កម្ពុជាដាស់តឿនវៀតណាមរឿងព្រំដែនសារជាថ្មី
រដ្ឋមន្រ្តីការបរទេសកម្ពុជាលោក ហោ ណាំហុង កាលពីលា្ងចថ្ងៃទី២៣មិថុនាបានជួបជាមួយនិងលោក Le Hoai Trung អនុរដ្ឋមន្ត្រីការបរទេសវៀតណាម។ ក្នុងជំនួបទ្វេភាគីនេះបញ្ហាព្រំដែនកម្ពុជា-វៀតណាម ត្រូវបានលើកយកមកពិភាក្សាសារជាថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣២
ប្រមុខកាទូតកម្ពុជាលោក ហោ ណាំហុង បានលើកយកបញ្ហាព្រំដែនមកពិភាក្សាទល់មុខគ្នាជាមួយអនុរដ្ឋមន្ត្រីការបទេសវៀតណាម។ កម្ពុជាដាស់តឿនសារជាថ្មីទៅវៀតណាមកុំឲ្យសកម្មភាពនៅក្នុងតំបន់ដែលមិនទាន់បានបោះបង្គោលព្រំដែនរវាងប្រទេសទាំងពីរ។ ក្នុងកិច្ចប្រជុំ វេទិកាអាស៊ាន-ជប៉ុន លោកហោ ណាំហុង បានទទូចជាថ្មីម្ដង់ទៀតអោយវៀតណាមអនុវត្តតាមគោលការណ៍ដែលស្របតាមសេចក្ដីប្រកាសព័ត៌មានរួមនៅថ្ងៃទី១៧ខែមករាឆ្នាំ១៩៩៤ រវាងកម្ពុជា-វៀតណាម។
លោករដ្ឋមន្ត្រី ក៏បានលើកឡើងពីករណីវៀតណាមជីកស្រះនៅស្រុកអូយ៉ាដាវ ខេត្តរតនគីរី និងករណីសាងសងប៉ុស្តិ៍យាមនៅជាប់ភូមិព្រែកស្បូវឃុំ សំពៅលូន ស្រុកកោះធំ ខេត្តកណ្ដាល។ កម្ពុជាគូសបញ្ជាក់ឲ្យភាគីវៀតណាមត្រូវបញ្ឈប់ការសាងសងប៉ុស្ដិ៍យោធានោះទោះបីជាក្នុងករណីជាការជួសជុលក៏ដោយ។
សូមរំលឹកថាបញ្ហាព្រំដែនកម្ពុជាបានផ្ទុះបន្តគ្នាតាំងពីខេត្តរតនៈគីរី ខេត្តត្បូងឃ្មុំ និងចុងក្រោយគឺខេត្តកណ្តាល។ គិតតាំងពីឆ្នាំ២០១៣មក កម្ពុជាបានផ្ញើកំណត់ទូតទៅកាន់ក្រសួងការបរទេសវៀតណាម និងស្ថានទូតវៀតណាមប្រចាំនៅកម្ពុជាចំនួន១០ច្បាប់ មកហើយដើម្បីឱ្យប្រទេសជិតខាងមួយនេះ បកស្រាយពីសកម្មភាពរបស់ខ្លួននៅតាមព្រំដែន។ យ៉ាងណាក៏ដោយវៀតណាមមិនបានឆ្លើយតបយ៉ាងណានោះទេ។ ភាគីវៀតណាមបានបញ្ជាក់ថា រដ្ឋាភិបាលបានបញ្ជាឲ្យអាជ្ញាធរមូលដ្ឋានធ្វើរបាយការណ៍ជូនរដ្ឋាភិបាលហើយ ហើយបច្ចុប្បន្ននេះរដ្ឋាភិបាលកំពុងរងចាំរបាយការណ៍។
សូមបញ្ជាក់ថា បញ្ហាព្រំដែនរវាងកម្ពុជា វៀតណាមនេះគណបក្សសង្គ្រោះជាតិបានស្នើឲ្យរដ្ឋាភិបាលប្រើប្រាស់យន្តការតុលាការយុត្តិធម៌អន្តរជាតិ។ យ៉ាងណាក៏ដោយរដ្ឋាភិបាលបានបញ្ជាក់ថា យន្តការតុលាការគឺជាជម្រើសចុងក្រោយរបស់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ