវបានរៀបចំឡើងនៅថ្ងៃសៅរ៍នេះ ។ មន្រ្តីគណៈកម្មាធិការជាតិរៀបចំការបោះឆ្នោត( គ ជ ប ) និងអាជ្ញាធរមានសមត្ថកិច្ចនៅតាមមូលដ្ឋាននឹងសម្រាកការងារពេញមួយយប់ នៅទីតាំងបោះឆ្នោតទាំងនោះ ។ ខណៈដែលការបោះឆ្នោតព្រឹទ្ធសភា នីតិកាលទី៣ ឆ្នាំ២០១២ នឹងប្រព្រឹត្តទៅ នៅថ្ងៃអាទិត្យស្អែកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
តាំងពីព្រលឹមថ្ងៃសៅរ៍នេះ មន្រ្តីគណៈកម្មាធិការជាតិរៀបចំការបោះឆ្នោត( គ ជ ប ) និងសមត្ថកិច្ចនៅតាមមូលដ្ឋានជាច្រើននាក់ បានចុះត្រួតពិនិត្យ និងរៀបចំការិយាល័យបោះឆ្នោត និងរាប់សន្លឹកឆ្នោត។ ការិយាល័យបោះឆ្នោតព្រឹទ្ធសភាចំនួន៣៣នៅតំបន់ភូមិភាគ៨នៅកម្ពុជា រៀបចំរួចរាល់សម្រាប់ត្រៀមទទួលអ្នកបោះឆ្នោតចំនួន១១.៤៧០នាក់នៅថ្ងៃអាទិត្យស្អែកនេះ។
គ ជ ប បានប្រកាសពីចំនួនអាសនៈនៃព្រឹទ្ធសភាដែលត្រូវបោះឆ្នោតជ្រើសតាំងមានចំនួន៥៧ ក្នុងចំណោមអាសនៈសរុប៦១។ ដោយឡែក៤អាសនៈដែលនៅសល់ ត្រូវតែងតាំងដោយរដ្ឋសភា និងដោយព្រះមហាក្សត្រ។ ភូមិភាគទី១ រាជធានីភ្នំពេញ មាន២ការិយាល័យ ត្រូវការ៦អាសនៈ។
ភូមិភាគទី២ ខេត្តកំពង់ចាម មាន៣ការិយាល័យ ត្រូវការ៨អាសនៈ។ ភូមិភាគទី៣ ខេត្តកណ្តាល មាន២ការិយាល័យ ត្រូវការ៥អាសនៈ។ ភូមិភាគទី៤ ខេត្តបាត់ដំបង បន្ទាយមានជ័យ ឧត្តរមានជ័យ សៀមរាប និងខេត្តប៉ៃលិន មាន៧ការិយាល័យ ត្រូវការ១០អាសនៈ។ ភូមិភាគទី៥ ខេត្តតាកែវ កំពត និងខេត្តកែប មាន៤ការិយាល័យ ត្រូវការ៧អាសនៈ។ ភូមិភាគទី៦ ខេត្តព្រៃវែង និងខេត្តស្វាយរៀង មាន៣ការិយាល័យ ត្រូវការ៧អាសនៈ។ ភូមិភាគទី៧ ខេត្តកំពង់ស្ពឺ កំពង់ឆ្នាំង ពោធិ៍សាត់ កោះកុង និងខេត្តព្រះសីហនុ មាន៦ការិយាល័យ ត្រូវការ៨អាសនៈ។ ភូមិភាគទី៨ ខេត្តកំពង់ធំ ព្រះវិហារ ក្រចេះ ស្ទឹងត្រែង មណ្ឌលគិរី និងខេត្តរតនគិរី មាន៦ការិយាល័យ ត្រូវការ៦អាសនៈ។
លោក ទេព នីថា អគ្គលេខាធិការ គ ជ ប ប្រាប់វិទ្យុបារំាងអន្តរជាតិ នៅថ្ងៃនេះថា ទីតាំងការិយាល័យបោះឆ្នោត និងរាប់សន្លឹកឆ្នោត នឹងត្រូវរក្សាយាមកាមយ៉ាងល្អ ដោយមានមន្រ្តីគ ជ ប និងមន្រ្តីសន្តិសុខការពារ។ សម្រាប់សកម្មភាពគណបក្សនយោបាយនៅថ្ងៃ សៅរ៍នេះ មិនមានអ្វីគួរឲ្យកត់សំគាល់ដែលធ្វើល្មើសនឹងបម្រាប់របស់គ ជ ប នោះឡើយ ។តែគណបក្សនយោបាយបានជួបជុំជាមួយ សកម្មជនរបស់ខ្លួន ដើម្បីណែនាំនិងត្រៀមលក្ខណៈក្នុងការចូលរួមបោះឆ្នោតព្រឹទ្ធសភានៅថ្ងៃ អាទិត្យស្អែកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ