សភាសហភាពអឺរ៉ុប ដាក់ចេញនូវដំណោះស្រាយរួមសម្រាប់វិបត្តិនយោបាយនៅកម្ពុជា
កាលពីថ្ងៃពុធកន្លងទៅ សភាសហភាពអឺរ៉ុប បានដាក់ចេញនូវដំណោះស្រាយរួមមួយ សម្រាប់វិបត្តិនយោបាយនៅកម្ពុជា។ ក្នុងចំណោមដំណោះស្រាយរួមនោះ សភាសហភាពអឺរ៉ុប បានសង្កត់ធ្ងន់លើករណីលោក សម រង្ស៊ី ដែលត្រូវបានដកសមាជិកភាពចេញពីរដ្ឋសភា និងដែលត្រូវរងការចោទប្រកាន់នាពេលថ្មីៗនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ដោយបានតាមដានស្ថានការណ៍នយោបាយនៅកម្ពុជាយ៉ាងជាប់លាប់ សភាសហភាពអឺរ៉ុប បានសម្ដែងពីក្ដីព្រួយបារម្ភរបស់ខ្លួនចំពោះភាពតានតឹងនយោបាយនៅកម្ពុជា តាមរយៈដំណោះស្រាយរួមមួយ សម្រាប់នយោបាយនៅកម្ពុជា។
ដំណោះស្រាយ ដែលចេញផ្សាយកាលពីថ្ងៃពុធនោះ ជាបឋម លើកឡើងពីស្ថានភាពនយោបាយនៅកម្ពុជា។ ជាស្ថានភាពតានតឹង ដែលសភាសហភាពអឺរ៉ុបលើកឡើងថា កើតឡើងបន្ទាប់ពីមានការចាប់ខ្លួន ការកាត់ទោស ការគម្រាមកំហែង និងការវាយប្រហារ ពីសំណាក់រដ្ឋាភិបាលកម្ពុជា ទៅលើសកម្មជនគណបក្សប្រឆាំង។ បើតាមសភាសហភាពអឺរ៉ុប ស្ថានភាពនេះធ្វើឲ្យប៉ះពាល់ទៅដល់កិច្ចខិតខំប្រឹងប្រែងរបស់កម្ពុជា ឆ្ពោះទៅកាន់លទ្ធិប្រជាធិបតេយ្យ និងមូលដ្ឋានគ្រឹះនៃសេរីភាព។
ទន្ទឹមគ្នានោះ សភាសហភាពអឺរ៉ុប បានសង្កត់ធ្ងន់លើករណីលោក សម រង្ស៊ី ដែលត្រូវបានដកសមាជិកភាពចេញពីរដ្ឋសភា និងដែលត្រូវរងការចោទប្រកាន់នាពេលថ្មីៗនេះ។
ចំពោះការដកសមាជិកភាពរបស់លោក សម រង្ស៊ី ចេញពីរដ្ឋសភា សភាសហភាពអឺរ៉ុបបានថ្កោលទោសចំពោះសេចក្ដីសម្រេចចិត្តរបស់រដ្ឋសភាកម្ពុជា។ និងទាមទារឲ្យអាជ្ញាធរកម្ពុជា ទម្លាក់នូវរាល់ការចោទប្រកាន់លើលោក សម រង្ស៊ី ប្រធានគណបក្សសង្គ្រោះជាតិ និងសកម្មជនរបស់គណបក្សប្រឆាំង។ ជាមួយគ្នានោះ សភាសហភាពអឺរ៉ុប ស្នើឲ្យអាជ្ញាធរដោះស្រាយនូវវិបត្តិនយោបាយចំពោះមុខ ធ្វើយ៉ាងណាអនុញ្ញាតឲ្យប្រធានគណបក្សប្រឆាំង អាចបន្តការងាររបស់ខ្លួនឲ្យបានកាន់តែឆាប់តាមដែលអាចធ្វើទៅបាន។
គួរជម្រាបជូនថា ក្រៅពីករណីលោក សម រង្ស៊ី សភាសហភាពអឺរ៉ុប ក៏បានចាប់អារម្មណ៍ផងដែរចំពោះការវាយប្រហារលើតំណាងរាស្ត្រពីររូបមកពីគណបក្សជំទាស់។ សភាសហភាពអឺរ៉ុប អំពាវនាវឲ្យរដ្ឋាភិបាលកម្ពុជា ស៊ើបអង្កេតឲ្យបានពេញលេញ និងមិនលម្អៀង ចំពោះករណីអំពើហិង្សានេះ។ ស្ថាប័ននីតិបញ្ញត្តិនៃសហភាពអឺរ៉ុប ក៏បានស្នើឲ្យរដ្ឋាភិបាលកម្ពុជា បញ្ចប់នូវការឃុំឃាំងដោយរំលោភ ទៅលើសកម្មជនការពារសិទ្ធិមនុស្ស ដោយអនុញ្ញាតឲ្យពួកគេបំពេញការងារដោយឥស្សរៈផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ