សាលាដំបូងខេត្តកោះកុង កោះហៅតំណាងសហគមន៍អារ៉ែងចូលបំភ្លឺពីបទប្រមូលអនុផលព្រៃឈើដោយគ្មានការអនុញ្ញាត
ចៅក្រមស៊ើបសួរនៃសាលាដំបូងខេត្តកោះកុង បានចេញដីកាកោះហៅ លោក វ៉ែន វ៉ន តំណាងសហគមន៍តំបន់អារ៉ែង ឲ្យចូលទៅបំភ្លឺនៅថ្ងៃទី០៧ខែតុលាខាងមុខ។ ដីកាចុះថ្ងៃទី២១សីហានោះបញ្ជាក់ពីការចោទប្រកាន់លើលោក វ៉ែន វ៉ន ថាបានប្រមូលផល អនុផលព្រៃឈើ ដោយគ្មានលិខិតអនុញ្ញាត និងលុបបំបាត់វត្ថុតាង។ អង្គការសង្គមស៊ីវិល បានហៅការកោះហៅរបស់សាលាដំបូងខេត្តកោះកុងនេះថា ជាការគម្រាមកំហែងចំពោះប្រជាសហគមន៍ដែលសកម្មក្នុងការតវ៉ាបញ្ចេញមតិ។ និងស្នើឲ្យតុលាការទម្លាក់ចោលការចោទប្រកាន់ចំពោះសកម្មជនធម្មជាតិដើមកំណើតជនជាតិដើមភាគតិចនេះជាបន្ទាន់។
ចុះផ្សាយនៅថ្ងៃ៖
ស្តាប់ - ០១:៤២
បើតាមដីកាបង្គាប់របស់ចៅក្រមស៊ើបសួរ មីន មករា នៃសាលាដំបូងខេត្តកោះកុង លោក វ៉ែន វន តំណាងសហគមន៍តំបន់អារ៉ែង ត្រូវចូលខ្លួនទៅសាលាដំបូងខេត្តកោះកុង នៅថ្ងៃទី០៧ខែតុលា វេលាម៉ោង៨ព្រឹក។ ចៅក្រមស៊ើបសួរកោះហៅ តំណាងសហគមន៍តំបន់អារ៉ែង ទៅកាន់តុលាការ ដើម្បីសួរយកចម្លើយ និងសួរពីដំណើររឿងប្រមូលផល អនុផលព្រៃឈើដោយគ្មានលិខិតអនុញ្ញាត និងបទលុបបំបាត់វត្ថុតាង។ លោក វ៉ែន វន ដែលមានវ័យ៣៦ឆ្នាំ ត្រូវតុលាការតម្រូវឲ្យយកលិខិតផ្សេងៗដែលទាក់ទងទៅនឹងរឿងខាងដើមនេះទៅជាមួយផង ប្រសិនបើមាន។ ហើយក្នុងករណីមិនចូលខ្លួនតាមកាលកំណត់ ចៅក្រមស៊ើបសួរបានបញ្ជាក់ក្នុងដីកាថា នឹងចេញដីកាបង្គាប់ឲ្យនាំខ្លួន។
គួរជម្រាបថា នេះគឺជាលើកទី២ហើយ ដែលតុលាការខេត្តកោះកុងបង្គាប់ឲ្យលោក វ៉ែន វ៉ន តំណាងសហគមន៍តំបន់អារ៉ែង ចូលទៅបំភ្លឺនៅតុលាការ។ កាលពីថ្ងៃទី០៣ ខែមេសា លោក វ៉ែន វ៉ន បានចូលទៅបំភ្លឺនៅចំពោះមុខព្រះរាជអាជ្ញារងសាលាដំបូងខេត្តកោះកុងរួចហើយ នៅក្នុងសំណុំរឿងដដែលនេះ។
លោក វ៉ែន វ៉ន ដែលធ្លាប់ធ្វើការតស៊ូមតិយ៉ាងស្វិតស្វាញមិនឲ្យមានការកសាងទំនប់វារីអគ្គីសនីនៅតំបន់អារ៉ែង មិនអាចទាក់ទងសុំការបំភ្លឺបានទេ។
លោក អ៊ិន គង់ជិត មន្ដ្រីសិទ្ធិមនុស្សអង្គការលីកាដូប្រចាំខេត្តកោះកុង បានសម្ដែងការសោកស្ដាយចំពោះចំណាត់ការរបស់តុលាការខេត្តកោះកុង ទៅលើសកម្មជនធម្មជាតិជាបន្តបន្ទាប់នាប៉ុន្មានខែចុងក្រោយនេះ។ មន្ដ្រីសិទ្ធិមនុស្សរូបនេះ ចាត់ទុកការកោះហៅរបស់សាលាដំបូងខេត្តកោះកុង ថាជាការគម្រាមកំហែងចំពោះលោក វ៉ែន វ៉ន និងប្រជាសហគមន៍ផ្សេងទៀត ដែលសកម្មក្នុងការតវ៉ាបញ្ចេញមតិ។ លោក អ៊ិន គង់ជិត ក៏បានស្នើឲ្យតុលាការទម្លាក់ចោលការចោទប្រកាន់ទៅលើលោក វ៉ែន វ៉ន ដើមកំណើតជនជាតិដើមភាគតិចនេះជាបន្ទាន់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ