គ.ជ.ប អំពាវនាវទៅធនាគារប្រគល់អត្តសញ្ញាណប័ណ្ណជូនពលរដ្ឋឲ្យបានមុនថ្ងៃបោះឆ្នោត
គ.ជ.ប បានអំពាវនាវទៅធនាគារ និងប្រតិបត្តិករឥណទានទាំងអស់នៅកម្ពុជា ត្រូវប្រគល់អត្តសញ្ញាណប័ណ្ណ ជូនពលរដ្ឋវិញឲ្យទាន់មុនថ្ងៃបោះឆ្នោត ដែលនឹងមកដល់នៅថ្ងៃទី៤មិថុនាខាងមុខ។ ហើយ ធនាគារជាតិ ក៏បានព្រមានដកហូតអាជ្ញាបណ្ណ ឬបញ្ឈប់សកម្មភាពអាជីវកម្មស្ថាប័នឯកជនទាំងនោះដែរ ប្រសិនបើមិនព្រមបញ្ឈប់ការទទួលយកអត្តសញ្ញាណប័ណ្ណ ដែលជាឯកសារមួយសម្រាប់ការធានាលើការផ្ដល់ឥទាន នេះទេ។
ចុះផ្សាយនៅថ្ងៃ៖
ស្តាប់ - ០១:៣៥
ការអំពាវនាវរបស់ខ្លួនធ្វើឡើងបន្ថែមពីលើសេចក្ដីក្រើនរំលឹករបស់ធនាគារជាតិ កាលពីថ្ងៃទី២២ឧសភា។ ស្ថាប័នជាតិរៀបចំការបោះឆ្នោត គ.ជ.ប បានគូសបញ្ជាក់ថា ការអំពាវនាវរបស់ខ្លួនធ្វើឡើងដោយយោងទៅលើច្បាប់បោះឆ្នោត ដែលបានកំណត់ថា ពលរដ្ឋខ្មែរអាចបោះឆ្នោតបាន ត្រូវមានអត្តសញ្ញាណប័ណ្ណសញ្ជាតិខ្មែរ និងត្រូវមានឈ្មោះក្នុងបញ្ជីបោះឆ្នោតផ្លូវការឆ្នាំ២០១៦។
ជាមួយគ្នានេះ ធនាគារជាតិនៃកម្ពុជាសង្កេតឃើញថា ធនាគារ និងប្រតិបត្តិករឥទានជនបទមួយចំនួននៅតែមិនអនុវត្តពេញលេញ នឹងម៉ឺងម៉ាត់ ចំពោះការជូនដំណឹងរបស់ខ្លួនម្ដងរួចមកហើយ ក្នុងការហាមមិនឲ្យទទួលយកអត្តសញ្ញាណប័ណ្ណ សៀវភៅគ្រួសារ ឬសៀវភៅស្នាក់នៅ សម្រាប់ធានាលើការផ្ដល់ឥណទាន។
ដោយឡែកទាក់ទងបច្ចុប្បន្នភាពនេះវិញគ.ជ.ប ក៏បានអំពាវនាវទៅពលរដ្ឋដែលមានឈ្មោះក្នុងបញ្ជីបោះឆ្នោតត្រូវត្រៀមអត្តសញ្ញាណប័ណ្ណ ឬឯកសារបញ្ជាក់អត្តសញ្ញាណបម្រើឲ្យការបោះឆ្នោតឲ្យបានគ្រប់ៗគ្នា។ ក្នុងករណីពុំមានអត្តសញ្ញាណប័ណ្ណ ឬអត្តសញ្ញាណប័ណ្ណ ខូច បាត់ ឬ ដាក់បញ្ចាំ ត្រូវប្រញាប់រកឯកសារជំនួសឲ្យបានទាន់ពេលវេលា។ ហើយការចេញឯកសារបញ្ជាក់អត្តសញ្ញាណបម្រើឲ្យការបោះឆ្នោត នឹងត្រូវបញ្ចប់នៅថ្ងៃទី ២មិថុនា។
ដូច្នេះប្រធានគណៈកម្មការឃុំ សង្កាត់រៀបចំការបោះឆ្នោតត្រូវជម្រុញពលរដ្ឋមកធ្វើឯកសារឲ្យទាន់ពេលវេលាដោយមិនគិតថ្លៃ។ នេះបើតាម គ.ជ.ប។ ជាចុងក្រោយគ.ជ.ប បានរំលឹកថា ពលរដ្ឋមានឈ្មោះក្នុងបញ្ជីបោះឆ្នោត ប៉ុន្តែគាត់គ្មានអត្តសញ្ញាណប័ណ្ណខ្មែរ ឬឯកសារបញ្ជាក់អត្តសញ្ញាណបម្រើឲ្យការបោះឆ្នោត គាត់មិនអាចបោះឆ្នោតបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ