បក្សប្រឆាំងនៅតែចង់បានទីលានប្រជាធិបតេយ្យ ដើម្បីធ្វើខួបកិច្ចព្រមព្រៀង២៣តុលា ទោះអាជ្ញាធរមិនឲ្យ
នៅព្រឹកនេះ សាលារាជធានីភ្នំពេញបានប្រកាសប្រាប់ពីជំហរចុងក្រោយរបស់ខ្លួនបន្ទាប់ពីផ្ញើកំណត់ហេតុទៅកាន់ក្រសួងមហាផ្ទៃ ដោយមិនឲ្យគណបក្សសង្រ្គោះជាតិរៀបចំពិធីជួបជុំអបអរសាទរខួបលើកទី ២៥ នៃកិច្ចព្រមព្រៀងសន្តិភាពទីក្រុងប៉ារីសនៅថ្ងៃទី២៣ តុលាខាងមុខនេះនៅទីលានប្រជាធិបតេយ្យឡើយ។ អាជ្ញាធរស្នើឲ្យគណបក្សប្រឆាំងរៀបចំនៅទីស្នាក់ការគណបក្ស ឬទីតាំងឯកជនសមរម្យណាមួយវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
មូលហេតុនៃការមិនអនុញ្ញាតនេះ គឺដោយសារតែសាលារាជធានីភ្នំពេញយល់ឃើញថា ខ្លឹមសារនៃកិច្ចព្រមព្រៀងសន្តិភាពទីក្រុងប៉ារីសត្រូវបានសភាធម្មនុញ្ញរៀបចំជាធាតុផ្សំចូលក្នុងរដ្ឋធម្មនុញ្ញនៃព្រះរាជាណាចក្រកម្ពុជា និងបានប្រកាសឲ្យប្រើប្រាស់ចាប់តាំងពីឆ្នាំ ១៩៩៣ រហូតដល់បច្ចុប្បន្ននេះ។ ដូច្នេះ អាជ្ញាធររាជធានីភ្នំពេញយល់ថា ប្រធានបទមិនសមស្របទៀតទេ ដែលត្រូវប្រមូលផ្ដុំជួបជុំ ដើម្បីសម្ដែងមតិរបស់ប្រជាពលរដ្ឋសម្រាប់ខួបលើកទី ២៥ នៃកិច្ចព្រមព្រៀង ទីក្រុងប៉ារីស នៅទីលានប្រជាធិបតេយ្យនោះ។
ចំណែកខាងគណបក្សសង្រ្គោះជាតិ គេមិនទាន់ច្បាស់លាស់នៅឡើយ ថាតើត្រូវប្រារព្ធកម្មវិធីនេះនៅទីលានប្រជាធិបតេយ្យដូចការគ្រោងទុក ឫយ៉ាងណានោះ ព្រោះគេរង់ចាំសេចក្តីជូនដំណឹងរបស់សាលារាជធានីភ្នំពេញដល់ដៃសិន មុននឹងសម្រេចចិត្តបន្តទៅទៀត។ ក៏ប៉ុន្តែគណបក្សប្រឆាំងបានបញ្ជាក់រួចហើយថា កម្មវិធីនេះនៅតែបន្តធ្វើដូចរៀងរាល់ឆ្នាំដដែលបើទោះមិនទាន់ច្បាស់រឿងទីតាំងក្តី។ យ៉ាងណាក៏ដោយ សម្រាប់គណបក្សសង្រ្គោះជាតិ គេនៅតែចង់បានទីលានប្រជាធិបតេយ្យ ដើម្បីប្រារព្ធកម្មវិធីនេះ។
បើតាមលោកម៉ៅ មុនីវណ្ណ អ្នកតំណាងរាស្រ្តគណបក្សសង្រ្គោះជាតិ មានមូលហេតុធំៗចំនួនពីរ ដែលគណបក្សប្រឆាំងចង់បានទីលានប្រជាធិបតេយ្យនេះ គឺទី១ ដោយសារតែប្រជាពលរដ្ឋនឹងមានចំនួនច្រើនចូលរួមកម្មវិធីនេះ អាចពី១ ទៅ២ម៉ឺននាក់ ដែលគណបក្សមិនអាចធ្វើនៅទីស្នាក់ការកណ្តាលរបស់ខ្លួនបាន។ ទីពីរ គណបក្សប្រឆាំងយល់ថា បើធ្វើនៅទីលានប្រជាធិបតេយ្យ គឺមានលក្ខណៈងាយស្រួលដោយមិនបង្កឲ្យស្ទះចរាចរណ៍ និងរំខានដល់អ្នកដទៃទៀត។
សូមបញ្ជាក់ថា គណបក្សសង្គ្រោះជាតិតែងតែប្រារព្ធពិធីរំឮកខួបកិច្ចព្រមព្រៀងសន្តិភាពទីក្រុងបារីសជារៀងរាល់ឆ្នាំ ដោយឆ្នាំខ្លះរៀបចំធ្វើនៅតាមខេត្ត និងខ្លះទៀតធ្វើនៅទីស្នាក់ការកណ្តាលគណបក្សតែម្តងហើយទើបតែឆ្នាំនេះទេ ដែលបក្សប្រឆាំងចង់ធ្វើនៅទីលានប្រជាធិបតេយ្យ។ លោកកឹម សុខា ប្រធានស្តីទីគណបក្សសង្រ្គោះជាតិ បានលើកឡើងនៅព្រឹកនេះថា ទោះបីអស់រយៈពេល ២៥ឆ្នាំកន្លងទៅនេះ កម្ពុជាមិនទាន់បានអនុវត្តពេញលេញនូវស្មារតីកិច្ចព្រមព្រៀងសន្តិភាពទីក្រុងប៉ារីសយ៉ាងណាក៏ដោយ ប៉ុន្តែលោកនៅតែមានជំនឿថា កម្ពុជានៅតែអាចរួមគ្នាបន្ដដោះស្រាយបញ្ហា ដែលនៅសេសសល់ និងរួមគ្នាពង្រឹង និងពង្រីកនូវចំណុចសំខាន់ៗ នៃកិច្ចព្រមព្រៀងនេះឲ្យសម្រេចបានជាមិនខាន។
ខួបលើកទី ២៥ នៃកិច្ចព្រមព្រៀងសន្តិភាពទីក្រុងប៉ារីស ២៣តុលានេះ មិនមែនមានតែគណបក្សសង្រ្គោះជាតិទេ ដែលគ្រោងរៀបចំធ្វើឡើងនៅឆ្នាំនេះ។ នៅក្នុងសប្តាហ៍នេះ ទាំងអង្គការសង្គមស៊ីវិល និងទាំងរដ្ឋាភិបាលកម្ពុជាផងក៏បានរៀបចំធ្វើជាបន្តបន្ទាប់រួចរាល់មកហើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ