កម្ពុជានឹងមានសេដ្ឋកិច្ចប្រសើរឡើងថែមទៀតនៅពេលគម្រោងគ្រាក់ៗទាំង១៥បញ្ចប់នៅឆ្នាំ២០២៥
គម្រោងធំៗចំនួន១៥ ទាក់ទងនឹងហេដ្ឋារចនាសម្ព័ន្ធ ស្ពានថ្នល់នឹងចាប់ផ្តើមនៅដើមឆ្នាំ២០១៨ ខាងមុខនេះហើយ។ គម្រោងដែលមានទឹកប្រាក់រាប់ពាន់លានដុល្លារ ដែលជាថវិកាកម្ចីនិងឥណទានរបស់ប្រទេសចិននិងជប៉ុន ត្រូវក្រសួងសាធារណៈការនិងដឹកជញ្ជូន លើកឡើងថា ខ្លះកំពុងរៀបចំចាប់ផ្តើម ខ្លះកំពុងសិក្សា និងខ្លះទៀតកំពុងជជែកគ្នាដើម្បីបញ្ជប់នៅឆ្នាំក្រោយ។
ចុះផ្សាយនៅថ្ងៃ៖
ស្តាប់ - ០១:៥៤
គម្រោងធំៗសំខាន់ៗទាំងនោះរួមមាន គម្រោងសាងសង់ផ្លូវជាតិ ផ្លូវក្រវ៉ាត់ក្រុង ផ្លូវល្បឿនលឿន ការពង្រីកផ្លូវ ផ្លូវរថភ្លើង រថភ្លើងអាកាស ការដឹកជញ្ជូនតាមផ្លូវទឹក កំពង់ផែទឹកជ្រៅ និងស្ពានឆ្លងកាត់ទន្លេផងនោះ ត្រូវបានក្រសួងសាធារណៈការនឹងដឹកជញ្ជូនប្រកាសថា នឹងចាប់ផ្តើមជាបន្តបន្ទាប់គ្នាចាប់ពីដើមឆ្នាំ២០១៨ ខាងមុខនេះតទៅ។
លោក វ៉ា ស៊ឹមសុរិយា អ្នកនាំពាក្យក្រសួងសាធារណៈការ បានថ្លែងប្រាប់វិទ្យុបារាំង RFI ថា គម្រោងគមនាគមន៍សំខាន់ៗទាំងនេះ នឹងត្រូវបញ្ចប់តាមការកំណត់ទុកក្នុងចន្លោះពីឆ្នាំ២០២០ ដល់ឆ្នាំ២០២៥ ដែលជាតំណាក់កាលមួយឆ្លើយតបទៅនឹងផែនការមេក្នុងការតភា្ជប់សហគមន៍សេដ្ឋកិច្ចអាស៊ានឆ្នាំ២០២៥។
អ្វីដែលជាផលប្រយោជន៍សម្រាប់ប្រជាជននិងប្រទេសកម្ពុជា អ្នកនាំពាក្យក្រសួងសាធារណៈការរូបនេះ បញ្ជាក់ថាការកើតឡើងគម្រោងគ្រាក់ៗទាំងនេះ នឹងជួយដល់ការធ្វើសមាហរណកម្មផ្ទៃក្នុងកម្ពុជា និងមួយទៀតជួយកម្ពុជានៅក្នុងការធ្វើសមាហរណកម្មក្នុងតំបន់ ដោយក្នុងនោះនឹងធ្វើឲ្យកំរិតសេដ្ឋកិច្ចពលរដ្ឋខ្មែរ មានការប្រសើរឡើង។
សូមបញ្ជាក់ថា គម្រោងធំៗទាំងនេះ គម្រោងមួយចំនួនដែលបាននិងកំពុងដំណើរការនោះគឺ ការពង្រីកផ្លូវជាតិលេខ៥ជា៤គន្លងទៅមក គម្រោងផ្លូវជាតិលេខ១១ ផ្លូវជាតិលេខ៣ ជាដើម។ ដោយឡែកគម្រោងផ្លូវល្បឿនលឿនមួយចំនួន ដូចជាពីភ្នំពេញទៅខេត្តព្រះសីហនុ ត្រូវបាន ក្រសួងសាធារណៈការបញ្ជាក់ថា បានបញ្ចប់ការចរចាហើយ នៅតែការសរសេរកិច្ចព្រមព្រៀងប៉ុណ្ណោះ ដែលកិច្ចការនេះ ត្រូវបានគេរំពឹងថានឹងធ្វើឲ្យទាន់ដំណើរទស្សនកិច្ចថ្នាក់ដឹកនាំជាន់ខ្ពស់ចិននៅប្រទេសកម្ពុជានាដើមឆ្នាំក្រោយនេះ។
ជាមួយគ្នានេះ គម្រោងផ្លូវរថភ្លើងអាកាស AGT នៅភ្នំពេញ ក៏នឹងត្រូវបញ្ចប់ការសិក្សានិងវាយតម្លៃពីអង្គការ Jica ជប៉ុននៅដើមឆ្នាំក្រោយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ