សំណុំរឿងនាំចូលភ្លុកដំរីខុសច្បាប់នៅកំពង់ផែក្រុងព្រះសីហនុ នឹងត្រូវបញ្ជូនទៅតុលាការ
ភ្លុកដំរីនាំចូលពីទ្វីបអាហ្វ្រិកចំនួន៦១៣គីឡូក្រាម ត្រូវបានមន្ដ្រីគយនៅកំពង់ផែអន្ដរជាតិក្រុងព្រះសីហនុឆែកឆេររកឃើញនៅក្នុងកុងតឺន័រពីរគ្រឿង កាលពីថ្ងៃសុក្រទី៥សីហាកន្លងទៅ។ បច្ចុប្បន្ន មន្ដ្រីគយបានដកហូតទំនិញហាមឃាត់នេះទុក មុននឹងបញ្ជូនសំណុំរឿងនេះទៅកាន់តុលាការនៅសប្ដាហ៍ក្រោយ។ នេះបើតាមការឲ្យដឹងពីលោក គិន លី ប្រធានសាខាគយនិងរដ្ឋាករប្រចាំកំពង់ផែអន្ដរជាតិ ក្រុងព្រះសីហនុ។
ចុះផ្សាយនៅថ្ងៃ៖
មែនទែនទៅ ភ្លុកដំរីទាំង៦១៣គីឡូក្រាមដែលអាជ្ញាធររឹបអូសបាននេះ បានចូលមកដល់កម្ពុជា តាមច្រកកំពង់ផែក្រុងព្រះសីហនុ តាំងពីឆ្នាំ២០១៤មកម្ល៉េះ។ មានចំនួនសរុប៤១កំណាត់និង៨៧ដើម ភ្លុកដំរីទាំងនេះ ត្រូវបានឈ្មួញដាក់បង្កប់នៅក្នុងបាវពោត ក្នុងកុងតឺន័រចំនួនពីរ។
លោក គិន លី ប្រធានសាខាគយនិងរដ្ឋាករកំពង់ផែអន្ដរជាតិក្រុងព្រះសីហនុ អះអាងថា មន្ដ្រីគយ បានស្កែនឃើញទំនិញហាមឃាត់ទាំងនេះតាំងពីឆ្នាំ២០១៤មកម្ល៉េះ ប៉ុន្តែមិនបានចាត់វិធានការ ព្រោះត្រូវរង់ចាំជួបម្ចាស់ទំនិញ ដែលត្រូវចូលខ្លួនទៅបំពេញបែបបទយកឥវ៉ាន់ចេញ។ ប៉ុន្តែដោយសារតែម្ចាស់ទំនិញមិនបានចេញមុខមកទទួលខុសត្រូវ ទើបមន្ដ្រីគយ ព្រមទាំងតំណាងអយ្យការអមសាលាដំបូងខេត្តព្រះសីហនុ សម្រេចចុះឆែកទូរកុងតឺន័រ ព្រមទាំងរឹបអូសភ្លុកដំរីដែលជាទំនិញខុសច្បាប់ទាំងនេះទុកតែម្ដង។ លោកថា មន្ដ្រីគយ នឹងបញ្ជូនសំណុំរឿងនេះទៅកាន់តុលាការនាពេលខាងមុខ ឲ្យស្របតាមនីតិវិធីច្បាប់។
ថ្វីត្បិតតែរកឃើញនៅកំពង់ផែក្រុងព្រះសីនហុ ប៉ុន្តែបើតាមលោក គិន លី កម្ពុជាទំនងមិនមែនជាគោលដៅនៃទំនិញភ្លុកដំរីនេះឡើយ។ កម្ពុជាគ្រាន់តែជាប្រទេសឆ្លងកាត់តែប៉ុណ្ណោះ នៅក្នុងដំណើរពីទ្វីបអាហ្វ្រិក ទៅកាន់ប្រទេសគោលដៅចុងក្រោយ។ នេះបើតាមប្រធានសាខាគយនិងរដ្ឋាករកំពង់ផែអន្ដរជាតិក្រុងព្រះសីហនុ។
សូមរំលឹកជូនថា នេះមិនមែនជាលើកទី១ឡើយ ដែលកម្ពុជារឹបអូសបានភ្លុកដំរី ក្នុងបរិមាណច្រើនដូច្នេះ។ កាលពីឆ្នាំ២០១៤ កម្ពុជាបានរឹបអូសភ្លុកដំរីជាង៣តោន ដែលឈ្មួញបង្កប់នៅក្នុងកុងតឺន័រដឹកសណ្ដែក។ ក្នុងឆ្នាំជាមួយគ្នានោះ សមត្ថកិច្ចខ្មែរបានឃាត់ខ្លួនផងដែរ បុរសជនជាតិវៀតណាមពីរនាក់ដែលព្យាយាមរត់ពន្ធភ្លុកដំរីជិត៨០គីឡូក្រាមដោយខុសច្បាប់ ពីទ្វីបអាហ្វ្រិក។ ទ្វីបអាហ្វ្រិក ដែលមានដំរីប្រមាណ៣ម៉ឺន៥ពាន់ក្បាល ត្រូវបានគេសម្លាប់យកភ្លុកជារៀងរាល់ឆ្នាំ។ ភ្លុកដំរី គឺជាទំនិញត្រូវប៉ាន់បំផុតនៅអាស៊ី ជាពិសេសចិន ដែលមូលនិធិសត្វព្រៃពិភពលោកអះអាងថា អាចមានតម្លៃដល់ទៅ២ពាន់២រយដុល្លារក្នុងមួយគីឡូក្រាមឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ