ថ្នាក់ដឹកនាំតំណាងរាស្ត្របក្សទាំងពីរជួបគ្នាជាលើកដំបូង តែគ្មានលទ្ធផល
ដូចការគ្រោងទុក នៅព្រឹកថ្ងៃព្រហស្បតិ៍នេះ ថ្នាក់ដឹកនាំតំណាងរាស្ត្ររបស់គណបក្សប្រជាជនកម្ពុជា ដឹកនាំដោយលោកស ខេង និង ខាងគណបក្សសង្គ្រោះជាតិដឹកនាំដោយលោកសម រង្ស៊ី បានជួបពិភាក្សាគ្នាជាលើកដំបូងនៅវិមានរដ្ឋសភា។ ប៉ុន្តែជំនួបដែលធ្វើឡើងមិនដល់មួយម៉ោងផងនោះ មិនមានលទ្ធផលអ្វីជាដុំកំភួននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
គឺនៅក្នុងសន្និសីទកាសែតរួមគ្នាខ្លីមួយបន្ទាប់ពីជួបពិភាក្សាគ្នាជាលើកដំបូងដែលប្រព្រឹត្តិទៅមិនដល់មួយម៉ោងផង ប្រធានថ្នាក់ដឹកនាំតំណាងរាស្ត្រនៃគណបក្សទាំងពីរ បានអះអាងថា ជំនួបនេះ មិនបានសម្រេចលើរបៀបវារៈណាមួយនោះទេ។ មិនបានសម្រេច ដោយសារជំនួបលើកនេះ មិនមានរបៀបវារៈជាក់លាក់ត្រូវបានគណបក្សទាំងពីរលើកមកពិភាក្សានោះឡើយ។
លោកសម រង្ស៊ី ប្រធានថ្នាក់ដឹកនាំតំណាងរាស្ត្រ និងជាប្រធានគណបក្សសង្គ្រោះជាតិ បានថ្លែងថា ជំនួបថ្ងៃនេះ គឺធ្វើឡើងដើម្បីស្របទៅនឹងបទបញ្ជាផ្ទៃក្នុងនៃរដ្ឋសភាដែលទើបចែងបង្កើតក្រុមតំណាងរាស្ត្រភាគតិចនៅក្នុងរដ្ឋសភា និង អនុវត្តតាមស្មារតីនៃការលើកកម្ពស់វប្បធម៌សន្ទនា។ វប្បធម៌សន្ទនា ដែលលោកសម រង្ស៊ី ចាត់ទុកថា ជាមូលដ្ឋាននៃលទ្ធិប្រជាធិបតេយ្យ។
ជាមួយគ្នានោះ លោកស ខេង ប្រធានថ្នាក់ដឹកនាំតំណាងរាស្ត្រខាងគណបក្សប្រជាជនកម្ពុជា បានបន្ថែមថា ជំនួបពេលនេះ គឺគណបក្សជាប់ឆ្នោតទាំងពីរបានពិភាក្សាគ្នាពីរបៀបនៃការធ្វើការជាមួយគ្នារវាងថ្នាក់ដឹកនាំតំណាងរាស្ត្រនៅក្នុងរដ្ឋសភានាពេលខាងមុខ។ក្នុងន័យនេះ និងនិយាយជារួម ជំនួបនេះ គឺ ជាការបើកផ្លូវ និងបានស្គាល់គ្នារវាងថ្នាក់ដឹកនាំតំណាងរាស្ត្រដែលទើបបង្កើតថ្មីនេះ។ យ៉ាងណាក៏ដោយ បើតាមលោក ស ខេង បើទោះបីជំនួបជិតមួយម៉ោងនេះ មិនបានជជែកគ្នាពីបញ្ហាជាតិសំខាន់ៗក៏ពិតមែន ប៉ុន្តែគណបក្សទាំងពីរបានពិភាក្សាគ្នាអំពីការកំណត់ពេលវេលាជាទៀតទាត់ ដែលអាចមានរយៈពេល១ខែ ឫ៣ខែ ដើម្បីធ្វើការជួបគ្នាម្តង។ ក៏ប៉ុន្តែការកំណត់រយៈពេលនេះ ក៏មិនទាន់បានសម្រេចបែបណានោះដែរ។
សូមជំរាបជូនថា នៅក្នុងជំនួបថ្ងៃនេះ មានសមាសភាព៣ រូបម្ខាងបានចូលរួម នោះ គឺខាងគណបក្សប្រជាជនកម្ពុជា មាន លោកស ខេង ប្រធានថ្នាក់ដឹកនាំតំណារាស្ត្រ និង អមដោយអនុប្រធានពីររូបទៀត គឺ លោកគាត ឈន់ និង លោកស្រីម៉ែន សំអន។ ចំណែកខាងគណបក្សសង្គ្រោះជាតិវិញ មាន លោកសម រង្ស៊ី ប្រធានថ្នាក់ដឹកនាំតំណាងរាស្ត្រ អមដោយលោកកឹម សុខា អនុប្រធាន និង លោកយឹម សុវណ្ណ លេខាធិការ។ លោកយឹម សុវណ្ណ កាលពីថ្ងៃពុធ បានលើកឡើងថា គណបក្សសង្គ្រោះជាតិនឹងលើកយកនូវបញ្ហាបង្កើតវប្បធម៌ជជែកគ្នានៅថ្នាក់មូលដ្ឋានទៅពិភាក្សាជាមួយគណបក្សប្រជាជនកម្ពុជានៅក្នុងជំនួបនេះ។ ប៉ុន្តែបានជួបគ្នា គណបក្សទាំងពីរបែរមិនបានលើករបៀបវារៈណាមួយពិភាក្សាគ្នាទៅវិញ។
គួរបញ្ជាក់ថា ការបង្កើតឲ្យមានថ្នាក់ដឹកនាំតំណាងរាស្ត្រនៅក្នុងរដ្ឋសភា រហូតឈានដល់ការមកជួបគ្នាជាលើកដំបូងនៅពេលនេះ គឺបានធ្វើឡើងក្នុងគោលដៅពង្រឹងវប្បធម៌សន្ទនាគ្នា។ វប្បធម៌សន្ទនា ដែលថ្នាក់ដឹកនាំកំពូលគណបក្សប្រជាជនកម្ពុជា និង គណបក្សសង្គ្រោះជាតិ បានសន្យាបង្កើតឡើង បន្ទាប់ពីមានកិច្ចព្រមព្រៀងបញ្ចប់វិបត្តិនយោបាយរវាងគណបក្សទាំងពីរកាលពីថ្ងៃទី២២ កក្កដា ឆ្នាំ២០១៤ កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ