ជនភៀសខ្លួនម្នាក់ស្ម័គ្រចិត្តមកកម្ពុជា ខណៈពួកគេផ្សេងទៀតរងការព្រមានកាត់បន្ថយការឧបត្ថម្ភរស់នៅ
យ៉ាងហោចណាស់ ជនភៀសខ្លួនអូស្ត្រាលីម្នាក់ បានស្ម័គ្រចិត្ត និង ត្រូវបានចុះឈ្មោះរួចរាល់ហើយ ក្នុងការមកតាំងទីលំនៅថ្មីនៅក្នុងប្រទេសកម្ពុជា។ នេះបើតាមការបញ្ជាក់របស់លោកខៀវ សុភ័គ អ្នកនាំពាក្យក្រសួងមហាផ្ទៃ។ ការស្ម័គ្រចិត្តរបស់ជនភៀសខ្លួនរូបនោះ បានធ្វើឡើងស្របពេលដែលរដ្ឋមន្ត្រីក្រសួងអន្តោប្រវេសន៍អូស្ត្រាលី បានព្រមានថា ជនភៀសខ្លួននៅកោះNauru អាចនឹងទទួលបានការឧបត្ថម្ភតិចតួចវិញសម្រាប់ការមកតាំងទីលំនៅថ្មីនៅកម្ពុជា ប្រសិនបើពួកគេនៅតែរារែកចិត្តទៀតនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
ជនភៀសខ្លួនអូស្ត្រាលីម្នាក់ស្ម័គ្រចិត្តមករស់នៅក្នុងប្រទេសកម្ពុជា។ ការស្ម័គ្រចិត្តនេះ បានធ្វើឡើងស្របពេលមន្ត្រីជំនាញរបស់កម្ពុជាបីរូប កំពុងបំពេញភារកិច្ចជាមួយមន្ត្រីអូស្ត្រាលីក្នុងការស្វែងរកជនភៀសខ្លួននៅលើកោះNauru ដែលស្ម័គ្រចិត្តមករស់នៅក្នុងប្រទេសកម្ពុជា។
លោកខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ឲ្យដឹងថា ជនភៀសខ្លួនរូបនោះ ជាជនជាតិរ៉ូហិនយ៉ា ហើយមន្ត្រីកម្ពុជានៅទីនោះ បានបញ្ជាក់រួចហើយថា គាត់គឺជាជនភៀសខ្លួនពិតប្រាកដមែន។ ទោះបីក្រសួងមហាផ្ទៃមិនទាន់បង្ហាញរបាយការណ៍ជាផ្លូវការអំពីឈ្មោះជនភៀសខ្លួនដែលស្ម័គ្រចិត្តនោះក៏ដោយ ក៏ប៉ុន្តែ លោកខៀវ សុភ័គ បានគូសបញ្ជាក់ថា ជនភៀសខ្លួននោះ បានឯកភាពជាលាយលក្ខណ៍អក្សរក្នុងការមករស់នៅប្រទេសកម្ពុជា ហើយមន្ត្រីកម្ពុជាដែលកំពុងបំពេញភារកិច្ចនៅទីនោះក៏បានចុះឈ្មោះគាត់រួចរាល់ហើយដែរ។
គួរកត់សម្គាល់ថា ស្របពេលដែលមន្ត្រីកម្ពុជាកំពុងបំពេញភារកិច្ចនៅកោះNauruក្នុងការស្វែងរកអ្នកស្ម័គ្រចិត្តមករស់នៅក្នុងប្រទេសកម្ពុជា និងទើបទទួលបានអ្នកស្ម័គ្រចិត្តតែម្នាក់នោះ រដ្ឋមន្ត្រីក្រសួងអន្តោប្រវេសន៍អូស្ត្រាលី លោក Peter Duttonកាលពីថ្ងៃពុធ បានរៀបចំធ្វើវីឌីអូមួយលើកទឹកចិត្តដល់ជនភៀសខ្លួនដែលកំពុងស្នាក់នៅលើកោះNauru ឲ្យស្ម័គ្រចិត្តមករស់នៅក្នុងប្រទេសកម្ពុជា។ បើតាមទីភ្នាក់ងារសារព័ត៌មានABCរបស់អូស្ត្រាលី ក្រៅពីលើកទឹកចិត្តដល់ជនភៀសខ្លួនទាំងនោះ លោករដ្ឋមន្ត្រីអន្តោប្រវេសន៍អូស្ត្រាលី ក៏បានឆ្លៀតព្រមានថា ពួកគេអាចនឹងទទួលបានការឧបត្ថម្ភតិចតួចវិញសម្រាប់ការមកតាំងទីលំនៅថ្មីនៅកម្ពុជា ប្រសិនបើពួកគេនៅតែបន្តរារែកចិត្តទៀតនោះ។
សូមបញ្ជាក់ថា ចំពោះជនភៀសខ្លួនដែលស្ម័គ្រចិត្តមកកម្ពុជាសម្រាប់ក្រុមដំបូង នឹងទទួលបានការឧបត្ថម្ភជាច្រើន ដូចជា ថវិកា ការជួយស្វែងរកការងារធ្វើ ការស្នាក់នៅ ការបង្រៀនភាសា និងការធានាបញ្ហាសុខភាពជាដើម។
យ៉ាងណាមិញ សារជំរុញលើកទឹកចិត្តតែក្នុងន័យគំរាមកំហែងរបស់រដ្ឋមន្ត្រីអន្តោប្រវេសន៍អូស្ត្រាលីនេះ គឺហាក់ផ្ទុយទៅនឹងកិច្ចព្រមព្រៀងរវាងរដ្ឋាភិបាលកម្ពុជា និង អូស្ត្រាលីកាលពីចុងខែកញ្ញាឆ្នាំ២០១៤ ដែលនិយាយពីការបញ្ជូន និង ទទួលយកជនភៀសខ្លួនពីអូស្ត្រាលីចំនួន១០០០នាក់មកតាំងទីលំនៅក្នុងប្រទេសកម្ពុជា។ ក្នុងកិច្ចព្រមព្រៀងនោះ បើតាមរដ្ឋាភិបាលកម្ពុជា គឺការបញ្ជូនជនភៀសខ្លួន គឺត្រូវធ្វើឡើងតាមគោលការណ៍ស្ម័គ្រចិត្ត។ ទោះជាបែបនេះក្តី រដ្ឋាភិបាលកម្ពុជា មិនមានប្រតិកម្មយ៉ាងណានោះទេ ចំពោះសារព្រមានរបស់រដ្ឋមន្ត្រីអន្តោប្រវេសន៍អូស្ត្រាលីលើជនភៀសខ្លួនលើកោះ Nauru ដើម្បីជំរុញឲ្យមករស់នៅក្នុងប្រទេសកម្ពុជានេះ។
យ៉ាងណាក៏ដោយ អ្នកនាំពាក្យក្រសួងមហាផ្ទៃ លោកខៀវ សុភ័គ មិនបានបញ្ជាក់ទេ ថាតើជនភៀសខ្លួនម្នាក់ដែលស្ម័គ្រចិត្តមករស់នៅកម្ពុជា អាចនឹងត្រូវបញ្ជូនមកកម្ពុជានៅពេលណានោះ។ ចំណែកមន្ត្រីកម្ពុជាដែលកំពុងបំពេញភារកិច្ចជាមួយមន្ត្រីអូស្ត្រាលី ដើម្បីស្វែករកអ្នកស្ម័គ្រចិត្តបន្ថែមទៀតមករស់នៅក្នុងប្រទេសកម្ពុជានោះ នឹងត្រឡប់មកកម្ពុជាវិញនៅចុងសប្តាហ៍នេះ ឫសប្តាហ៍ក្រោយ។ នេះបើតាមលោក ខៀវ សុភ័គ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ