ជនជាតិដើមភាគតិច មួយចំនួនរងគ្រោះ ដោយសារតែបញ្ហាដីធ្លី
ក្រៅតែពីបញ្ហាសុខភាពរបស់ជនជាតិភាគតិច ដែលជាប្រធានបទធំនៃទិវាអន្តរជាតិជនជាតិដើមភាគតិចនោះ ជនជាតិដើមភាគតិចកម្ពុជានៅតែមានបញ្ហាប្រឈមមួយចំនួនទៀត ជាពិសេសបញ្ហាទំនាស់ដីធ្លី និងព្រៃឈើ ដែលបានធ្វើឲ្យប៉ះពាល់ដល់ជីវភាពរស់នៅ និងវប្បធម៌របស់ពួកគាត់។ នេះបើតាមការបញ្ជាក់របស់នាយកប្រតិបត្តិអង្គការគាំទ្រសហគមន៍ជនដើមភាគតិច (ICSO) ក្នុងឱកាសទិវាអន្តរជាតិជនជាតិដើមភាគតិចពិភពលោកលើកទី២១ ថ្ងៃទី៩ សីហានេះ។
ចុះផ្សាយនៅថ្ងៃ៖
ស្តាប់ - ០២:១៨
នៅថ្ងៃទី០៩ ខែសីហានេះ តំណាងអង្គការក្រៅរដ្ឋាភិបាល និងអង្គការ ដែលគាំទ្រការពារជនជាតិដើមភាគតិច និងមានការចូលរួមពីជនជាតិភាគតិចប្រមាណ ១,០០០នាក់ បានចូលរួមប្រារព្ធទិវាអន្តរជាតិជនជាតិដើមភាគតិចពិភពលោក ឆ្នាំ២០១៥ លើកទី២១លើពិភពលោក និងលើកទី១១សម្រាប់ប្រទេសកម្ពុជា ក្នុងខេត្តកោះកុង។
បើតាមលោក សៅ វណ្ណសី នាយកប្រតិបត្តិអង្គការគាំទ្រសហគមន៍ជនដើមភាគតិច (ICSO)បានឲ្យដឹងថា ជនជាតិដើមភាគតិចក្នុងប្រទេសកម្ពុជាត្រូវបានលើកស្ទួយតាមរយៈគោលនយោបាយជាតិអភិវឌ្ឍន៍ជនជាតិដើមភាគតិច។ តែយ៉ាងណាមិញ ជនជាតិដើមភាគតិច នៅកម្ពុជានៅតែជួបនឹងបញ្ហាមួយចំនួន ជាពិសេសគឺបញ្ហាដីធ្លី បញ្ហាវប្បធម៌ និងព្រៃឈើកសិកម្ម។ លោកបានបញ្ជាក់បន្ថែមថា បញ្ហាទាំងអស់នោះ កើតឡើងដោយសារតែរាជរដ្ឋាភិបាលបានជំរុញឲ្យមានការកើនឡើងសេដ្ឋកិច្ចរដ្ឋ ដែលធ្វើឲ្យមានការវិនិយោគពិវិស័យឯកជនទៅលើធនធានក្នុងតំបន់របស់ជនជាតិភាគតិច។
លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា បានមានប្រសាសន៍ក្នុងពេលប្រារព្ធទិវានេះថា ស្ថាប័នសង្គមស៊ីវិល ជាពិសេសជនជាតិដើមភាគតិចក្នុងប្រទេសកម្ពុជាចង់ឃើញឱកាសប្រារព្ធទិវានេះ នៅកម្ពុជា ឈានដល់ការសំរេចគោលបំណងរួម គឺការលើកកម្ពស់សិទ្ធិជនជាតិដើមភាគតិច តាមរយៈការទទួលស្គាល់ស្វ័យអត្តសញ្ញាណ និងជំរុញការចុះបញ្ជីដីសមូហភាពជនជាតិដើមភាគតិច ដើម្បីថែរក្សាប្រពៃណីវប្បធម៌របស់ពួកគាត់។
យោងតាម លោក សួស គង់ រដ្ឋលេខាធិការក្រសួងអភិវឌ្ឍន៍ជនបទ ដែលបានចូលរួមក្នុងទិវាអន្តរជាតិនេះ បានបញ្ជាក់ថា ក្រសួងពាក់ព័ន្ធបានធ្វើអត្តសញ្ញាណសំគាល់សម្រាប់ពួកគាត់ បែងចែកដីសហគមន៍ និងចេញប័ណ្ឌសំគាល់ដី ដោយក្រសួងដែនដី។ ក្រៅពីនេះ ក្រសួងពាក់ព័ន្ធបានព្យាយាមមិនឲ្យពួកគាត់ធ្វើកសិកម្មវិលជុំ ដោយបង្រៀនពួកគាត់ឲ្យធ្វើកសិកម្មដូចប្រជាពលរដ្ឋធម្មតាវិញ ហើយដើម្បីចៀសវាងពីការបាត់បង់ដីអ្នកតា ដែលជាអត្តសញ្ញាណវប្បធម៌របស់គាត់ គឺក្រសួងបានរក្សាដីទាំងនោះទុកសម្រាប់ពួកគាត់។
សូមបញ្ជាក់ថាការប្រារព្ធទិវាអន្តរជាតិជនជាតិដើមភាគតិចពិភពលោកឆ្នាំ២០១៥នេះ ធ្វើឡើងក្រោមប្រធានបទ “របៀបវារៈក្រោយឆ្នាំ២០១៥៖ ការធានាសុភាព និងសុខុមាលភាពរបស់ជនជាតិដើមភាគតិច” ដោយធ្វើឡើងក្នុងខេត្តចំនួន ៨ក្នុងប្រទេសកម្ពុជា។ បច្ចុប្បន្ននេះ កម្ពុជាមានជនជាតិដើម ២៤អំបូរ ឬប្រមាណ១.៤ភាគរយនៃប្រជាជនសរុប រស់នៅក្នុង១៥ខេត្តទាំងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ