ចំនួនកុមារកំព្រានៅកម្ពុជាកើនឡើង៩២% ក្នុងឆ្នាំ២០១៥ ធៀបនឹងឆ្នាំ២០១៤
ការសិក្សាស្រាវជ្រាវដែលធ្វើឡើងដោយក្រសួងសង្គមកិច្ច អតីតយុទ្ធជន និងយុវនីតិសម្បទា នៅក្នុងឆ្នាំ ២០១៥ បានរកឃើញថា មានកុមារកំព្រាចំនួន ១ម៉ឺន ១ពាន់ ៧៨៨នាក់ បានកំពុងរស់នៅក្នុងមណ្ឌលកុមារកំព្រាចំនួន ២៦៧ កន្លែង នៅក្នុងខេត្តចំនួន ៥ ក្នុងប្រទេសកម្ពុជា។ នៅក្នុងឆ្នាំ២០១៤ មានកុមារកំព្រាតែ ៧ពាន់ ៥៤៥នាក់ នៅក្នុងមណ្ឌលកុមារកំព្រាតែ ១៣៩ តែប៉ុណ្ណោះ ក្នុងចំនួន៥ដូចគ្នានេះ។ ចំនួននេះបានបង្ហាញឲ្យឃើញថានៅក្នុងឆ្នាំ២០១៥ កុមារកំព្រាកម្ពុជាកើនឡើងរហូតដល់ ៩២%។ នេះបើតាមសេចក្តីប្រកាសព័ត៌មានរួមរបស់អង្គការ UNICEF កម្ពុជា និងក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី២៤ មីនាម្សិលមិញនេះ។
ចុះផ្សាយនៅថ្ងៃ៖
ស្តាប់ - ០២:១៥
ការសិក្សាស្រាវជ្រាវត្រូវបានធ្វើឡើងក្នុងខេត្តនិងក្រុងចំនួន៥ ដែលមានដូចជាក្រុងភ្នំពេញ ក្រុងព្រះសីហនុ ខេត្តសៀមរាប ខេត្តបាត់ដំបង និងខេត្តកណ្តាល ក្រោមការឧត្តមពីអង្គការ UNICEF USAID ហើយនិងដៃគូក្នុងគម្រោងការពារកុមារ (3PC)។
លោកវង្ស សូត្រ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានបញ្ជាក់នៅក្នុងសេចក្តីប្រកាសព័ត៌មានថា ការរកឃើញនេះបានបង្ហាញពីក្តីព្រួយបារម្ភរយៈពេលវែងមួយជុំវិញការកើនឡើងយ៉ាងច្រើននូវចំនួនមណ្ឌលកុមារកំព្រានៅក្នុងប្រទេស។ ហើយកត្តានេះក៏បានបង្កឲ្យមានបញ្ហា និងការប្រឈមជាច្រើនដូចជាការអប់រំ ការរស់នៅ និងសុវត្ថិភាពចំពោះកុមាររស់នៅក្នុងមណ្ឌលកុមារកំព្រាអស់ទាំងនោះ។
ការសិក្សាស្រាវជ្រាវបានរកឃើញថាមណ្ឌលកុមារកំព្រាទាំង ២៦៧កន្លែងនោះមាន ៥៧ កន្លែងជាផ្ទះសម្រាប់ស្នាក់នៅជាក្រុម, ២០កន្លែងជាផ្ទះសម្រាប់ស្នាក់នៅ និងបញ្ជូនបន្តទៅកាន់កន្លែងមួយផ្សេងទៀត, ១១ កន្លែងទៀតគឺជាអគារស្នាក់នៅបែបសាសនា ហើយនិង៤៦កន្លែងទៀត គឺជាកន្លែងស្នាក់នៅផង និងជាកន្លែងសិក្សាផង។ កន្លែងទាំងអស់នេះ គឺសិ្ថតនៅក្នុងតំបន់សិក្សាចំនួន ៥ខេត្ត និងក្រុង។ មណ្ឌលកុមារកំព្រាភាគច្រើន ត្រូវបានរកឃើញថា ផ្តល់នូវការថែទាំ និងស្នាក់នៅក្នុងរយៈពេលវែង គឺមានរយៈពេលលើសពី៦ខែ។
កញ្ញា Debora Comini តំណាងអង្គការ UNICEF ប្រចាំនៅកម្ពុជា បានបញ្ជាក់ថា យើងនៅតែបន្តធ្វើការបញ្ជាក់ថា ការចូលរួមថែទាំពីក្រុមគ្រួសារ និងសហគមន៍ចំពោះកុមារ គឺពិតជាមានសារៈសំខាន់ ព្រោះថាការរស់នៅក្នុងមណ្ឌលកុមារកំព្រាក៏អាចបង្កផលអវិជ្ជមានមួយចំនួនដែរ ដែលរួមមានដូចជាការប្រឈមនឹងការរំលោភលើផ្នែករាងកាយ ការបៀតបៀនផ្លូវភេទ ហើយអាចនឹងជះឥទ្ធិពលអាការៈដល់ការលូតលាស់និងការអភិវឌ្ឍរបស់កុមារ។
មានកត្តាច្រើនយ៉ាងដែលជំរុញឲ្យក្រុមគ្រួសារបញ្ជូនកូនរបស់ខ្លួនទៅកាន់មណ្ឌលកុមារកំព្រា។ បញ្ហាទាំងអស់នោះរួមមានការលែងលះ ជីវភាពក្រីក្រ ឪពុកម្តាយធ្វើចំណាកស្រុក ហើយនិងការយល់ឃើញថាមណ្ឌលកុមារកំព្រាជាកន្លែងមួយដែលអាចផ្តល់នូវការអប់រំ ថែទាំង និងជាកន្លែងមួយដ៏ល្អក្នុងការចិញ្ចឹមកូនៗរបស់ពួកគេ។ ហើយក្នុងនោះដែរ ក៏មានការចូលរួមផ្សព្វផ្សាយ និងដើរជ្រើសរើសដោយផ្ទាល់ពីខាងមណ្ឌលកុមារកំព្រាមួយចំនួនផងដែរ។
ការសិក្សាស្រាវជ្រាវបែបវិទ្យាសាស្រ្តជាសកលបានបង្ហាញថា ការរស់នៅក្នុងមណ្ឌលកុមារកំព្រា អាចនឹងជះឥទ្ធិពលអវិជ្ជមានដល់កុមារទាំងផ្នែករាងកាយ បញ្ញាស្មារតី និងការវិវឌ្ឍផ្នែកអារម្មណ៍ ក្នុងរយៈពេលវែង នៅពេលដែលពួកគេធំពេញវ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ