លោក កឹម សុខា ចាត់ទុកដំណើរការរបស់តុលាការថា គឺដើម្បីបញ្ចប់ជីវិតនយោបាយរបស់លោក
តុលាការក្រុងភ្នំពេញនៅព្រឹកមិញនេះ បានបើកសវនាការជំនុំជម្រះលើលោកកឹម សុខា ទាំងដែលម្ចាស់ខ្លួន និងក្រុមមេធាវីមិនបានចូលរួមសវនាការ។ ទោះជាបែបនេះក្តី តុលាការប្រើពេលប្រមាណមួយម៉ោង ដើម្បីបញ្ចប់សវនាការ និងប្រកាសសាលក្រមនៅម៉ោង ២រសៀលនេះ។ ចំពោះចំណាត់ការតុលាការនេះ លោកកឹម សុខា បានចាត់ទុកថា នេះជាបំណងចង់បញ្ចប់ជីវិតនយោបាយរបស់លោកពីសំណាក់គូបដិបក្ខ។
ចុះផ្សាយនៅថ្ងៃ៖
ស្តាប់ - ០២:៣៩
នៅក្នុងការថ្លែងសុន្ទរកថា និងសារនយោបាយជាសាធារណៈ ជាលើកដំបូងបង្អស់បន្ទាប់ពីបានសំងំលាក់ខ្លួននៅក្នុងទីស្នាក់ការគណបក្សអស់រយៈពេលប៉ុន្មានខែមកនេះ លោកកឹម សុខា ប្រធានស្តីទីគណបក្សសង្រ្គោះជាតិ បានចេញមុខបញ្ជាក់នៅចំពោះសកម្មជន និងអ្នកគាំទ្រជាច្រើននាក់របស់ខ្លួនថា លោកនឹងនៅតែបន្តការតស៊ូទៅទៀត បើទោះជាគេ (គណបក្សកាន់អំណាច) កំពុងធ្វើទុក្ខបុកម្នេញលើលោកយ៉ាងណាក៏ដោយ។
សំឡេង.........
ការថ្លែងជាសាធារណៈរបស់លោកប្រធានស្តីទីគណបក្សប្រឆាំងដ៏ធំនៅកម្ពុជារូបនេះ បានធ្វើឡើងស្របពេលតុលាការសាលាដំបូងរាជធានីភ្នំពេញបានបើកសវនាការជំនុំជម្រះលើរូបលោកក្នុងសំណុំរឿង«បដិសេធក្នុងការចូលខ្លួន»តាមមាត្រា៥៣៨ នៃក្រមព្រហ្មទណ្ឌ។ គឺជាបទចោទប្រកាន់ ដែលគេកម្រនឹងឃើញកើតមាន តែបានកើតឡើងលើលោកកឹម សុខា បន្ទាប់ពីលោកបានបដិសេធមិនចូលខ្លួនបំភ្លឺក្នុងនាមជាសាក្សីនៅតុលាការចំនួនពីរលើកលើសំណុំរឿង«សញ្ចាកម្ម»ដែលជាបណ្តឹងរបស់កញ្ញា ខុម ចាន់តារាទី ហៅស្រីមុំ។
លោកកឹម សុខា បានសង្កត់ធ្ងន់ថា ការប្រើប្រាស់ប្រព័ន្ធតុលាការ ដើម្បីវាយប្រហារ និងប្រឆាំងរូបលោកនេះ គឺមិនត្រឹមតែប៉ះពាល់ដល់ភាពត្រឹមត្រូវនៃការបោះឆ្នោតប៉ុណ្ណោះទេ ប៉ុន្តែវាគឺជាការវាយប្រហារទៅលើលទ្ធិប្រជាធិតេយ្យ សេរីពហុបក្ស ដែលធានាដោយរដ្ឋធម្មនុញ្ញ។ ជាងនេះទៅទៀត គឺជាវាយប្រហារស្មារតីនៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ហើយនៅត្រង់ចំណុចនេះ លោកកឹម សុខា បានទាញសេចក្តីថា គឺមានបំណងចង់ជំរុញឲ្យកម្ពុជាវិលទៅរករបបផ្តាច់ការឡើងវិញ។
សូមបញ្ជាក់ថា នៅថ្ងៃតុលាការបើកសវនាការជំនុំជម្រះលើលោកកឹម សុខា នៅថ្ងៃសុក្រនេះ សកម្មជន និងអ្នកគាំទ្រគណបក្សសង្រ្គោះជាតិ បានធ្វើការប្រមូលផ្តុំគ្នាក្នុងទ្រង់ទ្រាយមធ្យមនៅពីរកន្លែងផ្សេងៗគ្នា។ គឺទីមួយ ជាការជួបជុំគ្នានៅទីស្នាក់ការគណបក្សប្រឆាំងនៅសង្កាត់ចាក់អង្រែលើ ដើម្បីបានជួបមុខ និងស្តាប់ការថ្លែងសុន្ទរកថាពីថ្នាក់ដឹកនាំ។ ការជួបជុំគ្នានេះ បានធ្វើឡើងក្រោមការឃ្លាំមើលយ៉ាងដិតដល់ពីសំណាក់អាជ្ញាធររដ្ឋាភិបាល ដែលបានត្រៀមរួចជាស្រេចទាំងកងកម្លាំង និងប្រដាប់ប្រដាសម្រាប់បង្រ្កាបបាតុកម្មផង។ ចំណែកក្រុមទីពីរ បានទៅជួបជុំគ្នានៅពីមុខតុលាការក្រុងភ្នំពេញ ដើម្បីចាំស្ដាប់ការសម្រេចកាត់ទោសលោកកឹម សុខា ពីតុលាការក្រុង។ នៅក្នុងការជួបជុំនេះ មានការប៉ះទង្គិចគ្នារវាងអ្នកគាំទ្រគណបក្សសង្រ្គោះជាតិ និងអាជ្ញាធរ ដោយអាជ្ញាធរខណ្ឌ៧មករា បានឃាត់ខ្លួនអ្នកគាំទ្របក្សប្រឆាំងម្នាក់ ដោយសារតែបុរសនោះ បានប្រើប្រាស់ឧគ្ឃោសនាសព្ទស្រែកតវ៉ានៅពីមុខតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ